4: Dise multe par poca

Un de la fatores par cual esperanto es relativa fasil per aprende es sua metodo de crea vocabulo nova par combina elementos esistente: domo “casa”, dometo “caseta”, urbodomo “ofisia de site”, samdomano “coabitor” e tal plu. Ma la cuantia de esta brices de construi ia crese sustantial tra la anios.

En 1887, la libro esperanto prima de Zamenhof ia lista pico plu ca 900 radises. Ja en 1894, sua Disionario universal ia ave plu ca 2 600, recolieda de publicidas en la anios interveninte. La Disionario de esperanto de Kazimierz Bein en 1910 ia conteni 5 000 lemas, la Disionario completa (o tal suposada) de 1930 ia ofre cuasi 7 000, e la edita de 2020 de la Disionario imajida completa presenta a nos cuasi 17 000, de cual multe es termas tecnical estrema rara.

Cuanto tal composantes – tal morfemes – es vera nesesada? Alga desiniores de linguas ia esperimenta con redui la cuantia a la grado minima. Esta sistemes pico es nomida oligosintesal, de radises elinica cual sinifia “composa poca”.

E cual sinifias importa sufisinte per merita sua propre morfem? Como de mundo on deside? Kah, un lingua alta developada, es acompaniada par un disionario estendosa de 10 000 parolas, composada de un lista de aprosima 425 elementos fundal cual inclui – alga nonespetada – “xiliante”, “juniper”, “mustela”, “cafe” e “asurda”.

Regardante la istoria, nos trova un sistem multe interesante en la lingua sona par Kenneth Searight en 1935. El ia prende la 1000 categorias semantical de la Tesoro famosa de Roget e ia siseli los asta sola 360 elementos. Tal, cada de esta radicales representa un campo de sinifias relatada tra clases sintatical diversa. Bi, per esemplo, sinifia “usa” o “util” o “par la metodo de”, e fa sinifia “risca” o “fortuna” o “cisa”.

Plu, el ia tende organiza sua radicales en sincuples semantical, tal ce los en cada grupo comparti la mesma consonante e vocal xef, como en la serie lu: lu “jua, sporte”, lun “asurda, trivial”, alu “ospita, invitada”, ilu “rie, joiosa” e ulu “malcondui, simia”!

La fasetas variosa de la sinifia de un radical mostra se cuando la radical apare en parolas composada: te es glosada como “mano, protende, prende”, e de esta Searight ia formi tal parolas como bute (odor-protende) “nas”, tebi (mano-util) “manico” e sute (flue-protende) “stalatita”. Tara sinifia “om grande”; rata sinifia “jigante”. Esta sinifias es alga capris e nonpredisable – un problem comun en linguas oligosintesal.

Como desiniores trata la taxe de eleje speles e pronunsias per sua morfemes?

Searight ia eleje ave 180 monosilabas como ba e ban, con 180 plu elementos dusilabal como aba, iba e uba. Par causa de esta, el ia debe complica plu ca ideal sua regulas de junta: ban + aba produi banyaba, per esemplo, cual es regretable un parola diferente de baniaba (ba-ni-aba). Ma a veses on pote videta etimolojias posible: lu es probable un trunca de ludo en latina o esperanto, e la vocal prima de ilu ia es cisa inspirada par la parola ilario.

La lingua nonlen par Krishna Amrito usa 210 silabas sinifiante en un matris cuasi plen poplada de 18 consonantes inisial con 12 codas: ba, bai, ban, bau, be, ben, bi, bin, bo, bon, bu, bun … Esta es merveliosa compata ma enorme difisil per memori, e ance no fasil es la distingui de tal duples como bayan e baiyan en parla. Alga de esta elementos es tirada, en forma torseda, de linguas european – ganwi (organo-vide) sinifia “oio” – e multe veni de xines, pe. rangau (natur-alta) “monte”. La nom nonlen sinifia simple nom-(de)-lingua.

