Elas antica - jeografia e istoria
Jeografia
Elas en la eda anticin.
Elas es situada en la estrema sude de la penisola balcan e la penisola Peloponeso. La rejion jeografial cual la elinicas ia ocupa pote es divideda en cuatro partes:
- Elas continental: formida par Macedonia, Tesalia, Focida, Beotia, Atica e Peloponeso.
- Elas isolal: formida par la isolas de la Mar Ejeo.
- Elas asian: Eolia e Ionia, con Troia, Focea e sites como Mileto, Efeso e Halicarnaso.
- Elas colonial: de la Ponto Euxino (Mar Negra) asta Marseille, Ampuries e Roses, pasante tra Italia sude (Napoli), Sisilia, Corse, Xciperia e Cirenaica (Libia).
La elinicas prima e Elas anticin
Sivilias minoan e misenean
Palasio de Cnosos, de la sivilia minoan.
Porton de Leon en Misene, de la sivilia misenean.
La orijinas de la cultur elinica es en Criti, do un cultur grande ia developa: la sivilia minoan (2500–1600 AEC). Esta sivilia ia deveni rica par sua comersia e domina de la mar. Lo ia conose scrive (sistem silabal linial A) e ia construi palasios, como lo de Cnosos.
En la anio 1600 AEC, la aceanes, avansante de Europa sentral, ia ariva a la rejion elinica e ia developa la cultur misenean (1600–1100 AEC). La miseneanes ia organiza renas peti, de cual cada ia es governada par un re con potias asoluta. Los ia conose la armas de bronze e la caros de gera. Los ia concista Troia en la anio 1250 AEC. Los ia aprende la sistem de scrive (sistem silabal linial B) e ia parla un dialeto anticin cual ia deveni la elinica clasica. On nota la sites de Tirinto e Misene.
La eda oscur (1100–800 AEC)
Entre 1200 e 1100 AEC, la sentros misenean ia es ardeda e destruida par la invade dorian. La conose de fero ia aida los. La invade dorian ia comensa un periodo nomida la eda elinica media o la eda oscur: la usa de scrive ia desapare e la fontes de sabe ia diminui. En esta eda la aceanes ia migra a la isolas e costas de Anatolia.
La eda anticin (800–500 AEC)
La eda anticin ia es un eda de crises political e sosial importante, en cual la strutur de la sites (o “polis”) ia forti.
La crese demografial, la manca de tera e povria de la popla (xef campanianes) ia fa ce alga polis ia fundi colonias en otra locas, prosima a la Mar Negra e en la Mediteraneo.
La apare de la mone, en la anio 600 AEC, ia fasili ativia comersial e ia fa ce un clase nova apare: la comersiores e artisanes. Estas, con la campanianes, ia promove lutas sosial contra la aristocratia ci ia governa los. Esta lutas ia suposa un perde progresiste de diretos e potia en la clases favoreda. Du figures political ia es creada:
- La legor: La person con potias ci ia arbitra en la lutas sosial. La plu famosas ia es Dracon e Solon de Atena.
- La tirano: Cuando la reformis legal no ia pote solve un crise, tiranias ia sustitui per la governa oligarcial. La tirano ia fini la potia de la nobiles, ia divide la teras e ia propulsa la economia e cultur de sua polis. Un tirano conoseda ia es Pisistrato de Atina.
En la eda anticin on vide un renase cultural:
- Reapare de scrive, plu simple ca la anterior: la scrive alfabetal.
- On ia construi templos, e sculta ia estende con la kouroi e korai tipal, scultas rijida.
- Poesia epica e lirica ia apare. Ance filosofia.
- La juas olimpial ia es selebrada a la ves prima (776 AEC).
En la fini de esta eda, du polis ia comensa es plu importante ca la otras: Atina (en la rejion de Atica) e Sparta (en la Peloponeso). Sparta ia concista la teritorio de la mesenios en la sentenio 7 AEC, ci los ia sclavi (ilotes).
En Atina, Clistene ia redui la potia de la aristocratas.
