Max

Lo es strana ce elefen ave “max” per la parola engles “match”. La pronunsia de “max” no es conoseda, e acel parola pare tro multe la parola internasional “maxim” (la plu). Perce nos no ave “matx”? harri ()

• Alo, Harri! Jeneral, cuando nos adota un parola, nos atenta restrinje nos a la regulas fundal de elefen. Si la parola es, per esemplo, un nom de un popla o lingua, o un nom per un cosa con lias forte a un cultur (pe Txesco, xacuhatxi, patlatx, txapsui), nos permete varias. Ma “match” es multe internasional, e la parola es multe jeneral. Donce, nos prefere simpli lo a “max”. En un modo simil, nos ia ajunta resente la parola “dox” [doʃ] per la engles “dox” [doks]. Natural, cualce de estas es un eleje sin acorda universal! :o) jorj
• Simil: antrax, exagon, fax, ibex, ilex, latex, onix, paradox, torax. E “focaxia”, esata como “max”. Simon

Me no es convinseda. Jorj dise, ce “match” es multe internasional, e la parola es multe jeneral. Esce esta es un bon razon perce on cambia la parola a un forma noninternasional, nonconoseda? La pronunsia [маш] no es plu simple ca [мач]. En la parolas refereda par Simon, la forma es bon conoseda an la pronunsia es alga cambiada. La parola “max” ave un state internasional e constante, per esemplo “max 100 kg”, “max 6 pers.” etc. An nos asi en Suomi vide lo cada dia - contra ce nos no ave la parola “max” en nosa lingua! harri ()

• Esce tu vide la mesma problem con la parola “min”, cual es internasional usada como un corti de “minima”, ma sinifia un cosa alga diferente en elefen? “Max” segue la regulas fonolojial de elefen; “matx” es fea. Me no acorda ce “la pronunsia [маш] no es plu simple ca [мач]”: ш es un fricativa; ч es un africante (un sona cual comensa como un esplodente e fini como un fricativa – par defini, lo es min simple ca un fricativa mera). On usa parolas en un contesto; me duta ce on ta suposa ce on refere a un corti per “masima” cuando la conversa es sur sporte. Un otra modo de regarda esta es ce la parola “match” es tan internasional e comun ce lo ia deveni intera naturalida en elefen. Simon