La baroca, la Lumina e romanticisme
Baroca
La baroca es la periodo entre la fini de la sentenio 16 e la fini de la sentenio 17. La cualias xef de la leteratur de esta periodo es tristia e perde de valua de la vive en la tera, comparante la vive con un sonia de cual on va velia con la mori.
La baroca franses es nomida préciosité e es un periodo corta de cambia, representada par Du Bartas, Agripa de Aubigné e la obras prima de Corneille. En la sentenio 17, la leteratur franses ave un brilia leteratural grande, spesial en la teatro. An si los ave un leteratur baroca en la comensa, clasicisme ia domina. La poesia ave no figures importante, ma on pote nota la naras de Cyrano de Bergerac e La Princesse de Clèves par Madame La Fayette.
Pierre Corneille (1606–1684) es la padre de la trajedia franses. Sua obra xef Le Cid, inspirada en la teatro clasica espaniol, ia es criticada per no respeta la regulas. Con Jean Racine (1639–1699), la trajedia clasica ia vinse. Sua obra xef es Fedra, inspirada en la obra de Euripide. Molière burla debilias umana como avaria en L’Avare e la stupidia de la ricas nova en Le bourgeois gentilhomme. En 1644 el ia scrive sua obras mestral: Le Tartuffe ou l’Imposteur, un ataca contra la ipocritia relijiosa, Don Juan, e La misanthrope.
En Italia, la promove la plu importante de la epoca es marinisme, de cual la cualias xef es esajera e usa de antitese. La autores xef es Giovan Battista Marino (ci dona sua nom a la promove), Claudio Achillini, Pietro Francesco Orsini e Ludovico Aprosio.
En Espania, en prosa on nota Miguel de Cervantes, con sua obra Don Quijote de la Manga. Otra autores es Francisco de Quevedo, con sua obra El Buscón e poesia satira.
En poesia on ave du corentes: la culteranisme e la consetisme. En la prima, la forma es plu importante ca la contenida, e la autores xerca beli la realia usante un lingua con multe parolas latina, con influe de la préciosité franses. Sua representor xef es Luis de Góngora. La consetisme, par contrasta, fa ce la contenida domina supra la forma, usante poca parolas per espresa multe. Sua representor xef es Francisco de Quevedo.
En teatro on ave Lope de Vega, con sua comedia divideda en tre atas, cual no segue la tre unias clasica de tempo, loca e ata, e misca trajedia e comedia, testo e musica, e linguaje alta e basa. On pote nota El caballero Olmedo e Fuenteovejuna. Ance importante es Pedro Calderón de la Barca con El alcalde de Zalamea e El gran teatro del mundo, e Tirso de Molina.
En la leteratur en catalan, on pote nota Francesc Fontanella con Tragicomèdia d’Amor, Firmesa i Porfia (1642) e Lo desengany (1651).
En Portugal, on nota Bernardo de Brito con sua Monarchia Lusytana (cual António Brandão ia continua), Luís de Sousa con Vida de D. Frei Bartolomeu dos Mártires e Anais do Rei D. João III, e Francisco Manuel de Melo con sua Apólogos Dialogais. En epistolografia on pote nota António das Chagas con sua Cartas de Soror Mariana Alcoforado.
Lumina e neoclasicisme
La Lumina ia ave la ojeto de libri la om par la cultur. La ojeto ultima es fa ce cultur servi la popla par “lumina” la popla. Neoclasicisme ia aplica la prinsipes de la Lumina a la arte. Sua cualias es:
- La arte debe segue la normas de la razona.
- La obras debe ave un cualia universal.
- On debe ave unia de stilos, sin misca de poesia e prosa, trajedia e comedia, etc.
- La obra debe ave un ojeto moral e educal.
En Frans, on trova autores como Montesquieu (Lettres persanes en 1721), Voltaire (novelas filosofial como Zadig, 1747 o Candide, en 1759), Diderot o Rousseau.
En Italia, on vide ideas simil en Principi d’una scienza nuova intorno alla natura delle nazioni par Giambattista Vico e la Comedias de Carlo Goldoni La locandiera e I rusteghi.
En Espania, on nota en prosa Fray Benito Jerónimo Feijoo con Teatro crítico universal (1726–1739) e Cartas eruditas y curiosas, Gaspar Melchor de Jovellanos con El delincuente honrado e Canto para los astures contra los franceses, e José Cadalso, con Cartas marruecas, seguente la model de Montesquieu. On ave du scrivores de fable: Tomás de Iriarte e Félix María Samaniego.
En teatro, on nota Leandro Fernández de Moratín con obras como El viejo y la niña e El sí de las niñas, e Ramón de la Cruz con obras de cual sua trama aveni en Madrid como La pradera de San Isidro, El Prado por la tarde e El Rastro por la mañana. En la leteratur en catalan, on trova la Baró de Maldà con sua Calaix de sastre narante la avenis en Barcelona entre 1769 e 1819.
