Esta e acel

nos no ave instruis clar per la usa de “esta” e “acel” per refere a partes de un testo. en parla, me tende usa “esta” per refere a la me declaras propre, e “acel” per refere a la declaras de un otra, plu comun la person con ci me parla. me nota ance ce me usa “esta” per declaras con cual me acorda, e “acel” per declaras con cual me no acorda, pd declaras cual es de me e declaras ce es de tu o un otra. la mesma ideas pote es usada en un testo scriveda ance. ce vos pensa?

• Tu ideas es bon, ma on no pote segue tota de los a la mesma tempo. Per esemplo, si me acorda con tu (como asi), esce me ta dise “esta es un bon idea” o “acel es un bon idea”? Simon
• Jorj, de longa tempo me vole parla sur esta/acel tema. Nos nesesa regulas clar. En franses on debe usa “acel” cuando on parla sur cosas ja diseda, e “esta” cuando on parla sur cosas ancora no diseda. Sunido
• La difere entre “esta” e “acel” en lfn pare pertine a distantia metafor. Esta cosa es metafor asi, o prosima a asi; acel cosa es metafor ala, o plu distante de asi ca esta. En un discute, la tema de la discute es metafor presente (lo es “asi” en la discute con nos), e donce me ta usa “esta” en refere a lo. La regula franses no coere con otra modos de usa “esta” e “acel” cual pare plu usosa en pratica. Serta, si on presenta un esemplo cual segue, on ta dise “considera esta esemplo” – car lo va apare direta asi – e no “considera acel esemplo”. Ma si la esemplo presede direta la discute sur se, lo es ance direta asi – lo es la punto sur cual on discute aora. Simon
• Nos debe considera ance la usa posible de “acel” e “esta” per refere a la prima e la final de un lista de du cosas presentada direta a ante, como con “the former” e “the latter” en engles. Me ia sujesta esta idea en la pasada, ma otra persones no ia gusta lo. Simon
• Me acorda ce on ta pote usa “acel” per “the former” e “esta” per “the latter”, car “esta” es plu prosima ca “acel”. Ma acel regula solve sola un parte de la demanda. Sunido
• En tu frase final, tu dise “acel regula” car tu distanti tu de lo, desirante progresa a otra partes de la demanda. Bon. Ma tu ta pote dise ance “esta regula”, car lo es la cosa la plu resente en nos mentes. La difere es sutil, e refleta tu disposa momental. Par dise esta, me vole indica ce nos no va pote solve tota de la demanda par ajunta un macina de regulas. Nos pote ofre sola gidas e conselas. Simon
• Me acorda. Cuando Jorj usa “acel” cuando el desapoba, el mostra se distanti. Sunido
• ance, cuando on acorda con alga cosa diseda par un otra, on cambia mental “me e tu/el” a “nos” - e donce, algun plu prosima, metaforal.
• me no gusta ancora la usa de “acel” e “esta” per “former” e “latter”. me prefere “la prima” e “la final”, estra ce los inclui diferes como “la me/acorda” e “la otra/non acorda”.

esta es la me sujesteda per ajunta a la gramaticas:

• cuando on refere a un parte de un discute o un testo, on usa “esta” per refere a alga cosa con cual on acorda o cual on mesma ia dise. On usa “acel” per refere a alga cosa con cual on no acorda o cual ia es diseda par un otra.
• Un resulta strana ta es ce, en un serie de frases como “el va visita nos – esta es bon”, on ta debe cambia “esta” a “acel” si on cambia “bon” a “mal”. E ce on ta fa si la frase du ta es “me no es serta esce esta/acel es bon”? O “esce tu opina ce esta/acel es bon o mal?” Simon
• me vide. esta es un problem de asentua en la me sujeste. en loca:
  • cuando on usa “esta” o “acel” per indica un parte de un discute o testo en un otra parte de la discute o testo, on usa jeneral “esta” per refere a cosas cual on mesma ia dise, e “acel” per refere a cosas cual un otra ia dise. simil, on pote usa “esta” per indica cosas con cual on acorda a un grado o un otra, e “acel” per indica los con cual on no acorda. esta regula es sola un sujeste, e la usa de “esta” e “acel” es plu un caso de stilo ca gramatica.
• ma me crede aora ce sola la frase final importa! pos esta discute longa, me conclui ce esta problem no es un problem grave. :o) jorj