Filosofia de lingua franca nova

Filosofia de elefen

Me suspeta ce linguas tan simple e coerente como elefen no ta survive en la mundo real. La plu de persones no es sufisinte capas de constrinje se a la lojica. An esperanto ave multe parolas con derivas nonlojical, formida en la eda temprana de acel lingua, seguente idiomes slavica o franses. Ma esperanto ave un sintatica plu laxe ca elefen: la comprende de un frase en esperanto no depende de la ordina esata de sua parolas. Acel es surfasal plu difisil ca elefen, ma persones mestri plu rapida lo. Cisa elefen es tro simple. — Simon 2020/03/16 11:42

Esta cual tu ia dise es multe importante. Elefen ia nase con la idea de es un creol. Creoles es linguas simple, cual ave pico parolas e cuasi no terminolojia. Cuando me tradui testos (e tu coreti los), on pote vide como nos debe crea parolas nova o ajunta sinifias a parolas cual ja esiste. A veses, on ave un sola parola con multe sinifias car los es “sinonim” o ave un sinifia “multe simil”. A veses, lo es bon, car lo simpli la cuantia de parolas cual nos debe aprende. An tal, a multe veses, spesial si nos vole tradui un testo de elefen a otra lingua, on vide ce esta manca de parolas pote sinifia un manca de consetas.

• Si, e me sabe ce Jorj acorda aora sur esta. Un lingua tro simple es tro ambigua per ave multa valua pratical. — Simon 2020/03/16 13:44

La manca de libria en sintatica es alga cual pote causa problemes per mestri la lingua, spesial per parlores de linguas romanica (e si, an si la ojeto de elefen es es un lingua aidante internasional, on debe sabe cual es nosa “mercato”). Elefen no es tan regulosa como esperanto e lo es fundida sur linguas romanica, par esta, ci va es plu interesada par lo es o parlores de linguas romanica, o persones interesada en creoles.

• Me pensa ce Jorj no ia desira limita la interesadas a parlores romanica, ma esta es lo cual ia resulta, plu o min. Cuando nos ia es en la vici vea, un parlor romanica nova ta apare de ves a ves, ta scrive du o tre testos sin comprende ce la gramatica es diferente, e ta desapare denova. La plu de la persones ci mostra un interesa a elefen mostra lo per mera un tempo corta, regretable – cisa car los ia malcomprende la natur de lo. — Simon 2020/03/16 13:44

Per parlores de linguas romanica, multe strutures cual tu dise ce es “propre de elefen”, pare multe “englesin” (como Patrick Chevin e me ia dise) e par esta, los debe aprende los (cual es alga nonlojical perce “los parla lingua romanica e elefen es romanica”). Me no sabe si algun ci es interesada en creoles ia deside aprende lo, car los jeneral va aprende creoles cual ja es linguas simple, en loca de elefen.

• Nos risca crea mera un plu lingua aidante romanica. Elefen ave du cualias spesial: un estetica bela e un gramatica simple. Ambos cualias ia atrae me en 2008, e me ia labora per aumenta la cualia du – car en 2008 la regulas ia es tro surfasal esplicada, e alga de la paroletas funsional (como “ce”!) ia es tro ambigua, a la min per plase a mea mente perfetiste. E cisa par causa de mea interferes, elefen ia deveni tro “pur” per es pratical usable per persones normal… Me regrete ce me ia convinse Jorj a sutrae la fini “-r” de la verbos infinitiva: en 2008 me ia vide lo como un fator complicante, ma cisa lo ia es vera un cualia natural e usosa. — Simon 2020/03/16 13:44

Cuando me ia es scrivente esta, e relejente tua scrive sur esperanto, me ia recorda la elefanto, creada par Patrick Chevin. El ia dise ce el ia crea lo “per atenta solve alga problemes de rijidia sintatical, de esita sur la vocales final, de omonimia entre radises sufisada, e de un sistem de conjuga reduosa, fasilinte tal un espresa plu firma, fluinte e clar”.

