La musicistes de Bremen
Traduida par Vicente Costalago
Coretida par Simon Davies
Un asino ia es espulsada de sua casa par sua proprior, car el ia es multe vea e no ia pote labora tan multe como a ante. Triste, el ia deside vade a Bremen per deveni musiciste.
En sua via a la site, el ia trova un can abaiante multe triste.
“Cua ia aveni, mea ami?” – la asino ia demanda.
“Mea proprior ia espulsa me car el ia dise ce me es tro vea per garda la casa.”
“Veni con me a Bremen. Me va deveni musiciste ala.”
Ambos ia continua asta ce los ia trova un gato miauinte triste.
“Cua ia aveni, mea ami?” – la asino ia demanda.
“Mea proprior ia dise ce me es tro vea per xasa muses e el ia espulsa me de sua casa.”
“Veni con nos a Bremen.” – la can ia dise a el. “On va deveni musicistes.”
La tre animales ia continua sua pasea cuando los ia trova un gal cacarante triste.
“Cua ia aveni, mea ami?” – la asino ia demanda.
“Mea proprior ia dise ce me es tro vea e los ia vole cosini me.”
“Veni con nos a Bremen.” – la gato ia dise. “Nos va deveni musicistes e labora ala.”
La cuatro animales ia segue sua via asta cuando los ia ariva a un bosce. Lo ia es multe tarda e, en oscuria, los ia vide un casa con lus.
Los ia regarda tra la fenetra e ia vide cuatro furores sirca un table con un banceta. La animales ia deside asusta los. La can ia salta a sur la asino; la gato ia salta a sur la can e la gal ia vola a sur la gato. Los ia comensa cria multe forte.
Cuando la furores ia sorti de la casa e ia vide un silueta tan multe rara, los ia fuji.
La animales ia deside resta en acel casa.
