DISIONARIO DE MITOLOJIA CLASICA
Prefasa · Introdui · A · B · C · D · E · F · G · H · I · J · L · M · N · O · P · R · S · T · U · V · X · Z

A

Abdero (EL Ἄβδηρος) — El ia aida Hercule en sua taxe oto e ia es matada par la cavalos fema de Diomede.

Aca Larentia (LA Acca Larentia) — Sposa de Faustulo. Los ia eleva Romulo e Remo pos cuando sua sposo ia trova la enfantes con la lupo fema.

Acama (EL Ἀκάμας) — Fio de Fedra e Teseo, un de la elinicas ci ia es en la cavalo de Troia.

Acaste (EL Ἀκαστη) — Un de la oceanides. El ia es entre la acompaniores de Persefone en Sisilia cuando el ia es saisida par Hades.

Acate (EL Ἀχάτης) — Un eroe troian, ami de Enea, ci ia acompania el en sua viaja a Italia. El ia mata Protesilao, la elinica prima ci ia desembarca en Troia.

Aceron (EL Ἀχέρων) — Un de la sinco rios de enferno.

Acile (EL Ἀχιλλεύς) — Un eroe de la gera de Troia, e la fio de Tetis e Peleo. Sua madre ia bani el en la Rio Stix, teninte el a la talon, e donce el ia deveni nonmortal con eseta de sua talon. El ia mori cuando Paris ia lansa un flexa a el, gidada par Apolon.

Aciroe (EL Ἀχιρ(ρ)όη; ance nomida Ancinoe Ἀγχινόη) — Fia de la dio-rio Nilo e sposa de Belo. Madre de Danao e Egipto.

Acteon (EL Άκταίων) — Un eroe e xasor teban, conoseda car el ia vide Artemis nuda baninte se. Per puni el, la diva ia cambia el a un servo cual sua canes de xasa ia devora.

Adastrea (EL Ἀδράστεια) — Un nimfa critica, fia de Meliseo, encargada a cura secreta la enfante Zeus per proteje el de sua padre Crono.

Admete (EL Ἀδμήτη) — Un de la oceanides. El ia es entre la acompaniores de Persefone en Sisilia cuando el ia es saisida par Hades.

Admeto (EL Ἄδμητος) — Re de Fere (EL Φεραί) — E sposo de Alceste.

Adonis (EL Άδωνις) — La amor mortal de Afrodite. El ia mori en la manos de Afrodite, lansida par un senglar enviada par Artemis.

Afrodite (EL Ἀφροδίτη) — La diva elinica de ama.

Agamemnon (EL Ἀγαμέμνων) — Re de Micene e comandor de la armada acean en la gera de Troia.

Aganipe (EL Ἀγανίππη) — Un crenea de la fonte Aganipe.

Agave (EL Ἀγαύη) — Fia de Cadmo e Harmonia, prinsesa de Tebas, sposa de Ecion e madre de Penteo e Epiro.

Agenor (EL Ἀγήνωρ) — Re fenisia de Tiro. Fio de Posedon e Libia, sposo de Telefasa e padre de Fenix, Cilix, Cadmo, Europa e Fineo.

Aiax maior (EL Αἴας ὁ Τελαμώνιος) — Fio de la re Telamon e Periobea, duifrate de Telamon. El ia combate en la gera de Troia.

Aiax minor (EL Αίας ο Λοκρός) — Ance conoseda como Aiax Oileo, fio de Oileo, re de Locris. El ia combate per la aceanes en la gera de Troia.

Alba Longa — Un site fundida par Ascanio.

Alcestis (EL Ἄλκηστις) — Un prinsesa, fia de Pelia e Anaxibia, famosa per sua ama a sua sposo, la re Admeto.

Alcimede (EL Ἀλκιμέδη) — Madre de Iason e Promaco e sposa de Eson.

Alcioneo (EL Ἀλκυονεύς) — Un jigante, fio de Gea e de la sangue de Urano castrada, matada par Heracle.

aloades (EL Ἀλωάδαι) — Du jigantes, Oto e Efialte, fios de Ifimedia, sposa de Aloeo, e Posedon. Forte e violente, ambos ia vole sposi Artemis, ci ia converti se a un servo e ia salta entre los. Desirante ce el no fuji, los ia lansa sua lansias e ia mata lunlotra.

alseides (EL Ἀλσηΐδες) — Nimfas de bosces e valetas.

Amaltea (EL Ἀμάλθεια) — La madre tempora adotante de Zeus la plu notada, frecuente representada como la capra ci ia teti la dio-enfante en un cava en un monte.

amazona (EL Ἀμαζών) — Un membro de un raza mital de gerores fema.

ambrosia (EL ἀμβροσία) — La comeda prefereda de la dios elinica antica

Amfitrion (EL Ἀμφιτρύων) — Un jeneral teban ci ia salva Tebas de la volpe teumesian. Sposo de Alcmena, madre de Hercule.

Amfitrite (EL Ἀμφιτρίτη) — Un diva maral e sposa real de Posedon.

Anax (EL Ἀναξ) — Un jigante de la isola Lade prosima a Miledo en Lidia, Anatolia.