• Si, me recorda bon acel projeta. Lo ia misca la flexablia de la gramatica esperanto con la estetica de elefen. Un idea fasinante, sur cual me mesma ia jua privata en la anios interveninte. — Simon 2020/03/16 13:44

Me crede ce esta pote es un resoma de alga problemes cual me mesma ia trova. Me esplica:

• esita sur vocales final: me sempre debe vade a la disionario per vide si la parola fini en -a o en -i. Sempre. A veses, lo es -a per nom e -i per verbo. A veses, lo es -a par ambos. E me crede ce a veses lo es -i per ambos. Ance con la fini -al e -in.
  • Ance me! Tu no va crede a cuanto veses me consulta la disionario en cada testo cual me scrive o coreti. Me scrive sin multe eras, sola car me teni constante un dito virtual en la disionario. Ultima, me sabe aora la formas e definis coreta per cisa la 20% parolas la plu comun, ma per la otras, me nesesa ancora regarda. — Simon 2020/03/16 13:44
• Conjuga: Tu conose mea problemes con conjuga, cual aora me comprende plu bon, spesial con stilos nondireta la pasada. Ma esta ia aveni car me ia segue studiante la lingua a cada dia (an si me me ia iritada e frustrada) e car tu ia esplica me pasiente cada problem. Esce otras va fa lo mesma? Si lo es un lingua simple, perce on ave tanta problemes per aprende lo?
  • Esata. Si on no abita en un comunia do on oia e leje la lingua a tota oras, aprende acel lingua es difisil, e persones va es malinflueda par sua linguas de nase. La comunia de elefen no es sufisinte grande. Esperanto domina, con sua comunia enerjiosa e cultur interesante cual atrae constante persones nova. Elefen no pote susede a lado de acel. Me ia partisipa en la developa de elefen como mera un diverti inteletal: me ia vide lo como un sistem cuasi perfeta, nesesante alga plu bonis per ateni un eselentia completa. Ma me ia crede nunca ce elefen va deveni popular. — Simon 2020/03/16 13:44
• E me volve clari asi, me parla cuatro linguas fluente, me pote comprende otra du sin aprende los e me ave un nivel media de otra. Me no ave problemes per aprende linguas. On pote dise: “la problem es ce tu ance debe aprende lo, studia lo, car lo no va entra a en tua mente sin studia”. Si, lo es ver, ma si lo ave esta difisilias multe persones va eleje otra lingua, an si lo pare plu difisil en la comensa.
  • Cisa un parte de la problem es la manca de un bon curso per comensores. An la pajes sur la gramatica es scriveda de un punto de vista (mea!) cual suposa ce on es un esperta de leje gramaticas e desira vide mera alga spesifas de detalias. Me no es un bon ensenior, car me no comprende fasil la modos en cual la mentes de otra persones funsiona. — Simon 2020/03/16 13:44
• Cuando tu mensiona mea “ce tu segue sieca tua abituas espaniol (o engles a veses) sin reconose la posiblia de era” tu debe pensa cual me ia dise a ante: lo es un lingua romanica e parlores de linguas romanica cambia de un lingua a otra sin cambia multe la strutures (sintatica), sola on nesesa cambia la vocabulo. Esta aveni car la sintatica (jeneral) de linguas romanica es cuasi la mesma. La rijidia en sintatica es, per me, alga cual pote es videda como un problem per ci aprende esta lingua. Car elefen es romanica, lo es fasil en la comensa per aprende lo, ma pos esta, ateni un nivel media o avansada es difisil e multe persones va prefere lasa lo.
  • La linguas romanica ave multe similia entre se, serta, ma los ave ance un sistem complicada de infletas cual permete un sintatica min rijida ca lo de elefen. (Los pote pone la pronom-ojeto ante la verbo sola car la pronomes ave formas spesial per la ojeto. Los pote omete la pronom-sujeto sola car la verbo mesma indica sua person.) La situa es como un balansa: a un estrema, on ave la linguas creolin con sintatica rijida; a la otra, la linguas natural con sintatica natural. Un lingua aidante nesesa eleje a cual estrema lo vole senta, e elefen ia eleje la sintatica rijida. Esta plase a persones tecnical como programores e matematicistes, min a artistes, ma ambos tipos es atraeda par la estetica estracomun de elefen. Ma no lingua pote esiste simultan a ambos estremas de la balansa. — Simon 2020/03/16 13:44

Esta rijidia de sintatica es, per me, alga cual pote es videda como “englesin”, car en engles lo aveni tal. En linguas romanica, on no ave tanta rijidia e no debe pone la pronom sempre (si, lo aveni en creoles car on ave no conjuga ma per la plu de persones, la relata la plu prosima va es con engles e no con creoles). Lo aveni ance con la parola “cual”, sur cual me ia ave problemes en la comensa. En linguas romanica on usa sola QUE/CHE o simil e en elefen es divideda en du parolas (como en engles).

