Simon Davies | Re: DDJ 59 & 60

• Autor: Simon Davies (“simon.franova”)
• Tema: Re: DDJ 59 & 60
• Data: 2011-08-10 19:34
• Mesaje: 3478 (a supra, presedente, seguente)

Alo denova, Jim.

> Per governa persones e aida sielo,

Acel es un usa eselente de "per".

Me suposa ce tu evita dise "servi sielo" car esta ta
sinifia "dona la sielo como un servi". Ma "servi a
sielo" ta es posible per la sinifia intendeda, si tu
no gusta multe la tradui par "aida".

> Ave no cada come frugalia,

Op!
cada > cosa
come > como

> un promete a tempo

O "un promete rapida" o "un promete puntual".

> on sabe no limitas

Esta distingui ia catura denova tu. "Conose" asi.

> Ci sabe no limitas pote reteni la pais.

Inisial, me ia malcomprende esta como "ci sabe ce
no limitas pote reteni la pais?" Me sujesta ajunta
"el" - o ante "ci", o ante "pote". Si tu ajunta el
ante "pote", alora ajunta ance un virgula.

E denova en la linia seguente.

> (o sole teni?)

Me sujesta "conteni".

> Dise ce esta ave radises profonda e firma
> En un vista durante de Dau.

Multe bela traduida!

> un pex poca

"un pex peti". (En fato, "poca" ia es la parola
orijinal per "small", e ance per "few" - como oji -
ma car la du sinifias ia causa confusas, "peti" ia
es ajuntada a la lingua ante sirca tre anios.)

> No sola los no es potios,

Esta pare sinifia ce "los" no es la solas ci es
potios, car "sola los no es potios" ta sinifia serta
ce tota otras ES potios.

Me pensa ce la ordina strana de la parolas engles
confusa alga. En fato, la frase sinifia "they are
not only not powerful", e on pote elefeni esta como
"los es no sola nonpotios" sin problem.

Si tu prefere, tu ta pote dise "voles enemi ave no
potia" o "... es sin potia", e alora "los ave no
sola no potia" o "los es no sola sin potia".

> No sola los no feri otras,
> Ance sajas fa no cosa cual feri.

Esta es alga strana en engles, car on no pote
comprende la linia prima ante leje la linia du. Sin
la linia du, on suposa ce la linia prima parla
ancora de la mesma "los".

Per claria, me sujesta comensa la linia prima con
"Simil," (como un tradui de "likewise"), e reversa
la ordina de "los" e "sajas":

Simil, sajas no sola no feri otras,
Ma los fa no cosa cual feri.

Si tu trova ce "no sola no feri" es alga torpe, tu
pote dise "sajas no feri otras / e plu, los ..."

> Par causa ce

Esta es serta posible, ma considera ance "car".

Bon labora!

Simon