A la dia seguente, la xicos ia velia con la leva de sol, ia prende sua bagajes, e ia vade a la porto (si on pote nomina tal a la loca de la plaia de arena con tre barcos peti), ia prende un e ia dirije se a la Isola Negra.
“Oji comensa un aventura nova de la Club de la Marcia!”, Eneko ia cria.
“Silenti!”, Elisenda ia dise. “Esce tu vole ce Alfonso escuta nos?”
Pos un ora los ia ariva a la isola, e los ia desembarca, lasante la barca nodada a un arbor.
“Nos debe vade detra la castel”, Joan ia dise. E el ia comensa pasea, a sirca acel construeri de la eda medieval cual ia es, on debe dise, tre bon conservada.
Los no ia nesesa multe tempo por vade detra la castel, e lo es ala do los ia instala sua tendas.
“Bon”, Luca ia dise en cuando el ia estende se. “Nos ave la tendas instalada, ta ce nos visita la castel!”
“Ta ce nos vade!”, Joan ia dise, e totas ia comensa xerca un porta per entra.
“Xicos, vos debe velia!”, Alfonso ia dise en cuando el ia bate la porta de la sala de dormi con la sola grupo de xicos ce no ia desende per la come de matina.
Preocupada, car los no ia responde pos alga minutos, el ia abri la porta con la clave xef.
“Merda!”, el ia dise. “E la jenitores ia preveni me!”.
Un nota ia es sur la cama de un de la xicos:
“Nos ia vade visita la Isola Negra. Tu pote segue con la ativias e lasa nos libre, car no tu no nos vole ce nosa jenitores sabe ce tu ia perde ses xicos, no?”
“An los es xicos o mafiores?”, el ia pensa.
La nota ia segue:
“Nos va reveni un dia ante la fini de la campa, asta alora, no cura per nos”.
Alfonso ia regarda la isola tra la fenestra:
“Ta ce los es bon, Senior”, el ia dise. E el ia abandona la sala e ia comensa la ativias con la otras.
La Club de la Marcia ia comensa sua visita a la Castel Negra, cual ia es, sorprendente, en un state perfeta.
“Lo sembla ce ancora algun abita asi”, Eneko ia dise.
“Me ta dise la mesma”, Itxaso ia ajunta. “Esce esta castel no ia es abandonada… cuando lo ia es abandonada, Joan?”
“E perce tu demanda me?”, Joan ia responde. “Esce me es la Vicipedia o alga cosa tal?”
“Si”, la otras ia dise a la mesma tempo.
“Bon”, Joan ia dise sin sabe como interpreta acel responde, “la castel ia es abandonada en la 16esim secul, e on no conose un abitor pos acel tempo”.
“E esce un castel abandonada en la 16esim secul ave, normal, un aspeta tan limpa?”, Itxaso ia demanda.
“An mea sala de dormi no aspeta tal pos limpi lo”, Eneko ia dise.
“Lo sembla ce tu abita en un porceria”, Luca ia ajunta.
“Me crede ce un porceria es plu limpa ca mea sala de dormi”, Eneko ia responde.
E totas ia comensa rie.
La xicos ia deside come la come de sera e vade dormi. La dia seguente ta es multe interesante…
Esta paje es presentada con la lisensa CC Attribution-Share Alike 4.0 International.
Lo ia es automatada jenerada de la paje corespondente en la Vici de Elefen a 14 setembre 2024 (11:07 UTC).