La porte ultima

La portes fasina me, me confesa. En mea casa, de sempre, me ave multe de los e sempre identica, car me gusta ce la portes aspeta simil. Un porte es como un cor cual bate.

La porte la plu resente cual me ia conose ia trova se en un pais multe distante, do la fronteras de la cosas vidable misca streta con la mundo de la cosas semblante (on no era tro multe, disente acel).

Un universo es sempre vidable de un distantia grande, estra cuando nos fa eras de tempo. Lo cual aveni, ai, alga frecuente.

Me atesta lo con esta porte, cuasi nova, cual abri se, cuando puiada, sur un costa de mar infinita e reta. Un spesie de plaia a lado de un mar plata como un stangeta de mercurio en un laboreria.

Vide la arena ia es fatigante, par causa de la brilia blanca. La sol, no distinguida de la resta de la decora, ia es como luminante de basa la materia.

Scemal, la vista ia conteni tre linias xef:
 – la orizon,
 – la borda de mar,
 – e un linia imajinal oblica de cual me no ia comprende ancora la usosia.

Un onda de caldia ia ataca me pronto pos cuando la porte ia es cluida.

 

 

Me ia resta tra alga tempo contemplante esta mundo nuda como on contempla un panorama grandiosa de un punto alga alta de un colina, frecuente en un curva de la via. Fa cua otra ca regarda? Me ia demanda lo a me, per alga dias, ante ce me osa aventura a en. Me no ia ave furni per fronti la deserto. E lo es normal, car acel porte ia trova se nel fondo de mea sala de camisas, en mea caseta cuieta al borda de mar. Me ia eleje acel porte car me ia veni justa de instala lo e me no ia sabe ancora cua lo ta pote masci.

La porte de la sala de banio ia es plu perilosa, car lo ia es abrinte se sur la vacua. A basa de la presipe, a sirca sinco sento metres a su, on ia ave rocas agu sur cual la mar ia es rompente sua ondas.

Me ia proba lo a un ves. Me no va recomensa de pronto. Me garda un mal recorda de lo.

Ma ta ce on reveni a esta deserto vasta. Me ia proba ala mea pasos prima, esitante como un fieta.

Mea pedes no ia es marcante trasas a en.

En pasa, lo no ia es arena. Lo ia consiste mol como un tapeto enorme de mos.

A prima, me ia pasea sur manos e jenos, car lo ia es difisil mantenable ce me sta tra longa. Sirca la media de la dia, final, me ia susede avansa, bambolante, sur mea pedes. Me ia gusta lo, car me ia senti diminuida, paseante como un bestia.

Cuando lo ia noti, me ia sensa ce un fria jelante, venida de la mar, envolve me. Sin duta la lama grande de un spada ia es lansinte me, car, simultan, la solo ia es rojinte a retro de me, e la mar ia es ejetante perlas scarlata cual sembla salpicas.

En pasa, me ia sensa debilida.

Cisa sola un impresa…

La fatiga de la dia…

Mea pasea longa…

Me no sabe vera.

Me ia estende me e me ia escuta atendosa. No an alga ruido pico. An acel de la mar, an tal espetada sur un plaia.

Me no ia osa parla, temente ce mea vose bondi sur la vastia sieca e veni colpa mea oreas pos un amplifia estrema.

On no ia ave falesas. Donce, normal, no eco. Ma me no ia osa tenta.

Me ia es esperante ce un canta de avia ta veni a me, mera per debili esta impresa de solitaria cual me ia es comensante senti.

La note ia es fria.

Me ia replia sur me mesma.

Me ia senti como un punto pico sur un paje vasta de paper blanca. Ta ce nos dise roja, a presente. Me ia aprende, pos alga tempo, ce blanca ia es la color del dia e roja acel de la note.

Tal, me ia es informada e me no ia panica plu cuando la sera aveni. Me no ia es perdente sangue; lo ia es un punto de cuieti, ja me en mea situa.

Cuando me va nara tota esta, serta, an mea amis intima no va crede me. An tal, lo ia es evidente tal.

Xef la linia imajinal oblica ia es turbante me. Cual ia es sua rol en un vista tan simple? Du linias no ia basta?

En la lus del dia, la mar ia es sintilinte como un miror briliante. Me ia deside prosimi a lo a la matina de doman, mera per persepi… con multe cautia. On sabe nunca. En un pais nonconoseda, on debe sempre cauti multe. On no jua con la sinias de demanda, supra tota cuando los no parteni a nosa vive de cada dia.

Me ia aprende, tra tota mea jovenia, ce me debe es cauta e no parla a persones nonconoseda. Acel condui ia es usosa tra tota mea adolese ante mea maturia. Me sabe ce me va ateni mea maturia multe plu tarda, cuando me va conose plu cosas de la vive.