• Ma la gramatica de la linguas romanica ave ance otra cualias complicada cual compensa per la ambiguia de QUE/CHE, per esemplo: verbos sujuntiva, jeneros, la forma QUI en franses, etc. Cuando tu dise “englesin”, cisa tu intende vera “simil a un lingua isolinte”. Elefen mostra alga de la tendes de un tal lingua; esta es un parte fundal de sua desinia. Jorj ia dise ce orijinal el no ia desira an sufisas, car on pote espresa “acual” como “de acua”, “caseta” como “casa peti”, “saltante” como “ci salta”, etc. (Evidente acel no ta funsiona bon en pratica.) — Simon 2020/03/16 13:44

Otra cual me vide como englesin es esta: engles ave un gramatica simple (ma rijida) cual es combinada con multe parolas (tal lo pote espresa tota ma esta fa ce engles es fasil per ave un nivel basa e multe difisil per ave un nivel multe alta). Elefen es simil en sintatica ma la vocabulo es multe simple donce on no debe aprende multe parolas.

• Si, donce perce elefen no es fasil per mestri? Me ia oserva jeneral ce la persones ci deveni la plu capas de espresa coreta en elefen es los ci parla esperanto, o ia studia lo a alga tempo pasada. Ma la oserva no es sempre valida: tu ia studia ido, un lingua cual esije an plu esatia analisal ca esperanto, ma tu luta en la gramatica de elefen. Cisa la fasilia cual me persepi en elefen es mera un ilude causada par la combinas de mea sabes profonda de engles e esperanto. Ci sabe? — Simon 2020/03/16 13:44

Me pensa (e cisa lo no es ver) ce persones ci aprende linguas aidante internasional (no linguas construida como quenya) frecuente fa lo car los es “plu simple ca aprende otra linguas natural”.

• Serta esta es vera en esperanto. Me ia encontra multe persones ci parla esperanto en modo fluente ma ci ia dise a me ce los ia es completa noncapas de mestri linguas natural a scola. — Simon 2020/03/16 13:44

La plu de los va eleje esperanto car lo ave un propaganda multe bon pd, lo no es sola la lingua, ma la idea retro lo: un lingua “neutral”, internasional con un comunia con un ideolojia simil (pas, unia, no bordas). Lo es fasil, regulosa, “neutral” e ave un sistem de crea de parolas lojical. E plu, lo ave persones con ci on pote usa la lingua, on ave leteratur e obras scriveda par esperanto e ativias a estra interede. Otras pote eleje o ido (me ia aida multe en la promove idiste ante eleje elefen) o interlingua (cual es romanica, e an si lo ave un sistem min coerente, sua noncoeres aveni ance en linguas romanica, donce la parlores de lingua romanica no debe “aprende” un sistem “nova”, esta es relata con cual tu ia dise ce aveni en esperanto).

• Me pensa ce la sistem de ido es an plu coerente ce lo de esperanto, serta en la gramatica. La gramatica de esperanto conteni alga cosas bizara e vera difisil per esplica a comensores; ido es plu razonada. Contrastada, la vocabulo fundal de ido conteni plu radises: ido prefere jeneral ave un radis separada ca un parola composada. Esta fa ce lo es plu difisil per aprende ca esperanto. Elefen es a alga loca media entre la du en pertine a esta. — Simon 2020/03/16 13:44

On ave otra linguas ma los no merita es notada (novial, interlingua, volapuk, ave pico parlores e me crede ce sola kotava pote ave alga crese, spesial en paises noneuropean) car lo es vera neutral (an si lo no es fasil).

• Kotava interesa me a veses, ma sua promove no es aidada par la difisilia estrema de sua vocabulo e documentos esplicante. — Simon 2020/03/16 13:44

Si tu vide nosa comunia, on es (jeneral) tre persones: Jorj, tu e me. Jorj es laborante en la Vicipedia, me fa alga cosas ma sempre depende de tu per coreti los e tu fa tota. Si, on ave alga elefenistes ci tradui alga cosas, como Isaac ci es boninte la disionario en ivri, Mixel ci aida con testos e la disionario en franses e Harri Savolainen ci apare a alga ves per tradui testos. Ma esensal nos es tre persones.