La Lumina ia ariva tarda a Romania par causa de la feudalisme autoritar e la domina osmanan. La mostra de Lumina plu unida e sistemosa es la Scola Transilvanian (Școala Ardeleană), un nom par cual on conose un grupo de inteletosas de Transilvania a fini de la sentenio 18 e a comensa de la 19. La obras istorial de la representores de la Scola Transilvanian mostra lo cual es la intende con cual los scrive, con un spirito militar, defendente la popla romanian e sua continua.
De esta scola on trova esemplos de obras istorial como:
- Istoria și lucrările și întâmplările românilor, par Samuil Micu.
- La Hronica românilor și a mai multor neamuri în cât au fost ele amestecate cu românii, cât lucrurile, întâmplările și faptele unora față de ale altora nu se pot scrie pre înțeles, din mai multe mii de autori, în cursul a treizeci și patru de ani culese (1808) scriveda par Gheorghe Șincai.
- Petru Maior con sua Istoria pentru începutul românilor în Dachia (1812), cual es la comensa de la istoriografia romanian moderna.
Ance on ave obras filolojial como la Elementa linguae daco-romanae sive valachicae (1780) scriveda par Gheorghe Șincai e Samuil Micu en latina, cual es la gramatica romanian prima primida, e ance la prima en la alfabeta latina.
Petru Maior ia scrive la Disertaţie pentru începutul limbei românești, en cual el afirma ce romanian veni de latina demotica, e ance Ortographia romana sive latino-valachica, una cum clavi qua penetralia originationis vocum reserantur (1819), en cual el ia introdui la leteras ș per /ʃ/ e ț per /ts/.
Preromanticisme
Preromanticisme ia comensa en Deuxtland e England, e ia defende la sentis e sua importa como utiles per conose, superior a razona. Lo ia developa en la tri ultima de la sentenio 18.
La cualias xef de preromanticisme es:
- La sentis es superior a la razona.
- Rejeta de tota “regulas”, an si alga scrivores preromanticiste ia aseta los.
- Contra la natur calma de la neoclasicistes, la preromanticistes ia prefere la locas mistica, como semeteros, senas de note e tempestas.
En Deutxland, enemi de Frans, on vide como la patriotisme leteratural ia luta contra la influe franses en neoclasicisme. Contra la Aufklärung cual segue la influes franses, la Sturm und Drang ia apare, de cual la composadas es fundida sur tradisiones germanica e la cantas de Ossian. La Stürmer odia la regulas clasiciste e tota cual no lasa ce on espresa sua sentis.
On pote nota Goethe como autor importante de la leteratur deutx (e ance universal) con du grados en sua scrive: la prima es preromanticiste, con sua obra Die Leiden des jungen Werthers (1774); la otra, pos un viaja a Italia, ia deveni clasiciste ma sin influe franses. De esta eda es sua Iphigenie.
Frans
En Frans, on pote nota la autores preromanticiste seguente:
- Jacques-Henri Bernardin de Saint-Pierre (1737–1814), autor de la novela Paul et Virginie, con influe de Rousseau.
- Louis-Sébastien Mercier (1740–1814), disiplo de Rousseau, con obras como Tableau de Paris, ci ia promove la rompe con neoclasicisme franses en sua Essai sur l’Art Dramatique do el defende la crea de un teatro nasional vivente.
- Madame de Staël (1766–1817) ia scrive un studia fundal per la introdui de romanticisme en Frans, De l’Allemagne (1810), sur cual Napoléon ia comanda ce on xerca e destrui lo, provocante sua esclui.
- François-René de Chateaubriand (1768–1848) ci ia reclama la spirito de la eda medieval e cristianisme en sua obra Génie du christianisme.
- La baron Auguste Creuzé de Lesser (1771–1839) ia revive la nara medieval, rescrivente en un epica longa la sicle de Arturo, la Amadís de Gaula e la Poesia de Roldan, evocante en otra obras sua la Romancero e la Poesia de Mea Cid.
Italia
En Italia, on nota:
- Melchiorre Cesarotti (1730–1808) ci ia tradui la Poesia de Ossian par James Macpherson.
- Vittorio Alfieri (1749–1803), un esemplo de preromanticisme en Italia plu par la contenida ca par la forma de sua obras, de inspira clasica.
- Ippolito Pindemonte (1753–1828) scrive sua melancolia en Poesie e Prose campestri.
- Ugo Foscolo (1778–1827), libraliste escluida en London, do el ia scrive sua poesia Dei sepolcri (1807) e sua novela Ultime lettere di Jacopo Ortis (1802–1803).
Espania
En Espania on nota José María Blanco White, ci ia scrive en engles e en espaniol e ia valua la leteratur medieval.
Romanticisme
Romanticisme es un promove cual ia nase de la crise cual ia apare en ideas e estetica. Lo ia protesta contra la valuas poneda par la burjesia (capitalisme, produi e valua de la mone). Lo ia defende la potia creosa de la spirito e la direto a imajina, sentis e pasion supra la razona. Ance libria ia es importante, parinte la rejeta a realia e la fuji tra imajina, miscante tota la jeneros e la espresa de sentis como un cualia xef.
