Roma antica - jeografia e istoria

Jeografia

La site Roma, situada en la media de la penisola italian en la rejion de Lazio, ia es la cuna de la sivilia roman e un de la sites la plu importante de la mundo antica.

Roma antica ia estende tra sete colinas sur un plano banida par la Rio Tiber. La site ia nase en un crusa de vias par cual rejiones variosa ia comunica, e cual ia es a 25 cilometres de la costa, e esta ia permete ce la romanes naviga la rio a su e vade a la mar, tra la porto de Ostia.

Si on situa Roma sur un scala global, on pote mostra ce en la mundo antica la site ia ave un situa jeografial e stratejial vantajosa. La penisola italian es situada en la sentro de la Mediteraneo, e esta ia permete ce la romanes asede teritorios diversa e controla fasil los.

La monarcia: la orijinas de Roma

La orijinas de Roma es confusada entre realia istorial e fantasia leteratural usada per alti la opina de la popla roman sur se. Alga istoristes roman importante, como Tito Livio, ia sperde lejendas sur la fundi de la site cual no ia coresponde con la fatos real.

La lejenda la plu sperdeda esplica ce Roma ia es fundida en la anio 753 AEC par Romulo e Remo, du frates jemelin desendente de la eroe troian Enea. Sua fio Ascanio ia fundi la rena Alba. Un de sua desendentes ia es Numitor, de ci sua frate Amulio ia saisi la trono. Rea Silvia, fia de Numitor, ia es dedicada a la culto de Vesta e obligada a asteni. Ma la dio Marte ia deveni enamada par Rea Silva, e de esta uni Romulo e Remo ia nase.

Seguente la nara, esta du frates de sangue real ia es abandonada en la Tiber afin los va rena nunca, ma los ia es salvada e tetida par un lupo fema e elevada par un pastor. Cuando, adultida, los ia descovre sua orijina nobil, los ia suverti la re e ia pone a la trono sua avo Numitor. Los ia fundi Roma en la loca do los ia es elevada. Seguente la tradision, Romulo ia deveni la re prima de la site, e Roma ia deveni un monarcia.

En la monarcia, Roma ia es governada par sete res, ci ia parteni a du dinastias: la latina (la cuatro primas) e la etrusca (la tre ultimas).

1. Romulo ia es la fundor de Roma. El ia uni la tribus latina e sabina. El ia formi la lejiones prima con 3000 infantriores e 300 cavalores en cada. Marte ia prende el en un tempesta e el ia deveni adorada como Cirino.
2. Numa Pompilio ia organiza la culto roman, ia crea la scolas pretal e ia comanda construi la templo de Jano, cual ia es abrida en tempo de gera e cluida en tempo de pas.
3. Tulio Hostilio ia organiza la armada, ia destrui la rena de Alba e ia converti Roma a la potia xef de Lazio.
4. Anco Marcio ia converti Roma a un sentro de intercambia comersial. El ia comanda construi la porto Ostia per promove comersia.
5. Tarcinio Prisco ia santi la templo a Jupiter, en la apico de la Capitolio. El ia comanda construi la Foro, la Cloaca Masima e la Sirco Masima per la juas popular. El ia introdui la relijio e arte etrusca en Roma.
6. Servio Tulio ia comanda construi un muron per proteje la site. Como reformiste sosial, el ia divide la popla en sete clases sosial, seguente sua ricia, per paia impostas.
7. Tarcinio la Superba ia asasina sua padre par sposi Servio Tulio con la aida de la fia de esta. El ia governa en modo despotin. Sua fio Tarcinio ia viole Lucretia, sposa de Colatino, sitadan roman importante, un ata cual ia orijina un asembla popular cual ia condena la Tarcinios a esclui. Como resulta de esta, e con la aida de la armada, la forma de governa ia es cambiada a un sistem republiciste.

Realia istorial

La lejenda no nara tota la atas istorial, car en realia Roma ia comensa formi en la sentenio 9 AEC, como resulta de la uni de poplas pastoral ci ia abita en Lazio. En la sentenio 6 AEC la romanes ia es concistada par la etruscas, ci ia veni de un rejion a norde de Lazio nomida Etruria. Los ia moderni Roma e ia alti lo.

En la anio 509, un revolta poplal ia fini la res etrusca e la governa republiciste ia es instituida en Roma.

