Capitol 1

1 En la comensa, Dio ia crea la sielo e la tera. 2 E la tera ia es sin forma e vacua, la oscuria ia es supra la profonda, e la spirito de Dio ia flota supra la acua.

3 E Dio ia dise: “Ta ce la lus esiste!” E la lus ia esiste. 4 Dio ia vide ce la lus es bon, e El ia separa la lus de la oscuria. 5 E El ia nomi la lus “dia” e la oscuria “note”. Un sera e un matina ia aveni, cual ia es la dia prima.

6 E Dio ia dise: “Ta ce un volta esiste entre la acuas, afin los es separada de lunlotra”. 7 E Dio ia fa la volta e ia separa la acua su la volta de la acua supra la volta. E acel ia aveni tal. 8 E Dio ia nomi la volta “sielo”. Un sera e un matina ia aveni, cual ia es la dia du.

9 E Dio ia dise: “Ta ce la acua su la sielo colie se a un loca, afin la seca ta apare”. E acel ia aveni tal. 10 E Dio ia nomi la seca “tera”, e El ia nomi la colie de acua “mar”. E Dio ia vide ce acel es bon. 11 E Dio ia dise: “Ta ce la tera produi plantas con semes e arbores cual porta frutas con semes, cada en la modo de sua spesia”. E acel ia aveni tal. 12 E La tera ia produi plantas con semes e arbores cual porta frutas con semes, cada en la moda de sua spesie. E Dio ia vide ce acel es bon. 13 Un sera e un matina ia aveni, cual ia es la dia tre.

14 E Dio ia dise: “Ta ce lampas esiste sur la volta de la sielo, per separa la dia de la note, e per dona sinias de tempos, e dias e anios, 15 e ta ce on ave lampas sur la volta de la sielo, afin los ta lumina la tera”. E acel ia aveni tal. 16 E Dio ia crea du lampas grande: la plu grande per governa la dia e la plu peti per governa la note. E El crea ance la stelas. 17 Dio ia pone los sur la volta de la sielo, afin los ta lumina la tera 18 e governa la dia e la note, e separa la lus e la oscuria. E Dio ia vide ce acel es bon. 19 Un sera e un matina ia aveni, cual ia es la dia cuatro.

20 E Dio ia dise: “Ta ce la acua pleni se con viventes, e avias vola supra la tera su la volta de la sielo”. 21 E Dio ia crea la viventes grande e tota viventes cual vive e xama en la acua e tota avias con alas, cada seguente sua spesie. E Dio ia vide ce acel es bon. 22 E Dio ia bondise los e ia dise: “Ta ce vos es fertil e crese e pleni la acua de la mares, e ta ce la avias crese supra la tera”. 23 Un sera e un matina ia aveni, cual ia es la dia sinco.

24 E Dio ia dise: “Ta ce la tera produi viventes, cada seguente sua spesie: la bestias, la animales savaje, e la viventes cual rampa sur la tera, cada seguente sua spesie”. E acel ia aveni tal. 25 E Dio ia crea la animales de la tera, cada seguente sua spesie: la bestias, la animales savaje, e la viventes cual rampa sur la tera, cada seguente sua spesie. E Dio ia vide ce acel es bon. 26 E Dio ia dise: “Ta ce nos crea umanas, seguente Nosa imaje e forma, afin los ta governa supra la pexes de la mar e la avias de la sielo e supra la bestias, la animales savaje, e la viventes cual rampa sur la tera”.

27 E Dio ia crea umanas, seguente Sua imaje,
en la imaje de Dio, El crea los.
En la forma de omes e femes, El ia crea los.

28 E Dio ia bondise los e ia dise a los: “Ta ce vos es fertil e crese e pleni la tera e doma lo. Ta ce vos governa supra la pexes de la mar, e la avias de la sielo, e tota animales sur la tera”. 29 E Dio ia dise: “Vide, me ia dona a vos tota plantas con semes sur la tera intera, e tota arbores cual dona frutas con semes; tota de los ta es comeda per vos. 30 E a tota animales sur la tera, e a tota avias de la sielo, e a tota viventes cual rampa sur la tera, a tota cual ave la respira de vive en se, me ia dona tota plantas verde como comeda”. E acel ia aveni tal. 31 E Dio ia vide tota cual El ia crea, e ia vide ce los es multe bon. Un sera e un matina ia aveni, cual ia es la dia ses.