Romanticisme en Frans
Romanticisme en Frans ave, en la comensa de la sentenio 19, la obras poesial Méditations poétiques par Lamartine, en 1820, e Contemplations par Victor Hugo en 1856. Victor Hugo, ia scrive tota la jeneros. Como autor teatral, Hernani (1830) ia es la comensa de la teatro romanticiste. On pote nota sua novelas Nosa Seniora de Paris (1831) e La miseras (1862).
Romanticisme en Portugal
Almeida Garrett e Alexandre Herculano ia introdui romanticisme en la leteratur portuges, spesial con la publici de la poesia Camões par Garrett en 1825 pos un viaja a England, do el ia aprende la estetica romanticiste. Otra autores es Camilo Castelo Branco e Júlio Dinis.
Romanticisme en Espania
En romanticisme espaniol on vide jeneros e autores diversa. En naras on ave Gustavo Adolfo Bécquer, ci ia scrive lejendas e José Zorrilla, ci ia compila lejendas tradisional espaniol.
En poesia naral on nota José de Espronceda, con El estudiante de Salamanca. Un otra jenero es la articles sur costumes, con Mariano José de Larra como figur xef. El ia defende la progresa en sua article e ia critica la espanioles, sua defetos e costumes, como on pote vide en articles como Vuelva usted mañana.
Ma en Espania, la poesia de romanticisme no ia vinse asta la desenio de 1830. En la media de la sentenio on vide como un otra promove, la realisme, ia apare e la plu bon poesistes romanticiste, Bécquer e Rosalía de Castro, ia scrive cuando romanticisme ia fini.
La tema xef es ama pasionosa e, a multe veses, nonposible; mori, videda como libria e positiva, e temas sosial e political, con atende spesial a libria.
La autores xef de poesia de romanticisme espaniol es:
- José de Espronceda, con obras como La canta de la pirata.
- Gustavo Adólfo Becquer, con sua Rimas e Lejendas.
- Rosalía de Castro, ci, an si el ia scrive en espaniol, es un figur xef de la Rexurdimento galego, con obras en galego como Cantares galegos e Follas Novas. Sua obra en espaniol es A orillas del Sar.
En teatro on nota:
- El Duque de Rivas.
- Gertudis Gómez de Avellaneda, con Baltasar.
- José Zorrilla con Don Juan Tenorio, fundida sur El burlador de Sevilla par Tirso de Molina e No hay deuda que no se pague ni plazo que no se cumpla par Antonio Zamora (sentenio 17).
Romanticisme en Italia
En Italia on trova elementos romanticiste en Ugo Foscolo, ma los es liada a neoclasicisme. La comensa vera de romanticisme italian es 1816, con la publici en janero par Madame de Staël de un article en la Biblioteca Italiana (Sulla maniera e utilità delle traduzioni) en cual el ia invita la italianes a conose e tradui la leteratur stranjer per renovi sua cultur. En acel anio, Giovanni Berchet ia scrive lo cual ia deveni la declara de romanticisme italian: la Lettera semiseria di Grisostomo al suo figliolo, en cual el ia loda la corente leteratural nova.
Alga scrivores ia fundi en 1818 la revista Conciliatore, dirijeda par Silvio Pellico con Ludovico Di Breme, Pietro Borsieri, Giovanni Berchet e Ermes Visconti. Lo ia vole reconsilia la rexerca siensal con la leteratur, ma lo ia es cluida par la osteraiceses en 1819.
En cuando esta ia aveni, la ideas prima de la Risorgimento ia es estendente en Italia, a cual la produi de romanticisme italian ia es liada. Alessandro Manzoni ia es multe importante car el ia promove la jenero de la novela istorial. En la poesia on nota Giacomo Leopardi.
Romanticisme italian ia es xef la espresa de la ambiente istorial e sosial nova de la burjesia, cual ia developa. Esta promove ia parla en Italia sur la nasionalia e la popularisme cual ia es contra la esperias de la sentenio a ante.
Romanticisme en Romania
Romanticisme apare en la leteratur romanian en la sentenio 19, ma no como un revolui leteratural e no contra clasicisme. La idea “romantica” ia apare en la obra de Dinicu Golescu, Însemnare a călătoriei mele (1826) e la terma “romanticisme” ia es usada en 1835 par I. Heliade-Rădulescu, ci ia usa lo per nomi un scola leteratural.
On vide tre grados en la evolui de romanticisme romanian:
- La desenios de 1830 e 1840 con autores como I. Heliade-Rădulescu, Gh. Asachi, V. Cârlova, e Gh Gr. Alexandrescu.
- La grado du comensa a 19 marto 1840 con la publici prima de la revista Dacia.
- La grado final es formida pos la revolui de 1848 e continua asta la Gera Mundal Prima.