La om de pan de jinjer
Traduida par Vicente Costalago
Coretida par Simon Davies
A un ves pasada, un fem vea e un om vea ia abita un casa vea.
A un dia, la fem vea ia deside cosini un cosa spesial: “Me va cosini un om de pan de jinjer.” – el ia dise.
Poi el ia prepara la om de pan de jinjer e ia pone lo en la forno per forni. Ma, pos alga tempo, el ia escuta un vose: “Lasa ce me sorti!”
La fem vea ia vade a la forno e ia abri la porte.
La om de pan de jinjer ia salta a estra! El ia core estra la casa e la du veas no ia pote segue el.
“Para! Nos vole come tu!”
Ma la om de pan de jinjer ia dise – “Core tan multe como vos pote, me no va para an si vos dise ‘per favore’.”
La om de pan de jinjer ia encontra un bove fema. “Para, om de pan de jinjer. Tu es multe invitante!” – la bove fema ia dise.
Ma la om de pan de jinjer ia core plu rapida. E el ia dise – “Core tan multe como tu pote, me no va para an si tu dise ‘per favore’.”
La bove fema ia core, ma el no ia pote catura la om de pan de jinjer.
En la via, el ia trova un cavalo, ci ia dise – “Para, om de pan de jinjer. Tu es multe invitante e me es fame!”
Ma la om de pan de jinjer ia core plu rapida.
La cavalo ia galopa, ma el no ia pote catura la om de pan de jinjer, ci ia comensa canta – “Core tan multe como tu pote, me no va para an si tu dise ‘per favore’.”
La om de pan de jinjer ia es multe contente e orgulosa. El ia trova un volpe.
“Para.” – la volpe ia dise. “Me vole parla con tu.”
Ma la om de pan de jinjer no ia para e ia canta – “Core tan multe como tu pote, me no va para an si tu dise ‘per favore’.”
La volpe ia segue la om de pan de jinjer tra la bosce.
La om de pan de jinjer ia ariva a un rio e el no ia sabe cua el va fa.
La volpe ia dise – “Si tu salta sur mea coda, me va porta tu a la otra riva. Tu va es seca e secur.”
Alora, la om de pan de jinjer ia salta sur la coda de la volpe, ci ia comensa nada.
Pos alga tempo, la volpe ia dise – “Tu pesa multe. Per favore, salta sur mea dorso.”
E la om de pan de jinjer ia fa lo.
La volpe ia dise – “Om de pan de jinjer, tu pesa multe. Per favore, salta sur mea nas.”
E la om de pan de jinjer ia salta sur la nas de la volpe.
Cuando los ia veni a la riva, la volpe ia lansa la om de pan de jinjer tra la aira e la volpe ia come el.