Azul e blu

Ma esce la sielo es blu? Me ia pensa ce el es azul. Sunido

• Bon punto! Me no ia sabe ce la disionario defini “blu” como un color oscur. Me no opina ce la distingui entre “blu” e “azul” es bon o nesesada. An en espaniol, de do la parola “azul” veni, on dise “azul celeste” per la color de la sielo, e “azul claro” per un blu pal. E en franses, si me no era, “azur” es un parola tan rara como “azure” en engles, no? En me opina, nos pote simple sutrae “azul”. Simon
• Me acorda. Esce tu sabe ce en bresonica, la parola “glas” sinifia azul, blu, verde, e gris. Me suposa ce la bresonicas prima ia ave daltonisme.🙂 Sunido
• Resente, me ia televide un programa sur la persepi de colores. On ia mostra un esperimenta con un paje con des-du sirculos peti. Des-un de los ave la mesma color; la otra es diferente. La demanda es: cual sirculo difere? La programa ia mostra un tribu en Africa ci parla un lingua con un distribui strana de la (poca) parolas per colores. Per esemplo, los dise ce la sielo es “negra” an en la dia. La esperimentores ia mostra a la tribu des-un sirculos verde e un cual ia es blu verdin. La difere ia es multe clar a me e la esperimentores, ma la persones en la tribu ia es apena capas de persepi el. Par contrasta, los ia trova fasil un difere apena vidable per me e la esperimentores! Ave cisa alga veria en la teoria de Whorf… Simon
• me segue la rexerca de Berlin e Kay e rexerca seguente. an la plu de linguas european ave 11 colores fundal (per dise, con un nom simple), italian e rusce ave 12, e distingui blu e azul. per me, la difere es an plu clar ce la difere entre rosa e roja. jorj
• Simon, la conclui es ce tu sielo es blu sola cuando la note comensa. Ante esta momento el es azul. Sunido