Ancinoe (EL Ἀχιρ(ρ)όη / Ἀγχινόη) — Un naiade, fia de la dio-rio Nilo, sposa de Belo e madre de Egipto e Danao.

Ancise (EL Ἀγχίσης) — La padre de Enea.

Andromace (EL Ἀνδρομάχη) — La sposa de Hector.

Andromeda (EL Ἀνδρομέδα) — Un prinsesa itiopian, fisada a un roca asta cuando Perseo ia salva el.

Angelo (EL Ἄγγελος) — Un fia de Zeus e Hera ci ia deveni un diva de la sumundo.

Antenor (EL Ἀντήνωρ) — Un conselor de la re Priamo en la gera de Troia.

Anteo (EL Ἀνταῖος) — Un jigante libi ci ia mata tota visitores par combate. El ia es matada par Heracle.

Antifate (EL Ἀντιφάτης) — La re de la lestrigones, jigantes ci ia come omes e ci Odiseo ia encontra en sua viajas.

Antigona (EL Ἀντιγόνη) — Fia de Edipo e sua sposa Iocasta, ci ia defia la re de Tebas, Creon, par entera sua frate Polinece.

Antiloco (EL Ἀντίλοχος) — Fio de Nestor ci ia sacrifia se per salva sua padre en la Gera de Troia.

Antiope (EL Ἀντιόπη) — Un amazona, saisida par Teseo cuando Heracle ia atenta prende la sintur de sua sore Hipolita.

Apolon (EL Ἀπόλλων) — La dio elinica de musica e divinia, de la sol, poesia, musica, e oraculos.

Aracne (EL Ἀράχνη) — Un texor fema destrosa, mutada a un arania par Atena par causa de sua blasfema.

Arcesilao (EL Ἀρκεσίλαος) — Un de la sinco capitanes de la beotianes ci ia aida Troia en sua gera contra la aceanes. Fio de Arelico e Teobule.

Ares (EL Ἄρης) — La dio elinica de gera.

Arete (EL Ἀρετή) — Spirito de virtua, eselentia, bonia e coraje.

Aretusa (EL Ἀρετούσα) — Un fia de Nereo, mutada a un fonte.

Argo (EL Ἀργώ) — La barcon en cual Iason e la argonautas ia viaja de Iolco a Colcide per retrae la Lana Oro.

Argo Panopte (EL Ἄργος Πανόπτης) — Un jigante con sento oios, encargada a garda Io.

Ariadne (EL Ἀριάδνη) — Fia de Minos, re de Creta, ci ia aida Teseo a vinse la Minotauro e ia deveni la sposa de Dioniso.

Aristeo (EL Ἀρισταῖος) — Fio de Apolon e la nimfa Cirene, sposo de Autonoe e padre de Acteon e Macri. Pos nase, el ia es elevada par la Musas, ci ia instrui el sur la eleva de abeas, la produi de ceso e modos per fa ce olivos dona olivas. El ia deveni la padron de boves, xasa, cultiva e eleva de abeas.

Artemis — (EL Ἄρτεμις) La diva elinica de la xasa, e protejor de virjines.

Ascalafo (EL Ἀσκάλαφος) — (1) Fio de Aceron. El ia vide como Persefone ia come en la Enfernos e ia informa Hades e Zeus. Demeter, per venja, ia lansa un petra sur el ma Heracle ia aida el par libri el de su lo. (2) Fio de Ares e Astioce, jemelo de Ialmeno. Corteor de Helena, el ia debe vade a la Gera de Troia, do el ia es matada par un flexa lansada par Deifobo.

Asclepio (EL Ἀσκληπιός; Esculapio per la romanes) — La dio elinica de medica.

Atalante (EL Ἀταλάντη) — Un eroe fema ci ia partisipa en la xasa de la senglar calidonian.

Atama (EL Ἀθάμας) — Fio de Eolo e Enarete. El ia ave sposas diversa. Con sua sposa prima, Nefele, el ia ave du jemelos, Hele e Frixo e un otra fio, Macisto. Plu tarda, el ia sposi Ino, con ci el ia ave du fios Learce e Melicerte.

Atena (EL Ἀθήνα) — La diva elinica de gerores e intelijentia.

auloniades (EL αὐλωνιάς) — Nimfas de pastos de montanias e vales ci ia acompania frecuente Pan.

Aura (LA Aura) — La personi de la venteta.

Automedon (EL Αὐτομέδων) — Fio de Dioreo, caror de Acile en la Gera de Troia. Pos la mori de Acile el ia aida sua fio Neoptolemo.

Autonoe (EL Αὐτονόη) — Fia de Cadmo e Harmonia. Sposa de Aristeo e madre de Acteon e Macri.

Aventino (LA Aventinus) — Un fio de Hercule e la prinsesa Rea, un aliada de Mezentio e un enemi de Enea. El ia es asasinada e enterada en la colina cual porta sua nom.

Esta paje es presentada con la lisensa CC Attribution-Share Alike 4.0 International.
Lo ia es automatada jenerada de la paje corespondente en la Vici de Elefen a 7 setembre 2020 (19:54 UTC).