Organiza political e sosial en la monarcia

La monarcia roman ia es aristocrata e political e no ia es multe diferente de la sites stato de la mundo antica, influeda par la elinicas en la periodo anticin.

La re ia es elejeda e ia ave multe potias: political, relijial, militar e sosial. Su el on ia trova la consilio de veas o Senato, probable formida par la xefes o “padres” de la familia fundinte de la site. La Senato ia consela a la re e la governa en la entrerenas (periodos entre la mori de un re e la eleje de la seguente). A fini, on ia ave un comitium (asembla de la popla), con alga funsionas legal e judal. Los ia eleje ance la re par proposa de la Senato.

En esta eda on ia ave un divide entre libres e sclavos:

• Entre la popla libre on ave du grupos sosial: la patrisios e la popla comun. La patrisios ia es desendentes de la padres fundinte de la site Roma e ia ave un posa superior. La popla comun ia orijina de la popla dominada par Roma en sua estende, o los ia es stranjeres e sua desendentes. Los no ia ave tan multe diretos como la patrisios.
• La sclavos en acel eda no ia es multe.

La Republica

Organiza political en la Republica

Pos cuando la re ultima ia es espulsada, un governa republiciste ia es instituida en Roma. Esta ia dura tra sinco sentenios (509–27 AEC). Lo ia es un eda de estende militar estra la penisola Italian, lutas sosial entre patrisios e la popla comun, e un reorganiza political profonda per ajusta a situas nova. La sistem political de la Republica ia es tal:

• La ofisiores alta roman, no como la elinicas, no ia es servores de la popla, ma representores de la potia de la Stato con autoria vera. Plu, la ofisias no ia es paiada, donce sola un minoria con ricia sufisinte ia pote asede los. Tal, an si la sistem ia pare un democratia, lo ia es un governa aristocrata. La sistem republiciste ia atenta ce nun pote ave tro multe potia per multe tempo, e donce la ofisias ia es elejable, colaborada (a la min du membros en cada) e tempal (la majoria de un anio). La ofisiores ia pote es superior (consul, censor e praetor) o inferior (aedilis e asta cuatrodes quaestores):
  • Consules ia fa la enscrive de la armada e ia fa la gera seguente la intendes de la Senato.
  • Censores ia ocupa sua ofisia a cada anio cuatro o sinco, e per des-oto menses. Los ia regula la corpo sitadan (census) e la Senato, e ia esclui de los la membros frodante.
  • Praetores: Los ia ave capasias judal. En la comensa de la anio, los ia debe publici un proclama (edictum perpetuum) cual ia institui un lista de diretos de proteje e regulas pertinente a erita e condenas.
  • Aediles: Los ia cura la site (cura urbis), la mercatos (cura annonae) e la juas (cura ludorum).
  • Quaestores: Los ia es encargada per la finansias de la provinses.
  • Tribunos de comunores: un titulo creada en 494 pos la revolta de la popla comun par sua manca de partisipa en la vive publica. Lo ia es ocupada sola par membros de la popla comun. Los ia pote presenta leges e veti desides judal cual ta dana la popla comun.
  • Vigintisexviri: Ses asosias diferente cual ia ocupa dudes-ses ofisias minor. La jovenes aristocrata ia ocupa un de esta postos ante deveni un quaestor.

La Senato o consilio de veas ia esiste en la monarcia e ia es mantenida. Lo ia es un instituida de carater conservaliste. La consules no ia adota metodos oposante la opina de la Senato. En sua comensa, la Senato ia es composada par 300 senatores, e en la anio 123 AEC ia pasa a 600; Julio Cesar ia crea un Senato de 900 membros, e Marco Antonio, de 1300. Un parte de la Senato ia es sitadanes ci ia es consul, praetor o aedilis. La Senato ia asembla en la Curia Julia, asemblada par un ofisior cual ia preside la reuni. La sesiones ia es publica e no ia aveni en dias fisada. La Senato ia es encargada per relatas esterna.

On ia ave du asemblas poplas: la Comitia Curiata (cual ia eleje la ofisiores la plu alta e ia vota per centurias o grupos de sitadanes seguente sua nivel de ricia) e la Comitia Tributa (cual ia eleje la ofisias inferior e ia vota seguente teritorios o tribus).

