Preverbal presente

• La problemes levada par la omete de “la” ante un nom verbal ta desapare si la serie “ia, va, ta” ta inclui un averbo per indica la tempo presente. Usante acaso “ra” (un corti de “aora”), nos ta ave “me vole ra es forte”, “alga ra vade a via”, “multe ra veni de Noria”, etc. Simon
  • me ia introdui esta idea multe anios a ante. si, esta ta elimina completa la problemes. me ia sujeste “i”, como en bislama. me ta prefere “es”. lo es usada en alga creol (me oblida cual). en papiamento, on usa “ta” per la presente (de “esta” = es) con la infinitivo (e con la verbo ajetivin). donce, “alga es vade a via”, “multe es veni de Noria”, etc. natural, lo no opera bela con “me vole es es forte”! ma esta idea es un major cambia de la lingua a esta ora, e sutrae alga de la “naturalia romanica” de lfn. posible usa “es -nte” per clari? posible, inserta “aora” o otra averbos pos la verbo ta clari partal lo? jorj
  • “Es” es un idea multe interesante e refinada. Triste, lo ta crea otra confusas, car “es” ave ja un otra sinifia estrema comun. Un otra spesie de idea: elejable, on ta ajunta “lo” o “los” ante la verbo: “me vole lo es forte”, “alga los vade a via”, “multe los veni de Noria”. Acel funsiona car nos ia elimina la posible de cadenas de verbos con ojeto media. Simon
  • acel es ance un idea vea. “me vole lo es forte” pote sinifia “me vole ce lo es forte”, e donce nos ia rejeta lo. ma aora nos debe usa sempre “ce”, donce lo no es confusante. ma me pensa ce aprendores ta tende confusa lo. per la otra esemplos, per ce no “alga de los vade a via” e “multe de los veni de Noria”? e nos ave sempre la eleje de inclui la nom: “alga amis…” “multe amis…” jorj
  • La sistem con “la” opera ja multe bon. La sola problem es ce me no pote freni me mente en esplora otra posibles… Simon
• vera, lo ta es mervelosa si nos crea un lingua simple e completa lojical. ma me crede ce, con cada cambia per lojica, nos crea un otra problem - de lojica o simplia. lingua es “liscosa”. e plu, linguas como creoles e xines usa situa e contesto, como me ia dise alga en la pasada :o) jorj
• Si, e lfn trova un ecuilibra notable bon entre un desinia tro natural e un desinia tro scemin/macinal. E car la plu de lfn es estrema lisa e bela, la du o tre problemes constante discuteda pare plu ru e fea ca los es. Simon