5: Boni un bon cosa
En mea article presedente en esta serie, me ia descrive alga linguas oligosintesal – de cual sua vocabulo es asemblada de un cuantia multe peti de pesos fundal – e me ia nota ce la sinifias de parolas construida par un tal sistem pote es difisil per predise: posiblia-similia-sielo ia sinifia “libria” en un esemplo.
An tal, on ave un tal lingua cual ia ateni un susede notable, atraente un comunia relativa grande de manicas – de ci multe es ance esperantistes – e esta es tocipona (toki pona), publicida par Sonja Lang enliniada en 2001 e en forma pico revisada como libro en 2014.
En termas rigorosa, nos debe nomi lo oligoanalisal o oligoisolinte, car lo trata cada brice de construi semantical como un parola autonom. La dialeto ofisial definida en la libro ave 120 tal elementos, an si un de estas ave la sinifia pratical nonusosa “interata con la libro de tocipona”, cisa ajuntada per remente on a no regarda la cosas en modo tro seria. Un plenimano de morfemes de varias plu temprana de la lingua resta ance usada, e la disionario resente publicida par Lang inclui alga plu parolas cual apare frecuente en la comunia, como tonsi “nonbinar, transjenero”.
La responde de tocipona a la problem de nomi cada cosa en la mundo es an no atenta esta. Inspirada par la dau, e par un primitivisme antropolojial cual vide cultures natural como superior ca sivilia moderna, sua filosofia es ce min es plu e ce on ave simple no nesesa de distingui patos e gansos. Consetas redui a sua composantes, e on nesesa refere sola a acel composantes cual es pertinente a esta momento. La contesto governa, e on dise ce esta aida crese la consensia completa en modo medital.
Ma esta lingua es ance dulse e divertinte, par intende: sua presenta orijinal ia sujesta ce “on ta pote imajina cuasi un raza de creadas peti de cartun ci parla en tocipona”. “Peti” es lili; “susia” es jaki, sonante como la parola engles yucky con la mesma sinifia; la parola de blasfema es pakala, de bagarap “asidente, rompeda” en pisin (la lingua xef de Papua Gine Nova), cual mesma veni ultima de bugger up en engles. La sistem xef de conta sesa a 2, e la parola per “mano” pote es adotada per representa 5 cuando nesesada. Cualce cosa plu ca 2 es esensal mute “alga, multe”.
En intervisas, Lang dona comun la esemplo jan pona, leteral bon person, cual es la modo costumal de dise “ami” (un person ci es bon a on); simil, jan ike mal person pote sinifia “enemi”; e la conseta de un “mal ami” es alora clar videda como autocontradisente. pona – derivante de bona en Esperanto – pote sinifia no sola “bon” ma ance “positiva”, “pasosa” e “simple”, donce toki pona es o “la lingua de bonia” o “la lingua simple”.
Sua gramatica usa un cuantia peti de paroletas spesial per marca la comensa de cada parte de un frase. Per esemplo, li (la pronom esperanto li “elo” con rol nova) siniali ce la parola seguente es la verbo (o un ajetivo usada como verbo) – multe simil a i (derivada de he “elo” en engles) en pisin. Asi me glosa lo, en modo laxe, con “fa”:
jan ni li pali.
person esta fa labora
“Esta person labora.”
ma kasi sina li suli.
tera planta tu fa grande
“Tua jardin es grande.”
(La pronom sina “tu”, en loca ajetival pos la nom, gania un sinifia posesal: “tua”.)
E la paroleta e (asi glosada con un flexa duple) introdui la ojeto direta de la verbo:
jan mute li lukin wawa e ma kasi sina.
person multe fa vide forte » tera planta tu
“Multe persones regarda intensa tua jardin.”
Un cualia strana es ce li debe es ometeda si la sujeto conteni sola la parola mi “me” o sina “tu”. Esta refleta denova la usa de i en pisin:
sina jo e ma kasi suli.
tu ave » tera planta grande
“Tu ave un jardin grande.”
Bizara, an tal, preposadas es tota no marcada, e car preposadas es comun reusada en otra roles, confusa es capas de apare a veses. La esemplo clasica es:
mi pana e tomo tawa sina.
me dona » strutur movente tu
“Me dona (libri, envia, etc) tua auto.”
– o –
me dona » strutur a tu
“Me dona a tu un casa.”
Esta nesesa de indica direta la sintatica en tocipona enforsa un strutur multe simple de frases. La lingua ave no proposas suordinada. Per dise “me sabe ce tu dormi”, on usa du frases, costumal separada par un dupunto:
mi sona e ni: sina lape.
“Me sabe esta: tu dormi.”
Nomes ave no plural; verbos ave no tempo. Per indica tempo, on pote usa un formula de contesto – un preambul cual fini con la paroleta la:
tenpo ni la sina sona.
tempo ni (contesto) tu sabe
“Aora tu sabe.”