Tota esta, me va vide lo plu tarda, cuando nesesada. Me no debe freta la cosas. La avenis segue sua cursos, tal, dulse e lenta, cada pos cada otra, poi los cumula sur lunlotra en un masa de avenis tan confusada ce on perde lor cronolojia. Me crede ce lo es cual on pote nomi la istoria.

Lo no ave plu sinifia, ma lo es plasente. La ordina relativa con la momento presente no importa.

Donce me ia deside reconose la mar pronto cuando la solo ta es blanca. Tra tota la note, me ia fa suposas.

Cua lo ta es? Jelo? Perce no? Metal refinada? Perce no? Me va vide.

Par esta causa, me ia pasa an tal un bon note, navigante sin sesa de un posible a un otra, como un nave rolada par la ondas. Lo ia cuni me.

La fria ia es desaparente, lenta, esfluente de mea osos en modo simil como lo ia entra ja en los. Per dise, multe secreta.

La sielo ia blanci. Ance la solo. La mar ia es ancora ala e ia es ejetante sua manxetas ultima de la note.

A un instante, me ia teme ce un linia ta desapare, spesial la linia costal. Ma tota ia es en sua loca, tal firma como ier:
 – la orizon,
 – la borda de mar,
 – la oblica imajinal.

Me ia velia plen de enerjia. Me ia recovre ja bon. Pos alga moves de flexe, me ia parti per vade a la costa. Lo ia es plu distante ca prevideda. Sin duta la spasio blanca engana la evalua de la distantia… Me ia ariva sola plu tarda, pos du dias.

A esta ves, me ia es ala, vera.

Ala, la aira ia es plu fresca. Me ia inclina con cautia.

Un miror vera. Me ia vide me multe neta. Mera un sola difere peti: mea imaje ia es blu.

Me ia regarda mea brasos, per serti. No, los ia conserva sua color de carne cual los ave de mea nase. Me ia posa los a supra. La imaje ia es blu.

Me no ia osa pone la dito a en pronto. Posible la licuida ia es corodente. Me ia sumerji un parte pico de mea teleta. Lo ia afonda. Pos ce me ia reprende lo, me ia pote nota ce lo no es moiada.

Me ia risca, multe cauta, entra un dito, preparada per estrae lo si lo ta dole, an pico. No cosa ia aveni. Lo ia es plasente tepida. Lo no ia es acua. Lo ia es plu spesa e dulse cuando palpada.

Mea curiosia ia es sasiada. Me ia esperia la plase de un labora bon fada. Cua me ia vade a fa, aora?

Esplora.

Ma cua? Tota ia es vacua, blanca, sin misterio.

Me ia senta fas a lo cual me ia es nominte “mar”, no potente dona a lo un otra nom. E me ia fisa mea regarda al orizon, esperante vide un vela.

No cosa.

La sera ia veni, e ia trova me en esta posa. La mar ia deveni profonda roja como granato, la tera ros multe bela, la sielo merveliosa oranin.

La reposas de sol, si on pote dise, ia es vera gloriosa.

Poi la tinjes ia uniformi e la linias ia desapare gradal. La note ia es carmesi. La fria ia es pico agu. Fortunosa, me ia ave mea jacon.

Pos un semana, me ia nota ce me no sensa cualce nesesa. Me no ia come no bevi, e an tal me ia vade multe bon. An me no ia fumi ja!

Otra paises, otra costumes. Esta ia es multe spesial. An tal me no ia es ansiosa. Cua ta pote aveni a me? On ave no cosa.

Me ia resoma la situa:
 – la tera,
 – la sielo,
 – la acua,
 – la aira.

La cuatro elementos. Vera. Me no ia nota lo ja, a la ves prima.

Cua on fa con esta? Tota, lo pare. Me mesma es un sintese.

La note ia es bon avansada ja. Nesesante no come no bevi, perce me ta nesesa dormi? Sin duta car on ia ave ancora la note e la dia.

A esta note, me ia veni de descovre la anomal prima. Lojical, on ia ta debe ave sola un dia sin fini. Lo no ia es normal.

Alora, me ia razona e me ia dedui ce la dia e la note ia es forminte un elemento sinco,
 – la tempo.

Alora, me ia pote dormi cuieta. Tota ia es en un ordina perfeta.

A la matina de esta dia des, me ia pasea, como usual, seguente la costa afin me no perde me.

Me ia trova final la sinifia de esta oblica imajinal. Lo ia es la linia del tempo. Lo ia es normal movente.

 

 

Lo cual me ia tolera la min, lo ia es la silentia. Acel silentia pesosa, cual final ia es causante tan multe dole como la ruido.

Mea desmaia prima ia surprende me en curso de pasea.

Me ia sensa subita un onda de caldia asendente a mea testa, poi la fini de mea ditos ia deveni nonsensosa e fria. Me ia sui abundante, como con febre. Mea gamas no ia porta plu me, e me ia cade a tera, noncapas de alga move. Mea respira ia es difisil, me ia es sofocante.