La estende de Roma en la Republica

La controla de la penisola italian

De la sentenio 5 AEC, la romanes ia comensa campanias militar e diplomata con la resta de la penisola italian con la ojeto de concista la poplas ci ia abita ala. Entre esta poplas on trova:

• La latinas, ci ia abita Lazio. Los ia es convertida en colonistes e ia envia omes a la armada.
• La samnitas, ci ia abita en la distritos montaniosa de la sentro de Italia. La romanes ia luta contra los en la gera samnita (343 a 290 AEC) e ia vinse los.
• La etruscas, ci ia vive en Italia norde. Atacada par la galos a norde e la romanes a sude, los ia es ajuntada a la Republica.
• Magna Elas, cual ia es la parte sude de la penisola italian. Cuando la site Tarento ia vide la avansa roman, lo ia contrata un armada de mersenarios gidada par Piro, la re de Epiro, ci ia vade con 25 000 soldatos e elefantes, e los ia destrui la lejiones roman. Piro ia es vinseda en Benevento (275 AEC) e ia retira se a sua pais.

La geras punica: la domina de la Mar Mediteraneo ueste

En 264 AEC, Roma ia controla la penisola italian, ma ante deveni potiosa lo ia debe domina la Mar Mediteraneo. Con esta ojeto Roma ia debe concista Cartago, un colonia punica en Africa norde, oji Tunis. La cartaganes ia construi un impero en la Mediteraneo ueste, e Roma, determinada per ave no competores, ia deside elimina lo. Lo ia oteni esta pos la geras punica entre 264 AEC e 146 AEC. Estas ia es tre disputas:

• Gera punica prima, entre 264 AEC e 241 AEC. La romanes ia concista Sisilia, un isola importante par sua produi de trigo.
• Gera punica du, entre 218 e 201 AEC. La site Sagunto, aliada de Roma, ia es atacada par Hannibal, ci ia vinse lo en 218 AEC. Per combate Hannibal, la romanes ia envia un armada gidada par la frates Scipion. Hannibal, ci ia vinse la romanes a Cannae (216 AEC), ia ariva a la portones de Roma. An tal, la romanes ia vinse el en Zama (202 AEC). Pos esta gera, la romanes ia domina la plu de la Mediteraneo ueste incluinte cuasi tota la penisola iberian.
• Gera punica tre (146 AEC). Masinisa, re de Numidia, ia porta la cartaganes a un gera defendente. Esta escusa ia fa ce Roma interveni, acusante Cartago de no respeta la trata de 201 AEC, cual ia proibi cualce ata militar par Cartago. La site ia es destruida e la menasa punica ia fini.

En esta mesma tempo, Roma ia es atraeda par la Mediteraneo este. Lo ia vinse la res eliniste de Macedonia (197 AEC) e de Suria (190 AEC), ma lo ia asteni de domina direta per sincodes anios. A fini, lo ia ajunta Macedonia a sua sistem de provinses. En 133 AEC, la rea Atalo de Pergamo ia lasa sua rena como erita a la romanes, e lo ia deveni la provinse de Asia.

En 31 AEC, la Republica Roman, cual pico a ante ia concista ja Galia, ia deveni la potia mediteranean la plu importante de Anticia.

Fatiga de la model republiciste

La concista republiciste ia favore la potiosas, la patrisios, ci ia cumula estendes enorme de tera e ia rici comersiante; an tal, la plu desfavoredas ia povri plu. En esta ambiente la frates Graco ia apare. Los ia vole fini nonegalias.

Tiberio Graco, elejeda como tribuno de la popla comun (133 AEC), ia aproba la leje cultival, cual ia limita a 125 ectares la pesos individua, en cuando la otra parte ia debe es donada a la povres. La nobiles ia oposa, ia prepara un rebela contra Tiberio, e ia asasina el en la Capitolio.

Sua frate Caio ia es elejeda como tribuno pos des plu anios, en 123 AEC. El ia fa ce on aproba la leje frumentaria, cual ia obliga ce on distribui trigo a custa basa. El ia vole dona sitadania a tota la poplas italian. La Senato ia es denova ansiosa e ia promove un rebela contra el, par cual el ia mori. Pos la frates Graco, jenerales famosa par sua atas militar ia apare, ci ia vole asede potia political. La geras interna ia dura tra tota la sentenio 1 AEC.

Truple prima

Entre la anios 59 e 43 AEC, Roma ia ave un governa nomida “truple”. La sistem ia vole uni en un sola governa la jenerales la plu prestijiosa, per evita geras interna. An tal, la du truples ia fini con geras. La truple prima (59–52 AEC) ia es formida par Julio Cesar, Pompeio e Craso.