Sintagmas nomin e verbin grupi sempre a sinistra:
jan pona mute
(person bon) multe
“multe bon persones”
Per dise “person multe bon” (o egal “persones multe bon”), on usa la paroleta pi, cual es esensal un preposada pupetin, insertada sola per crea un plu formula nomin:
jan pi pona mute
person de (bon multe)
“person multe bon”
Tocipona es notable espresosa. pona no es la sola parola cual covre un campo larga semantical: kon sinifia “aira”, “respira”, “esense” e “spirito”; lipu indica cualce ojeto plata, incluinte biletas, libros e an – metafor – locas de rede. Ma alga parolas es plu spesifante: uta es “boca” e moli sinifia “mori”.
Como en la plu de linguas oligosintesal, cuasi cualce parola pote es empleada en cualce clase sintatical. Per esemplo, moku (de mogu mogu “mastica” en japanes) sinifia “come, bevi” cuando lo es un verbo:
ona li moku e kala.
“Lo come pexes.”
Como nom, lo pote sinifia o “(la ata de) come, bevi” o, confondente, “comable, comeda”:
ona li moku.
“Lo come.”
– or –
“Lo es (un) comable.”
An si lo es vera ce la ambiguia de tocipona rompe la mesurador a tal veses, on ia inventa un monton usosa de espresas costumal cual es fasil per recorda, a la min pos cuando on ia mestri la 120 parolas:
- pona lukin bon (en modo de) vide = “bela”
- toki wawa comunica forte = “cria”
- awen sona continua sabe = “recorda”
- sin nasa nova (en modo) strana = “surprendente”
Natural, en un lingua con vocabulo tan pico, lo es lojical ce la parolas es ance tan fasil como posible per pronunsia. Tocipona usa sola 14 sonas organizada en silabas trivial como ma, en e jan; -n es la sola consonante con cual un silaba pote fini. La plu de parolas ave du silabas; un cuantia peti ave tre. La reduis fonetical pertine ance a nomes propre (cual no parteni a la lista de 120 parolas): Afganistan es ma Akanisan e elefen es nomida toki Elepen.
La parolas mesma es prendeda (e alora simplida) de linguas diversa cual inclui franses acadian, corvatsce, nederlandes, suomi, cartuli, xines e esperanto.
Lo es interesante ce an si on ave plu ca 6500 parolas posible de du silabas, alga duples de parolas real difere par sola un letera: poka “lado”, poki “contenador”; seli “calda”, selo “pel”; e – xocante, ma cisa en refere intendeda a iin e iang – ala “zero, no cosa, no”, ale “tota, cada cosa”. En fato ale ave la forma alternativa ali, per garda contra malcomprende en parla.
Multe persones ia esperimenta con la desinia de tocipona, o per simpli an plu lo – un person ia redui lo asta a un “lingua furtiva” de sola 99 monosilabas nomida ta ti – o per atenta plani a via la ambiguas. Ma ta ce nos avansa rapida tra du desenios e regarda un duple interesante de tociponidos (como on nomi umorosa esta desendentes), de cual ambos ia es proposada a media de 2020.
La prima es mini, par S. C. Gruget. Esta es un redesinia esperimental, un demostra de conseta, cual atenta es “la lingua la plu simple e peti per comunica umana”. Lo conteni plu o min la mesma cuantia de parolas como tocipona (122), ma tira los cuasi sola de la linguas romanica e engles, constrinjente los a 19 sonas (sinco plu ca tocipona): fogo “foco, calda”, mebi “cisa”, savi “sabe”. Triste, la parola per “person” es man, cual sinifia “om” en engles.
Gruget ia comensa con la vocabulo tocipona, ia sustitui un corespondente engles-romanica per cada parola, ia dejeta alora los como “avia”, “vende”, “sesal” e “jala” cual ia pare tro spesifada, e ia ajunta final alga parolas nova con sinifias cual ia es fasil per estende metafor. Un esemplo en esta categoria ultima es eleki “eletrical, enerjia, dijital, enliniada”.
Ma la cambias la plu interesante en mini es trovada en la gramatica. Lo solve la problem de “come/comeda” par reusa e (cual marca ancora ance la ojetos direta, como en tocipona) como la verbo “es”, do lo contrasta con i, la marcante de verbos (egal a li en tocipona):
Si i manja.
“Lo come.”
Si e manja.
“Lo es (un) comable.”
(La letera j ave sua sona engles.)
La lingua introdui proposas suordinada, ma – denova suposable inspirada par parolas como que en espaniol – lo reusa la pronom demandante ke como e un pronom-sujunta (cual en “la casa cual Jac ia construi”) e la sujunta per introdui la parla reportada (ce en “me sabe ce Jac ia construi la casa”). Esta es ultima nonambigua, ma lo es un modo multe european de organiza la mundo.