Lo no ia dura longa. La fortes ia reveni a me pico a pico, e, pos un ora, lo no ia es plu ca un mal recorda.

Me no ia es plu pensante a lo, cuando lo ia reprende me. La desmaia ia dura plu longa, e me ia sensa spasmas tra mea gamas. Me ia resta sin pote move per plu ca un ora, a esta ves. Me ia crede vera ce me no va sta me plu.

No. Tota ia aveni como a la ves prima, e me ia pote continua mea via. Ma a esta ves, me ia esperia la teme ce lo reaveni. Me ia pasea multe cauta, atentante fatiga me tan poca como posible. Pos cada duple de oras, me ia es pausante per contempla la mar.

Pos alga tempo, me ia nota un desajusta entre mea orolojeta e la reposa del dia. Lo no ia es causada par la saison. La causa plu serta ia es un difere en la periodo de turna de la planeta. An tal, me ia es ancora sur tera – lo ia pare…

Alora?

Vera, me no sabe. Ma me ia debe sola mensiona la fenomeno.

En la tempo de mea pausas, en cuando me ia es esaminante la orizon, me ia crede distingui un onda de la solo, alga distante. Me ia oserva multe atendosa tra alga instantes, per es serta ce esta desformi no ia es causada par un fatiga de mea oios. Lo ia es simil como un jiba, solitar, no multe grande, a la surfas de la tera.

Un cosa strana nova per sasia mea curiosia. Me no ia pote espeta. Me ia freta per ariva, corente tra du oras sin pausa. Me ia debe sabe. Me ia nesesa vera sabe.

Me ia para a alga metres de la jiba. La solo ia es multe plu calda. Subita, me no ia osa avansa.

Me ia senta e me ia regarda.

La sol ia es lejera tremetante. La ojeto ia progresa ja lenta a alta, e la jiba ia es aora tan alta como me. Lo ia es posible un sfera.

La sol ia tremeta plu. Me ia crede nota ce un fende ia es nasente a sua culmina. Me ia retrovade rapida. La tapeto ia lasera e mea pedes ia arde plu e plu. Me ia retrovade alga per oserva plu bon la fenomeno.

La globo ia es bluin. Metalin. E lo ia es vibrante.

De dudes metres de distantia, me ia pote contempla sin peril.

La sfera enorme ia es ancora asendente. Pronto, lo ia para, a alga metres supra la solo cual ia es cadente lenta. La feri ia desapare pos corta.

En la vista, on ia ave un cosa nova: esta sfera blu suspendeda en la aira, no sustada par alga cosa. Sua tinje bluin no ia es sempre identica. A veses, lo ia deveni arjentin; a veses, malva.

Lo no ia move plu.

Me ia senti subita noiada. Do tota esta ia vade? Me ia es ala sin alga razona. Me ia es notante, nonvolente, la asurdia de la situa.

Tre linias, un sfera e me. E alora?

Me ia senta a tera e, con codos sur mea jenos, me ia pone mea testa entre mea manos.

Me ta vole velia.

La ojeto no ia ave ombra. Ance me. Lo ia es normal, car on no ave alga fonte presisa de lus.

Lo es delude.

Me ia senti la sintomes prima de mea desmaias.

« A! Alora no! »

A esta momento, me ia persepi mea cria, e la resona de mea vose como en la coro de un catedral.

E mea doles ia desapare subita.

 

 

A dia pos dia, me ia persepi ce esta desmaias ia es orijinante de la silentia. Un sona an minima ia es xasante los.

De alora, me ia vade multe bon.

Me ia es noiante pico, an tal, sentante ante esta sfera, con no cosa per fa.

Me ia es en esta deserto de cuasi un mense, e me no ia trova plu esta tan plasente.

A un matina, an tal, un fato nova ia aveni. Sur la solo, e su la globo, un manxa negra enorme. La ombra, sin duta, de la ojeto.

Me ia prosimi con cautia. Lo ia es plu semblante un buco sin fondo plu ca un ombra. Me ia jeta mea teleta a en: lo ia pare engolida par la vacua, canselada par un goma nonvidable.

Lo ia es un poso, sin duta. Un poso de un desuple de metres de diametre, esistente sin alga causa.

Me ia es tan fatigada, previdente felis ce me vade a via, tal ce an me ia pensa alora jeta me a en per desapare.

Me no ia pote completi esta jesti sin razona an pico, sin evalua la resultas – resultas cual, an tal, me no ia es capas de imajina.

Tre dias ia es nesesada afin me colie tota mea coraje e deside forsa la buco negra.

Lo ia es la fini de la dia, e me no ia vole pasa un plu note asi. Me ia avansa asta la borda de la sirculo, me ia reteni mea respira. E me ia salta.