Pronunsia de gangster

Xercan pronunsia gangster como /gaŋgster/, ma esta pare multe difisil sin la ajunta de un xva entre alga de la cuatro consonantes. Cisa /gaŋster/ ta es un pronunsia plu bon? En engles, lo es /ɡæŋstə/.

Cisa ng es jeneral /ŋ/ en loca de /ŋg/ no sola a la fini de parolas, ma ance ante otra consonantes? A la otra lado, England /eŋgland/ coresponde a la pronunsia engles: /ɪŋɡlənd/ – ma ance esta pronunsia no es fasil per nonengleses. — Cris 2020/10/16 20:07

• England es serta /eŋgland/. /eŋ/ es fasil, e nos ave multe otra silabas cual comensa con /gla-/, donce /eŋgland/ debe es ance fasil.
  • Vera – ngl e ngr aveni en multe parolas, e me acorda ce la G serta es pronunsiada en tal casos: anglican, Bangladex, bangra, congresa, dongle, engrana etc. — Cris 2020/10/17 15:31
• Gangster es la problem: clar lo debe es /gaŋster/, e nos ta pote spesifa esta par un campo pronunsia. Un otra posible es cambia la spele a ganster, de cual sua pronunsia ta es alora coerente. — Simon 2020/10/16 20:31
• Tua comenta sur /gla-/ aida me trova la solve: GL a GR es permeteda a la comensa de silabas, ma G segueda par otra consonantes no es. Donce, en la caso de NG segueda par otra consonantes (ca L and R), la /ŋ/ fini la silaba prima e la consonante(s) seguente comensa la silaba du – ma la G entre los debe es silente, car lo no cabe en la strutur fonotatical de o la un o la otra silaba.
• Cisa tu pote ajunta un regula a Xercan per cambia /ŋg/ a /ŋ/ en tal casos? Lo va coreti la pronunsia de sinco parolas: cungfu, fengxui, gangster, springboc, xangtxi. (Lo ance va aida con alga nomes propre jonguo: Guangdong, Hongkong, Kongzi, Mar Huanghai, Rio Huanghe – ma esta es min importante car tal nomes no debe coresponde a la regulas fonetical de elefen).
• Si nos vole es multe coreta, nos pote cambia ance la testo de la gramatica: “NG final, como en bumerang, ave ance esta sona” → “A la fini de silabas, como en bumerang e gangster, NG ave ance esta sona”. — Cris 2020/10/17 15:31

Me acorda ce nos debe cambia la regula en la gramatica como tu dise en tua punto final, e alora Xercan pote segue acel regula. (Suspira… me va debe programi tota la regulas fonotatical.) Ma no oji. Me veni de spende tre dias intera asemblante un revista bilingual per esperantistes, e si me no reposa, probable me va esplode ☺) — Simon 2020/10/17 15:57

• Considera no esplode car esta va fini mea “comersia” intera :) — Marc 2020/10/17 17:54
• Tu pote comensa un serie nova: “Un elefeniste esplodeda”… A tema de esplodes, me veni de escuta tua leje eselente de la article sur bricabrac colidente en spasio. Tu ia reordina “o destrui an” a “o an destrui” – e me pensa ce esta es un boni. En fato, me ia scrive orijinal “o an destrui”, ma ia deside cambia lo per alga razona cuando me ia releje la testo ante publici lo. An es sempre un averbo, donce on ave plu libria en loca lo en la frase. — Simon 2020/10/17 18:18
• O. Me vide. Me ia teme ce lo va es persepida como “…an un otra veculo spasial”. — Marc 2020/10/17 18:29
• Si, e acel es perce me acorda aora con “an destrui”. — Simon 2020/10/17 18:38

Fortunosa, me vide ce me no nesesa ajunta tota la regulas fonotatical a Xercan. Lo nesesa sabe sola ce NG es /ŋ/ ante cualce consonante otra ca L o R. Fasil. Donce fada. — Simon 2020/10/17 19:20

Bon, me ia ajusta la regula. Lo dise aora “a la fini de un silaba” e ofre la esemplo gangster en tota la gramaticas – estra rusce, do la presenta es completa diferente per alga razona. — Simon 2020/10/18 07:58

• Eselente! — Cris 2020/10/18 18:33

Me nota en pasa ce, en la gramatica deutx, longa, ance, bumerang, gangster e (denova) longa es presentada sin leteras spesa e (en alga casos) entre sinias de sita. Probable los debe es simple en leteras spesa, como la otra esemplos, ma me no ia cambia esta, per caso ce Cris ave un sistem cual me no persepi. — Simon 2020/10/18 07:58

• Esta no ia es un cambia intendeda e me veni de coreta lo. Grasias. — Cris 2020/10/18 18:33