Elas clasica (500–336 AEC)
La geras medica
La sites elinica de Ionia (Anatolia) ia revolta contra la domina persian e ia demanda per aida de la elinicas de la otra lado de la Mar Ejeo. Esta ia es la comensa de la tre Geras Persian:
- La Gera Persian Prima (492–490 AEC). La atinanes, dirijeda par la jeneral Miltiade, ia repulsa la ataca par la re Dario a Maraton.
- Gera Persian Du (480–478 AEC). En Termopilas, la re Leonida e tresento spartanes ia fali en sua atenta de para la persianes (gidada par Xerxes) ci ia entra en Atica, ia saca Atina e ia destrui la construidas de la Acropoli. An tal, la marina elinica ia vinse la persianes en la batalia de Salamina, par causa de la stratejia de la jeneral atinan Temistocle.
- Gera Persian Tre (468–449 AEC). Cimeron ia vinse la persianes a la rio Eurimedonte. A fini, un trata de pas ia es suscriveda.
La ejemonia de Atena
La Alia de Delos
Con la ojeto de defende contra atacas persian futur, Atina ia crea en 477 la Alia de Delos (alia militar de polis elinica). En un pico de tempo, esta alia ia muta a un impero beneficante la interesas atinan, car los ia obliga otra polis a junta con la Alia e ia promove democratia.
La imperalisme atinan ia dona securia maral e unia entre la elinicas de la Mar Ejeo (unia judal, political, cultural lingual, etc), ma ia supresa ance la autonomia de sua alias e ia luta contra interesas spartan.
La governa de Pericle
La vinse elinica contra la persianes ia forti un opina razonal de umanas, fortinte la sistem democrata atinan contra la sivilia teocrata de Asia sude-ueste. En la governa de Pericle (443–429 AEC), Atina ia deveni un potia political, economial e cultural, e par esta causa la sentenio 5 AEC es nomida “la sentenio de Pericle”.
Pericle ia introdui reformis constitual par cual la popla ia ave plu encarga en la asembla e la judores popular. Tal, Atena ia forti sua democratia e, par causa de sua potia maral, lo ia mateni sua supremia supra tota Elas.
Per manteni sua vantajes sosial e economial, la sitadanes (sola 20% de la popla, pd. min ca 40 000 persones) ia pone lejes per restrinje la asede a sitadania de los ci no ia es sitadanes (metecos – vide a su: stranjeres, sclavos).
La ejemonia de Sparta e Geras de Peloponeso
La fronti entre la Alia de Delos (Atina e sua alias) e la Alia de Peloponeso (Sparta e sua alias), nomida la Geras de Peloponeso, ia es la plu longa e cruel cual la elinicas ia sufri.
La causas de esta geras ia es:
- Political: Per esemplo, Atina e Sparta ia ave programes political oposante. Atina ia favore democratia e imperalisme supra la membros de la Alia de Delos, ma Sparta ia favore propriores de tera aristocrata e ia respeta la autonomia de la aliadas.
- Economial: Compete comersial entre Atena e sua du rivales: Corinto e Megara, aliadas de Sparta.
On ia ave tre periodos de geras:
- Periodo prima (431–421 AEC): Gera Arcidamica. La spartanes, con la re Arcidamo gidante los, ia invade Atica. La abitores de la rejion ia refuja se en Atina, do un epidemia ia aveni. Pericle ia mori par esta.
- Periodo du (415–412 AEC): Mision a Sisilia. En la anio 415 AEC la atinanes ia atenta concista Sisilia, con la intende de ataca Sparta par du frontes. La mision ia fali.
- Periodo tre (404 AEC): Gera de Decelia. Con la aida economial de Persia, Sparta ia vinse final Atina en la batalia maral de Egospotamo (404 AEC). Atina ia debe destrui un parte de sua murones, dona tota sua barcones, permete la reveni de escluidas enemin de democratia, aboli la Alia de Delos e formi un parte de la Alia de Peloponeso. Sparta ia pone sua ejemonia supra tota la elinicas e ia institui governas oligarcial.
Ejemonia de Tebas
En Atina e otra sites on ia ave revoltas antispartan. La Alia Beotian, gidada par Tebas e dirijeda par Pelopida e Epaminonda, ia vinse la spartanes en la batalia de Leuctra (371 AEC).