• Esce la comunia en Facebook ave multe persones? Me refusa entra a la pajeria de Facebook! — Simon 2020/03/16 13:44

Me ia vide ce en la Vicipedia en Kotava, en la cuatro dias ultima, los es cuatro (e kotava es multe difisil), los ave testos publicada (o publicida, me debe vade denova a la disionario) sur terminolojia, disionarios en multe linguas e multe libros de leteratur. En la Vicipedia en interlingua los es tre (ma si tu vide sua paje en interrede, sola la consilio esecutal ave sinco persones), los ave obras de leteratur, gramaticas, e encontras estra interede. En ido, los es du tre persones laborante en la Vicipedia, ma los ave otra tri traduinte obras leteratural completa (no sola un testo, libros) e, an si sua asemblas es peti, en cada de los on ave plu ca ses persones).

• Kotava, interlingua e ido es comunias simil a la nosa. Los depende multe de la enerjia e interesa de un cuantia pico de persones. — Simon 2020/03/16 13:44

Me atenta responde a tua pensa “Me suspeta ce linguas tan simple e coerente como elefen no ta survive en la mundo real. La plu de persones no es sufisinte capas de constrinje se a la lojica.” e me demanda: “Cual nos vole fa con la lingua? Esce nos debe (cisa) cambia alga cosa? Cisa nos debe ajunta alga regularia (min) afin lo es plu atraosa? Esce nos vole ce plu persones parla lo e cambia la lingua afin lo pote “compete” contra otras? Cisa nos no cura sur esta?

• Me no vide la situa como un concurso con vinsores e perdores. Me vide lo como un comunia peti cual gusta fa sua propre cosa. Si otra persones vole ajunta se a nos, donce bon. Ma en pratica, no lingua aidante va susede plu ca esperanto, e on pote apena dise ce esperanto ia susede. La majoria de persones aprende linguas sola par nesesa, cuando los move a un pais nova, per gania un posto, o simil. Como tu sabe, me ia fa laboras grande per dona un coere a la forma presente de elefen (car me es perfetiste a grado bobo), donce me vide no vantaje en cambia la lingua: me ia ta fa no plu ca perde mea tempo. Ma me no es la dirijor de la lingua: sola la person la plu esperta sur usa lo. Si otras vole dirije nosa barco longo un otra rio, me ave no direto de oposa lo, e probable me ta vaga a via per farfulia en un otra lingua. — Simon 2020/03/16 13:44

Per favore, no interprete (perce no interpreta?) esta como un ataca contra tu o contra la lingua, me sola vole comparti (perce no comparte?) mea ideas. E, como me ia dise, si me parla elefen oji, lo es partal par tua aida e pasientia). — Chabi 2020/03/16 11:53

• Me vide lo como un bon conversa importante, e serta no como un ataca o un ofende. Grasias per la comentas detaliosa! — Simon 2020/03/16 13:44

Temas variosa:

