Ajetivos pos un serie de nomes

Ave asi un frase: “El gusta la cosini e la moda franses”. Esce “franses” relata sola con “moda”, o con ambos “cosini” e “moda”? Esce on debe dise “El gusta la cosini franses e la moda franses”? Sunido

• me sujeste ce on pote usa la “la” per indica la intende: “el gusta la cosini e moda franses” sujeste a me ce ambos la cosina e la moda es franses. jorj
• Acel truco opera bon sola si on aseta ce “el gusta moda franses” no es un bon frase. Ma “el gusta pan franses” es bon, donce la truco no susede en “el gusta la cosini e pan franses”. En tal frases, si la situa no sufisi per fa comprende la intende, on ta usa plu parolas per clari. Simon
• me no crede ce on no pote usa “la” ante “pan”! per esemplo, on pote responde a “cual pan tu gusta plu, italian o franses?” con “me prefere la pan franses” (o an “me prefere la franses”).
• On pote usa “la” ante “pan”, serta. Ma on pote ance omete el. “Me gusta pan” es un esemplo en la gramatica. Simon
• En franses e en la romanicas on pote distingui entre “Il aime la cuisine et la mode française” e “Il aime la cuisine et la mode françaises”. La ajetivo con plural indica ce el relata a la du nomes. Me crede ce esta distingui es nonposible en engles e en LFN. Sunido
• e esta distingui no aida on en frases como “il aime les châteaux et les manoirs français”.
• E el no aida cuando on parla! El no aida ance en “il aime le château et le manoir français”, car la ajetivo singular fini ja con S. Simon