La ejemonia de Tebas ia desapare con la mori de Epaminonda en la batalia de Mantinea (362 AEC). Atina ia recovre, ma la elinicas ia es vinseda par la macedonsces.
La sosia en Elas clasica
En la sentenios 5 e 4 AEC, Elas clasica ia es un mosaica de sites-statos autonom (on nomi cada un poli), con sua propre strutures sosial, ma con un divide xef entre omes libre e sclavos.
La femes ia ave la loca du en sosia.
Atena e Sparta ia es la du polis en Elas clasica cual ia ave un rol istorial plu importante, an si cada ia developa un model diferente de organiza sosial e political.
Sosia atinan
Atina ia es un democratia e sua popla libre ia es composada par du categorias:
- Sitadanes: Categoria superior, formida par un minoria de omes con plu ca dudes anios, de padre e madre atinan. Los ia ave tota diretos sivil e los ia es la solas con diretos political. An tal, sua ricia ia pote varia multe.
- La metecos ia es stranjeres ci ia abita en Atina. Sua diretos sivil ia es limitada, e los ia ave no diretos political. Los ia es comersiores e artisanes.
- La sclavos ia es plu ca la dui de la popla en la sentenio 5 AEC. Los ia ave no diretos. La state de sclavo ia es eritada o ia es otenida par causas variosa, como deveni un prisonida de gera.
La sclavos ia fa tota tipos de laboras: en la casa, artisania, minas, campo, comersia, armada e marina. Sua states de vive ia depende de sua propriores e de sua laboras.
Sosia spartan
Sparta ia es un stato militariste cual ia regula la vive de sua abitores. Sua organiza sosial e political ia muta pico de la eda anticin e ia es sentrida en sua armada.
On ia ave tre categorias sosial, simil a la sitadanes, metecos e sclavos de la atinanes:
- La spartiatas, un caste geror. Los ia es sitadanes libre con tota diretos, desendentes de spartanes, e ia nomi se homoioi (egales) car tota persones ia es egal ante la lege. Los ia posese teras, laborada par la ilotes, ma sua ativia xef ia es gera e politica. De la eda de sete anios, la spartiatas ia reseta un instrui multe sever, donada par la Stato, per converti los a soldatos bon, continuante asta cuando los ia ave dudes anios. A pos, los ia entra en la armada e asta sua anio tredes ia vive e come con sua acompaniores. Sola de esta eda los ia pote ave un familia e es politicistes, an si los ia es en la armada asta sua anio sesdes.
- Periecos ia es omes libre ci ia abita en vilas prosima a Sparta. Los ia ave sua propre diretos sivil ma no la mesmas como la spartiatas. An si en tempo de gera los ia servi la armada, sua ativia xef ia es en cultiva, industria, comersia e artisania. Esta ativias ia es proibida a la spartiatas.
- La ilotes ia es la sclavos, desendentes de poplas vinseda, e ia ave no diretos. Los ia es la propria de la Stato, cual ia dona los a la spartiatas per labora sua teras. Los ia pote es asiniada a la armada. Los ia vive en miseria e, car los ia es desuple plu cuantiosa ca la spartiatas, los ia provoca multe revoltas.
Organiza political en Elas clasica
La polis
La elinicas en Anticia ia refere con la terma poli a tre consetas diferente, an si los es liada entre se:
- Un teritorio constituida par un site xef con campos e viletas prosima e dependente de la site xef.
- Un unia political nondependente; par causa de esta la terma es traduida como “site-stato”.
- La colie de sitadanes ci ia parteni a la mesma corpo sosial. La poli ia es un crea orijinal de la elinicas, cual ia emerje de la sentenio 8 AEC.
Elas, en la eda de Alexandro la Grande, no ia es un stato unida ma un colie de polis nondependente, frecuente enemis entre se. An tal, los ia manteni la consensia de parteni a un sivilia comun cual ia comparti lingua e relijio.
La plu de polis ia comensa como monarcias, e, pos esperimenta con formas political variosa, ia crea ultima formas de governa plu o min democrata. Sua nondepende political ia fini a la concista par Alexandro la Grande en la sentenio 4 AEC.
En la eda clasica, cuasi tota la polis ia ave instituidas political simil, an si sua nom, composa e atribuis ia cambia:
- Un asembla, en cual sola la sitadanes ia partisipa.
