Capitol 1

Joan Tardavenida ia entra la auto de sua jenitores.

“A esta ves,” Marina ia dise, “per favore, a esta ves no fa alga cosa par cual tu va fini en la jornales”.

“Ma me nunca ia fa alga cosa per fini en la jornales,” Joan ia dise, “me sola ia diverti en la vileta con mea amis”.

“Me sabe lo”, Pedro ia responde, “ma tu sabe ce tua madre cura per tu”.

“Bon,” Joan ia ajunta, “me va proba resta calma en la Vileta de la Marci”.

“Bon, tu ia dise lo”, Marina ia responde con un surie bizara. “A esta ves, on no vole es vidente la televisa e ce tua fas apare ala”.

“A la Vileta de la Marci!”, Pedro ia cria con joia.

“Ie! A la Vileta de la Marci!”, Joan ia responde sin multe zelo.

---

Pos ariva, la amis de Joan ia apare en sua casa.

“Alo, Joan!”, Elisenda ia dise.

“Alo, alo!”, Marina ia dise a totas. “Lo es multe bon ce tota vos es asi, car me ia parla con tota vosa jenitores, e me va dona vos un nova!”

“Un nova?”, Eneko ia demanda surprendeda.

“Si”, Marina ia responde. “Ta ce vos senta”, el ia ajunta.

Pos cuando totas ia es sentada, Marina ia comensa parla.

“Ante esta estate, me ia parla con vosa jenitores e tota nos ia acorda ce, a esta ves, vos no va resta en la Vileta de la Marci.”

“Cual?”, la xicos ia demanda.

“Car sempre cuando nos lasa vos asi sola en la estate, vos fini par apare en la televisa, e tota nos teme cual ta pote aveni a vos, no ia deside ce vos va es, a esta ves, en otra loca”.

“Do vos va envia nos?”, Itxaso ia demanda.

“Vos va vade… a la Lago Negra!”, Marina ia dise ajitada.

“La Lago Negra?”, Luca ia demanda. “Esce lo no es a la otra lado de la provinse?”

“Si”, Marina ia ajunta. “La Vileta Negra ave un otel de jovenes, con ativias diferente cual vos pote fa, en loca de investiga otra… cosas”.

Pos pensa alga secondos, Joan surie e ia dise: “Oce, ta ce nos vade ala!”

Elisenda, ci ia regarda el en cuando Marina ia es parlante, ia reconose acel surie.

“Bon, si tu va senti plu bon, Marina, nos va vade ala. Me es serta ce nos va ave un estate plu calma”.

La otras ia dise cosas simil, e pos prepara lor bagajes, los entra en la auto de Marina e Pedro, ci ia porta los a la Vileta Negra, locida a lado de la Lago Negra.

---

Pos alga oras, los ia ariva. La vileta ia es un vileta medieval, e de la otel de de jovenes, los ia pote vide la Castel Negra, locida en la isola Negra, cual ia es en la sentro de la lago.

“Los no ia ave multe imajina, si?”, Luca ia dise.

“Bon, nos va lasa vos asi con la vijilor.

“Bonveni a la Campa de Estate en la Vileta Negra!”, acel joven ia dise con multe enerjia.

“Me es ja fatigada”, Eneko ia dise.

“Silenti!”, Joan ia dise. “A pos nos va parla”.

Pos la parla de bonveni cual la joven, nomida Alfonso, dise a la jovenes ci ia es ala (nosa amis e otra des xicos), cadun ia debe vade a sua sala de dormi, cual ia es compartida par ses persones. E, evidente, nos amis ia prende la mesma sala de dormi. Pos la come de sera, los ia reuni e Joan ia comensa parla:

“Nosa jenitores, credente ce nos va resta ocupada en un loca distante de nosa vileta, ia envia nos a otra vileta con multe cosas cual nos pote fa”.

“Como cual?”, Itxaso ia demanda.

“La Lago Negra es conoseda par sua lejendas”, Joan ia ajunta.

“O, si!”, Luca ia dise. “A este estate, otra aventura nova de la Club de la Marcia!”

“Atende, atende”, Joan ia dise. “Me no sabe cual pote ave ala, ma nos ave un lago con un isola do nos pote campa car, de asi, nos no pote vide cual es pos la castel”.

“Donce tu sujesta prende nosa bagajes e vade campa en la Isola Negra?”, Irati ia demanda.

“On debe esamina la isola ante fa lo”, Joan ia responde. “Ma pos esta, lo pote es un bon idea!”

“Bon”, Elisenda ia ajunta. “Car me no vole fa la ativias cual Alfonso ia proposa!”

“Me an no ia escuta cual el ia es disente”, Joan ia dise.

“O, la xico mal!”, Irato e Itxaso ia cria con vos ironiosa.