• Pompeio (106–48 AEC) ia es conoseda per vinse la rebela de Sertorio en Hispania e ance la rebela de sclavos gidada par Spartaco (73–71 AEC).
• Marco Licinio Craso ia es conoseda car el ia vinse la sclavos de Spartaco. El ia mori en la gera contra la partianes en 53 AEC.
• Julio Cesar ia es famosa en la popla comun e ia es un militar eselente.

Truple du

Pos la mori de Julio Cesar, un truple du ia es formida en 43 AEC par Otavio, Marco Antonio e Lepido. Estas ia divide potia en esta modo:

• Africa ia es donada a Lepido, ma el ia retira se a vive privata.
• Marco Antonio ia oteni la Este e Egipte, do el ia conose Cleopatra e ia sposi el.
• Otavio ia governa la Ueste, cual ia inclui Hispania e Africa norde.

Pos pasi Roma, Otavio ia vade a Egipte e ia acusa Marco Antonio de es un trador. En la batalia de Actio (31 AEC) el ia vinse Marco Antonio, ci ia suiside en Alexandria. Cleopatra ia atenta sedui Otavio ma no ia susede, donce ela ia suiside ance. En 29 AEC, Otavio ia entra en Roma como vinsor e ia prende tota potias de la Stato como imperor. Tal la Republica ia fini e la Impero ia comensa.

La Impero: brilia e declina de Roma

La organiza political de la Impero

An si la Impero ia cambia tra la tempo, on pote nota alga cualias jeneral. La titulo de imperor ia es per tota vive, e la imperor ia deside ci va segue el. Plu, el ia ave tota potias, ia governa con omes elejeda par el mesma, e ia suporta se en la fortia de la armada.

La instituidas republiciste ia es mantenida, ma sua potia ia redui pico e pico.

En la sentenios 1 e 2 EC, un eda nomida la Impero Alta, la sivilia roman ia vive en la fase la plu briliante de sua istoria. Tempos nova ia trae pas e comersia, par mar o par la vias de la Impero. La dominas roman ia crese e ia ateni sua estende masima.

La imperores de la Impero Alta

Augusto ia entra vinsal en Roma en 29 EC. El ia rena respetante la interesas de la clase media e la popla. El ia manteni la Senato e la asemblas. Entre sua reformis la plu importante on nota:

• Reformi de la armada. La armada ia deveni profesal, con 300 000 omes e 28 lejiones. La servi militar ia dura tra des-ses anios e la soldatos ia reseta un salario.
• Reformi de maneja. La provinses ia es divideda en du tipos: senatoral, teras pasida; e imperal, controlada direta par Augusto, do on ia ave soldatos.
• Obras publica en Roma. El ia comanda la construi de la Altar de Pas en la Campo de Marte, per simboli la ricia de Roma en la pax romana entre otras.
• Renovi cultural. On ia ave poesistes e istoristes nova, protejeda par Mecena, prosima a la imperor: Verjilio, Tito Livio, Salustio.

Dinastia julio-claudian

Tiberio (14–37) ia recambia Augusto. El ia es un jeneral susedosa e un manejor bon, ci ia forti la fronteras de la Impero. En sua rena la garda pretorian ia deveni importante.

Caligula (41–54) ia es sobrin de Tiberio. El ia aboli la imposta a la sal e ia promove spetaculos popular, ma ia deveni un tirano. La garda pretorian ia asasina el en 41.

Claudio (41–54) ia governa asta cuando sua sposa cuatro, Agripina, ia veneni el per securi la trono per sua fio Neron (54–68). Claudio ia concista Britania en 43.

Neron, pos asasina sua madre e sua sposa, ia persegue la cristianes e ia culpa los per la focon de Roma de 64. La lejiones ia revolta contra sua atas vil, e el ia suiside. La Senato ia obliga sutrae sua recorda de tota partes.

Dinastia flavia

En 64, la gera interna ia reveni a Roma. En esta tempo nomida la anio de la cuatro imperores, la vinsor Vespasiano (69–79) ia controla la rebelas en la este, ia boni la economia e ia enscrive senatores de la provinses ueste. Pos un rena corta par Tito (79–81), Domitiano ia institui un governa de teror (81–96) asta cuando el ia es asasinada.

