Non

• Esce “nonparlor” es un bon parola? La disionario dise ce “non-” es “ajuntada a un ajetivo per reversa la cualia, o a un nom verbal per indica la asentia de la ata o state”. Esta permete “nonjusta” e “noncrede”, ma parente no “nonparlor”. (E ance no “nonsoldato”, cual pare un bon modo de dise “person nonmilitar”.) La gramatica ce “non-” “formi ajetivos e nomes cual indica la reversa o manca de un cualia” – un regula pico min restrinjeda, cual pare permete “nonparlor”. Simon
  • si on pote ave nonparla, esce on no pote ajunta -or? e esce on no dise “nonmilitar” sin “person”? jorj
  • Me gusta tu razona sur “nonparla” + “-or”. (Me ia pensa a “non-” + “parlor”.) Serta on pote dise “nonmilitar” sin person, ma esta no responde a la demanda sur “nonsoldato”. Per prende un otra esemplo, esce “nonprete” es bon? Simon
    • me ia vide tu demanda como “nonsoldato es plu bon ca “person nonmilitar”. per responde: me no pote trova un tradision de usa “non-” con parolas cual es fundal nomes - sola con ajetivos, incluinte partisipios, o parolas derivada de ajetivos. an engles usa “non-” con nomes en un modo limitada. ma esta sujeste ce “nonparlor” no conveni. lo debe es “nonparlante”. ma lo ta refere a algun ci no parla, e no a algun ce no parla un lingua spesifada. donce, la sola solve ta es usa un espresa como “un ci no parla esperanto” o simil. jorj
    • (A, pardona – sur “nonsoldato”, me ia intende scrive ce lo pare un bon alternativa per “person nonmilitar”.) Alga parolas tecnical esiste como “un nonmetal”, “un noncondutor” en multe linguas, e me veni de trova “nonabitor”, “noncredor” e “nontoleror” ja en nos disionario. “Nonparlor” no pare tan xocante ce nos debe proibi lo, en me opina. Simon
    • oce. vera, -or no difere tan multe de -nte en se usa. personal, me prefere “nontolerante”, “noncredente”, e “nonconduinte” per reteni la coere de la lingua. ma esta pote es un eleje, natural. jorj
    • Serta la formas con “-nte” es bon. Ma si on regarda “nonabitor” como “nonabit—or” en loca de “non—abitor”, on reteni ancora la coere de la lingua.
• posible nos debe inclui nomes en la usa de “non-”. lo ta es multe usosa, e serta, lo ta es fasil comprendeda par tota aprendores. nos no nesesa ajunta tota (o cualce) nomes cual pote aseta “non-” a la disionario, car la sinifia es tan clar. cual pensa vos? jorj
• Me vide no problem en esta. Tal parolas apare en engles de tempo a tempo per consetas nova cual nos debe representa en elefen. Esta article resente es laxe pertinente a la tema. Simon