- Un consilio, formida par un cuantia limitada de sitadanes.
- Ofisiores, ci ia esecuta la desides de la Asembla e de la Consilio.
Elas posclasica
Alexandro la Grande
Profitante de la Geras de Peloponeso, Filipo 2 de Macedonia ia converti sua rena a la potia nova de Elas. La batalia de Ceronea (338 AEC) ia permete el a ajunta Atina e Tebas. Sua fio Alexandro (356–323 AEC) ia forti la model macedonsce.
Alexandro la Grande ia es educada par Aristotele. El ia leje Homero, la poesistes lirica e la autores dramal. Tal, Alexandro ia oteni la cultur clasica cual ia cambia el a un elinica model. Sua madre ia convinse el ce el ia desende de Heracle par sua padre e de Acile par ela.
Cuando el ia ave 18 anios, el ia partisipa en la batalia de Ceronea e ia destrui la tebanes gidante la cavalores macedonsce. Pos la mori de Filipo (336 AEC) el ia susede sua padre cuando el ia ave dudes anios. Tebas e Atina ia pensa ce los pote libri se de la macedonsces par causa de la eda de Alexandro, e los ia revolta cuando el ia es lutante contra la barbares de la norde.
Ma Alexandro ia aseja Tebas e ia destrui la site (335 AEC). Esta vinse ia para la atentas de revolta par otra sites elinica.
La batalia de Granico (334 AEC) ia abri per el la portes de Anatolia. Tra Capadocia, el ia desende a Cilicia e ia destrui la persianes en Iso (333 AEC). Egipte ia bonveni el como libror e ia sede a el onoras divin. Cuando el ia ariva a la oasises de Amon, la pretes ia confirma a el sua orijina divin.
Estende de la impero macedonsce
En la mesma anio, 332 AEC, el ia fundi Alexandria, ma pos un plu anio el ia abandona Egipte. La vinse de Gaugamela (331 AEC) ia dona a el la controla de Babilonia, Susa e Persepoli, sites cual el ia arde per venja la destrui de la acropoli par la persianes a 150 anios a ante. Alexandro ia nesesa du plu anios per fini la resiste persian.
En Asia sentral, el ia dirije se a la rio Iaxarte e ia fundi un otra Alexandria (Alexandria Escate). La concista de la rejiones Bactria e Sogdiana (329–327) ia es difisil e Alexandro ia supresa cruel la revolta (sirca 10 000 moris). Prosima a la rio Hifasi sua armada ia revolta e el ia debe reveni.
An con la perdes de la viaja, la armada de Alexandro ia reveni a Susa (324 AEC), do el ia sposi la fia de Dario e ia comanda sposis miscada entre sua jenerales e femes de la poplas concistada. Esta politica de asorbe ia fa ce el perde la fida de multe macedonsces.
En 323 AEC el ia maladi en Babilonia e ia mori pos alga menses.
Estende masima de la Impero de Alexandro la Grande.
Elenisme (323-330 AEC)
Alexandro no ia organiza sua susedor. Sua potia ia pasa a sua jenerales ci ia atenta manteni la uni de la impero.
En 175 AEC la dominas de Alexandro ia deveni renas separada. Tota sua jenerales ia mori e la divide ia es tal:
- Ptolomeo 2 ia controla Egipte, alga isolas de la Ejeo e la sude de Suria.
- Antioco 1 ia constitui un rena con la provinses de la impero persian antica.
- Antigono ia controla Macedonia e Elas.
Pos alga plu anios, la rena de Pergamo ia es constituida con Atalo 1.
En Epiro la rena ultima ia es creada, cual ia ave sua apico con Piro.
A fini de la sentenio 1 AEC, Roma ia comensa concista la Balcanes e la Ejeo. A comensa de la sentenio 2 AEC, la rena de Macedonia ia depende de Roma. En 188, Roma ia ajunta la plu de la teras de la seleucanes de Anatolia. La rena de Pergamo ia es donada como erita a la romanes par Atalo 2, en 133 AEC. En 148, Elas ia es concistada par Roma, cual ia domina lo tra multe sentenios.