Esta sistem ave un cualia saisinte cual pare evidente en retrospeta: lo permete la usa de termas internasional (o european, a la min) per consetas spesialida como cokolat, gitar, kilometer, plutonium e sosiologik cual on ta pote apena espresa clar con la silabas fundal. Cisa alga persones regarda esta como truco, ma si mera on evita parolas como medisin cual ta conflita con lo cual on pote construi de la matris oligosintesal, me dise ce lo es un bon solve.

An plu contraente, nos veni a vuyamu, un lingua par T F Yik cual ave sola 99 silabas, de cual cada es composada de un consonante e un vocal. Strana, lo peri un silaba par trata ma “cada” (engles: “each”) e mo “cada” (engles: “every”) como du consetas separada. Car no otra silaba sinifia “tota (regardada en junta)”, cisa la intende ia es ce mo ave esta interprete.

Sua silabas pare es intera apriori, e los ave sinifias primitiva como “grande”, “color”, “petra”, “acua”, “parte”, “fruta”, “fa” e “prende”. La vocabulo formida de estas pote es plu ca pico opaca, spesial en casos de astratas: yevado (leteral pensa-similia-monte) sinifia “respeta”, e “libria” es povade (posiblia-similia-sielo). La nom vuyamu sinifia “esta lingua”, leteral via-parla-esta.

Aprende la elementos es notable fasilida par un cualia bela: la consonante de cada silaba identifia un de cuatro categorias jeneral de sinifia – cosas, atas, descrives e relatas spasial/tempal – aprosima seguente la malconseta poplal de lo cual es sustantivos, verbos, ajetivos e preposadas, an si, en la sintatica de vuyamu, on pote usa cualce morfem per cualce funsiona.

En pertine a esta tema, la gramatica de linguas oligosintesal es no sempre spesial bon esplicada – lo pare a veses ce la desiniores ia es tro focada a la vocabulo. En alga casos on descovre ce la sintatica es futil ambigua, sin modo fidable de determina la strutur de frases. Per la lingua sona, la autor ia intende produi un lingua aidante internasional, ma sua labora ia sufri mal par es publicida en un libro multe tro corta per permete un presenta conveninte de la gramatica, e jeneral lo resta alga confondente en esta aspeta.

Cisa la plu estracomun de tota linguas oligosintesal es aUI par John Weilgart, un psiciatriste ci ia declara ce alga estrateran verde ia ensenia lo a el en sua enfantia. Lo ave sola 31 morfemes (con ance 11 otras no usada estra per formi numeros), de cual cada es mera un vocal o un consonante. La nom de la lingua sinifia “spasio-mente-sona” e donce “lingua cosmal”.

Leteras major indica vocales longa. La lingua es rica de vocales, en fato, con 12 tal sonas trovable entre la 31 elementos xef; simil, tota la 11 morfemes numeral es vocales nasal. Q ave la sona de ö en deutx.

Un frase tipal aspeta como esta:

bu wQv cEv nEm vem, Qg bu Ov rom Ib wom.
“Tu pote es multe ativa, si tu senti sana e forte.”

– leteral Juntada-umana Potia-state-ata Esiste-materia-ata Cuantia-materia-cualia Ata-move-cualia, State-en Juntada-umana Senti-ata Bon-vive-cualia Sona-juntada Potia-vive-cualia!

Weilgart ia publici un libro detaliosa sur aUI en la desenios de 1960 e 1970. Plu tarda, sua fia ia labora sur la lingua, e aora sua disionario conteni, stonante, 10 000 parolas – plu o min la mesma como Kah, ma construida de un repertorio de morfemes con min ca un desi de sua grandia.

Per pasa la tempo en un note sin dormi, on pote estende an plu la prosede de redui, meditante sur cual sinifias on ta pone en un vocabulo si on ta permete no plu ca (cisa) 20 tales. Como de tu, me, person, cosa, ave, pone, dise, senti, fa, vade, a, aora, no, mesma, tipo, util, rompe, calda, come e casa?

En mea article seguente, me va regarda un de la linguas pico la plu bon conoseda de mundo – tocipona, la lingua de bonia – e du de la linguas pico cual ia desende resente de lo.