• Comunia
  • Facebook: La comunia de Facebook es nonesistente. Si, on ave un paje ma la plu de usores es persones ci suporta otra linguas aidante internasional como interlingua. Los es en la paje, ma los no suporta la lingua, no usa lo e no crea usante lo.
    • Multe interesante. Me ia suposa naive ce un grupo peti usa lo como un foro per conversa sur temas dial, ma evidente no. — Simon 2020/03/16 16:10
  • La plu de la persones ci mostra un interesa a elefen mostra lo per mera un tempo corta, regretable – cisa car los ia malcomprende la natur de lo. Cual nos pote fa per esta? Cisa un curso per comensores?
    • Un curso ta pote esplica la natur de la lingua, cisa, ma la natur es alga teorial e tecnical, no? Lo ta interesa los ci studia interlinguistica, ma no la parlores comun. En fixes en mea computador, me ave detalias sur la gramatica e vocabulo de plu ca 200 linguas construida; a veses, me foraje pico entre estas e deveni acaso stimulada par un… per un dia o du, e mea interesa desapare a pos. Probable la esperia es simil con la plu de persones ci visita elefen en pasa. — Simon 2020/03/16 16:10
• Aspetas lingual
  • Ambigua en vocabulo: “Manca de vocabulo deveni en ambigua” (Un lingua tro simple es tro ambigua per ave multa valua pratical.)
    • Cual on pote per boni esta?
      • Esta no es un problem per elefen, car elefen ave aora un vocabulo eselente. Me ia parla teorial, sur la problem de compromete entre un vocabulo peti e aprendable e un vocabulo grande e nonaprendable. — Simon 2020/03/16 16:10
  • Me regrete ce me ia convinse Jorj a sutrae la fini “-r” de la verbos infinitiva: en 2008 me ia vide lo como un fator complicante, ma cisa lo ia es vera un cualia natural e usosa.
    • An tal, la lingua es aora tal tra un desenio. Nos no pote cambia lo, e la manca de “-r” no crea problemes – a la min, per persones ci comprende evita los. La problem es ce esta comprende es difisil per oteni, estra si on es ja abituada a la teoria, par esperanto o par la desinia de linguas per programi computadores. — Simon 2020/03/16 16:10
  • Problemes con la vocales final
• Elefanto: Lo ia misca la flexablia de la gramatica esperanto con la estetica de elefen. Un idea fasinante, sur cual me mesma ia jua privata en la anios interveninte.
  • Esce tu ta pote comparte alga de tua pensas sur esta? Cual cambias tu ia fa en privata?
    • Me no ave multe per contribui. Lo ta usa la vocabulo de elefen (plu o min) con un varia simplida de la gramatica de esperanto, per esemplo lo cual on vide en mondezo. Me ia es xef ocupada par la problem de distingui radises cual difere sola a sua vocal final en elefen: porta, porte, porto. Me no ia trova un solve sasiante a esta problem. — Simon 2020/03/16 16:10
• Me vole clari ce me no vole cambia la lingua, cisa on pote labora en acel “Manca de vocabulo deveni en ambigua”? Cual on pote fa afin elefen es bonida?
  • Personal, me opina ce elefen es ja cuasi tan bon como lo pote es. Per esta razona, me ia sesa proposa cambias a sua gramatica a alga anios ante aora. Si, lo ave ancora un o du cosas pico strana, como la usa de “afin” en loca de “per ce” e la manca de un pronom clar per “cual cosa?” – ma estas es minor e no problemosa. Ma lo pare ce nosa presenta de la lingua no sufisi per esplica como lo funsiona. E persones ave jeneral sola un interesa surfasal a lo, sin desira spende sua tempo en studia la teoria, an si nos ta furni un esplica briliante de lo. — Simon 2020/03/16 16:10
• Otra cual on pote fa ta es un esperimenta o cisa un “elefenido” per proba acel ideas cual on crede ce pote boni la lingua, si los es bon, on pote ajunta los a la lingua, si los no es tal, on lasa lo como lo es. Ma me vole dise ce esta ta es fada estra elefen, como un esperimenta.
  • Si, on ta pote, ma me no vide ce elefen ave problemes grande en se. — Simon 2020/03/16 16:10
• Me demanda: como on ta pote “regula” la fini de parolas? Cisa on pote ajunta un -r a la verbos o cisa fa ce la verbos fini pd en -i o en -a, e tota la ajetivos en -al o -osa o -in? Esce lo ta boni la lingua?
  • Un de la cualias cual ia atrae me a elefen a la comensa ia es ce lo ateni un belia estetical par no forsa finis nonatural a tota sua parolas. Lo pare bela a me ce “felis” fini con “-is”, per esemplo. Me pote imajina un otra forma, como “felisiosa”, ma lo ta pare fea. La verbos fini con vocales cual refleta sua familias etimolojial: “compara”, “prepara”, “repara”, “separa” parteni a un familia diferente de “pare” e “apare”, e diferente de “pari”, per esemplo. En mea juas a elefanto, me ia imajina la coda “-i” per tota parolas, ma esta no aida multe con “para/pare/pari”. — Simon 2020/03/16 16:10
• Esta es sola curiosia mea e lo ave no relata con elefen. Cuando tu ia dise: Si otras vole dirije nosa barco longo un otra rio probable me ta vaga a via per farfulia en un otra lingua. Cual lingua tu ta eleje? Cual tu crede ce lo pote es bon si lo no es elefen?
  • Elefen es la lingua aidante cual me gusta la plu, e esperanto es a numero du: par causa de sua cultur e comunia, lo senti solida e fidable. Me desira spende tempo en aprende frenkisch, car lo es esensal la corespondente de elefen per linguas germanica, e me ta boni tal mea conose de deutx. Me es sempre interesada a linguas oligosintesal, ma cuasi zero de los ave un vocabulo developada. Estra los, me ta gusta trova la tempo per mestri elet anta, cual ave un vocabulo bon developada e un gramatica bizara e fasinante (e denova mal esplicada – me suspira!), ma cual pare ave zero parlores pos la mori de sua creor en 2007. — Simon 2020/03/16 16:10
• Esce tu ia crea alga lingua a alga ves? — Chabi 2020/03/16 18:00
  • No, ma me ia pensa multe a metodos per crea linguas. (Me es un arcitetor, no un construor, on pote dise metafor.) — Simon 2020/03/16 18:15