Dinastia antoninan

Nerva (96–98) ia comensa la dinastia de la Antoninos, continuada par sua fio adotada, Trajano. Trajano (98–117) ia es un de la imperores la plu estimada per sua concistas (Dacia, Arabia, Hayastan e Partia), sua bon judi, sua capasias manejal e sua umania. El ia es preocupada per la povres.

Estende masima de la Impero Roman, su la imperor Trajano en la anio 117 EC.

Sua cusin Hadriano (117–138), viajor e om de cultur, ia maneja eselente la Impero e ia crea un rede de vias militar cual ia permete ce la soldatos marxa plu rapida asta la fronteras. Sua muron ia estende tra 117 cilometres en la norde de England.

Sua seguor, Antonino Pio (138–161) ia ave un rena multe pasosa, ma esta ia crea problemes a sua seguor Marco Aurelio (161–180), ci ia debe luta contra la germanicas. Pos multe vinses el ia lasa sua Impero a sua fio Comodo (180–192), un imperor ci no ia es interesada par economia e ia pasa sua vive en la amfiteatro e la juas.

Roma ia ave un periodo con manca de gida cual ia provoca un colasa de sua instituidas political, un debili de la armada e un nonstablia economial. Pos la mori de Comodo, en 182 on ia ave un gera interna nova.

Dinastia severan

De 193 a 253, Roma ia es governada par la dinastia severan, cual ia defende la fronteras. La potia imperal ia depende sempre plu de la armada. De 235 a 284, Roma ia sembla un anarcia militar en cual la soldatos ia nomi imperores nova, ci ia rena per periodos multe corta. Comersia ia deveni perilosa e mone ia perde sua valua.

Sosia en la eda republiciste e la Impero Alta

En la Republica, la popla comun ia ateni egalia de diretos. La estende teritorial de Roma ia integra teritorios e poplas nova. Esta ia orijina un divide sosial nova:

• La omes libre ia pote es sitadanes o no sitadanes. La sitadanes ia es sola la desendentes de patrisios e la popla comun de la site de Roma, e ance individuas de la Impero ci ia oteni sitadania.
  • Sitadania ia es donada en modo sola individua o a un popla, como premio, e, jeneral, a cualce nonsitadan ci ia vade a la armada. Con lo, la person ia oteni diretos sivil e political. Entre la sitadanes on trova un minoria favoreda e rica, divideda en tre ordinas: senatoral, cavaloral e decurional (membros de la senatos munisipal).
  • La nonsitadanes ia ave diretos sivil (car los ia es omes libre) ma no political. Los no ia pote vota en asemblas e no ia pote ave ofisias publica. En 212 esta difere ia desapare, car la imperor Caracala ia dona sitadania roman a tota la omes libre de la Impero.
• La sclavos ia es la propria de sua propriores. La sclavos librida ia ocupa un loca entre sclavia e libria, car los ia oteni sua libria pos es en sclavia. Los ia es libre, ma sua proprior vea ia pote esije alga cosas.

La Impero Basa

La sentenios 2 e 5 es un periodo de crise nomida la Impero Basa. A fini de la sentenio 3, la imperor Diocletiano ia atenta reformi la Impero, dividente lo en du: Ueste e Este, e ia crea un sistem de governa compartida, nomida tetrarcia, en cual du imperores en la Ueste e du en la Este ia governa simultan. Con esta mesura el ia vole garantia la defende la fronteras.

El ia fa la proclama de custas, fisante custas masima de 1300 produidas en la Impero. Tal, el ia reinstitui la valua de mone e ia controla la infla. La sistem ia colasa cuando Diocletiano ia retira a sua tera (oji en Corvatsca). Constantino, pos vinse sua competores, ia governa. El ia esecuta la Proclama de Milano (313), cual ia institui tolera relijial. El ia vole construi un Roma nova en Bizantio.

Teodosio 1

El ia es la governor ultima de la Impero Roman. Con la Proclama de Tesalonici, en 380, cristianisme ia deveni la relijio ofisial de la Impero. Pos sua mori, la este ia es donada a sua fio Arcadio e la ueste a sua fio Honorio. Esta ia es la divide final de la Impero. En cuando la este ia resta stable tra mil plu anios, la parte ueste ia comensa frati e declina economial par la debilia de la imperores e la presa esterna de la germanicas. La crise ia esplode en 476, e la Impero Roman Ueste ia cade cuando la imperor Romulo Augustulo ia es recambiada par la re goto Odoacro.