Mini atenta crea un sistem plu oportun per conta, ma limita se a la base sinco: 5 es mano (cual sinifia ance “mano”, esata como luka en tocipona); 6 es mano anda uno sinco-e-un; 10 es uno nulo un-zero; e 19 es uno mano anda fo un sinco-e-cuatro. Esta metodo es serta plu usosa ca lo de tocipona, ma lo es ancora multe parolosa, e me suspeta ce la stimula de sua novia ta vapori rapida a via.
La lingua reconose la problem “cuando un preposada no es un preposada?”, ma car la gol xef de sua desinia es minimi la cuantia de parolas, lo reusa a la min tre de sua preposadas como verbos e como marcantes de tempo (go “[en dirije] a, vade” per la futur, de “de” per la pasada) e aspeta (en “en” per la continuante):
Mi go vole e si.
me vade vole » lo
“Me va vole lo.”
Cuando usada como verbos o ajetivos, esta parolas debe donce es duplida en modo strana per resta comprendable:
Mi go-go vole e si.
me vade-vade vole » lo
“Me vade volente a lo.”
Mi vole e uti go-go.
me vole » util vade-vade
“Me vole un auto.”
Cuando me ia leje prima la documentos clar scriveda sur mini, me ia es multe impresada, ma plu me ia studia la lingua, min me ia trova ce me gusta lo. [NB: Lo ia es revisada e sustantial bonida pos la scrive de esta article.] Contrastada, mea opina inisial alga favorente sur toci-ma (toki ma), la “lingua de mundo” creada par Shevek Urrasti (nom falsa) e developada par otras, ia boni sempre con la pasa de tempo.
Toci-ma resta tan prosima como posible a tocipona, ma con gramatica estendeda e plu ca la cuantia duple de parolas. Lo ajunta multe sinifias esensal como:
- into “loca, spasio” – jeneral, donce diferente de ma en tocipona, cual indica sola rejiones de tera su sielo
- soto “sinistra”, jupa “destra” e matija “media” – tocipona usa insa “interna” per “media”, ma esta es un rompetesta a veses
- leko “cuadro, cubo, scalera” – un parola desusada de tocipona, reviveda
- wisaja “vinsente”
- tewe “aderente, liada”
- aja “vivente”
Lo separa ance sewi “santa” de wi “alta”, lo cual sutrae instante un peson de confusa torpe.
Plu, esta parolas nova es derivada de un colie de fontes multe plu diversa ca en tocipona; fundal, cualce lingua sur la Tera, de amarina a zulu, pote ofre un parola si lo “aspeta bon” a la desinior – e “Shevek” pare posese un talento per esta.
Toci-ma solve la problem de “come/comeda” en modo plu simple ca mini. A la paso prima, lo defini ce moku es fundal un verbo; e sua regulas clar per deriva dise ce, cuando on usa un verbo como un nom, la nom sinifia la “ojeto jeneral” de acel verbo, donce “comeda” en esta caso. Per la sintatica, toki-ma prende mera la verbo esistente lon “esiste, es presente” e estende lo a la sinifia “es (acel o tal)”, espresante la completinte como un averbo o con pi:
ona li moku.
“Lo come.”
(moku es la verbo.)
ona li lon moku.
“Lo es (un) comeda.”
(lon es la verbo; moku es averbal.)
ona li lon pi moku pona.
lo fa es de come bon
“Lo es un bon comeda.”
Lo fronti simil la ambiguia de preposadas par proibi direta la usa de esta parolas en cualce modo otra ca como preposadas. En ajunta, lo permete usa la preposada su “como” con la sinifia “ca” en comparas de nonegalia:
ni li lamo sata su na.
esta fa longa plu como acel
“Esta es plu longa ca acel.”
(La noncapasia de tocipona per espresa comparas es malfamosa dolosa – an si lo es un parte intendeda de la vista reduiste de la mundo en acel lingua.)
Como mini, toci-ma inclui proposas suordinada, ma espresante los con la parola dedicada te:
ni li lon pi tomo te Jako li pali e.
esta fa es de casa cual Jac fa crea » [lo]
“Esta es la casa cual Jac ia construi.”
on li pali e tomo nen te on li wile.
el fa crea » casa par-causa-de ce el fa vole
“El ia construi la casa car el ia vole (acel).”
Lo ajunta an un sistem brava consisa de conta:
wan (1), tu (2), san (3), po (4), lima (5),
sesi (6), sepen (7), oto (8), newen (9), ten (10)
Esta article ia es prima scriveda en febrero 2021 (tu kilo tu ten wan) cuando toci-ma ia es ancora developante e asetante sujestas per bonis, ma a la fini de julio, on ia declara ce la lingua ia ateni un “varia alfa stable”, fisada per minima un anio, pos cual on va fa sola cambias minor (como ajuntas de parolas nova). Lo pare estrema prometente, e es serta un lingua cual merita esplora si tu es cualce interesada par esta tema.