Pare

• Nos ia deside ce “pare” es un de la familia peti de verbos cual opera como “es” e “deveni”. La disionario ajunta la nota “(copula)” a lo, e dona la esemplo “la aira pare fria”. Ma me nota ce me ia comensa usa la espresa “pare es”, como en “la aira pare es fria” o “la sala pare es un cosina”. Me no pote esplica la gramatica de esta, e me conclui ce lo es un era. “Pare” no es transitiva, donce nos no pote segue lo con un tal ojeto. Nos debe dise “la sala pare como un cosina”. Me scrive esta pos revisa la parte de Alisia do el dise “I must be shutting up like a telescope”. Me ia scrive ja “Pare ce me lisca a su como un telescopio”, ma me ia es tentada a cambia esta a “Me pare lisca a su…” – ma esta ta es egal nongramatical. “Pare ce me lisca a su…” es bon, car “ce me lisca a su…” es vera la sujeto de “pare”, e nos ave un regula spesial cual permete pone la sujeto pos la verbo en tal frases, do la sujeto es un proposa introduida par “ce”. La completinte de “pare” en acel frase es “vera”, como en “Es vera ce me lisca a su…”. Esce vos acorda? Simon
• La frase “la aira pare fria” plase a me. Ma me opina ce la frase “la aira pare es fria” es ance bon, an si la verbo “es” no es nesesada. En fato me opina ce “fria” opera como un verbo de state e sinifia “es fria”. Sunido
• Si me comprende coreta tu, tu opina ce “pare” es transitiva, e ce “es fria” es la ojeto. Con esta model, nos pote dise ance “la sala pare un cosina”. Esce esta frase plase a tu? Si la problem es esplica la manca de “es” en “la aira pare fria”, nos pote dise ce “fria” es un averbo cual altera “pare”. Simil, en esperanto, on pote dise o “vi aspektas malvarma” o (multe plu comun oji) “vi aspektas malvarme” – Zamenhof mesma ia esita entre la du. Ma “aspekti” es “aspeta”; con “ŝajni” (= pare), esperanto permete sola un ajetivo (estra la caso de un proposa: “ŝajnas bone, ke ni iru” = “pare bon ce nos vade”). Me no es serta ce me gusta la idea ce “pare” es transitiva. Simon
  • me usa sempre (esetante cuando me era! 🙂 “x pare y”, sin “es”. y pote es un ajetivo o un nom. en otra parolas, “pare” es un copula. jorj
  • Me acorda con tu, Jorj. La usa de “es” no es gramatical posible en nos model. Simon
  • La copula “es” indica un state, la copula “deveni” indica un cambio de state, la copula “pare” indica un state imajinal o sujetal. Tu no pote dise “Alisia pare lisca” ma tu pote dise “Alisia pare liscante”. Sunido
  • Si, me acorda. Simon