simon.franova | La ajetivo “se”

• Autor: simon.franova
• Tema: La ajetivo “se”
• Data: 2008-09-22 17:28
• Mesaje: 2942 (presedente, seguente)

Alo a tota. Me vole sonda tu opinas de un demanda gramatical.

Frecuente, la sujeto de un frase reapare a un otra loca en
la mesma frase:
- me vide ME
- tu vide TU
- Maria vide MARIA

Cuando la sujeto es "el" o "los", nos fa un distingui:
- el vide EL = Maria vide la enfante
- el vide SE = Maria vide Maria
- el vide LOS = Maria vide la enfantes
- los vide EL = la enfantes vide Maria
- los vide SE = la enfantes vide la enfantes
- los vide LOS = la enfantes vide la instruores

La pronom "se" refleta la sujeto. Esta es clar e bon.

Nos usa la pronomes ance como AJETIVOS de posese:
- me vide ME manos
- tu vide TU manos

Ma cuando la sujeto es "el" o "los", nos NO distingui:
- el vide SE manos = Maria vide la manos de la enfante
- el vide SE manos = Maria vide la manos de Maria
- el vide SE manos = Maria vide la manos de la enfantes
- los vide SE manos = la enfantes vide la manos de Maria
- los vide SE manos = la enfantes vide la manos de la enfantes
- los vide SE manos = la enfantes vide la manos de la instruores

Resente, en la vici de LFN, on ia discute multe esta
nondistingui en la ajetivo "se". Esce el es clar e bon?

Un grupo de parlores ta preferi un sistem plu lojical e
espresante, en ce "se" indica sempre la sujeto, egal per
la pronomes e la ajetivos:
- el vide EL manos = Maria vide la manos de la enfante
- el vide SE manos = Maria vide la manos de Maria
- el vide LOS manos = Maria vide la manos de la enfantes
- los vide EL manos = la enfantes vide la manos de Maria
- los vide SE manos = la enfantes vide la manos de la enfantes
- los vide LOS manos = la enfantes vide la manos de la instruores

Un otra grupo ta preferi reteni la sistem de aora, car:
- la linguas romanica ave el;
- on no nesesa eleje entre la ajetivos "el" e "se": on dise
  "se" a cada ves;
- "el es el padre" pote fa pensa ce la person indicada par
  "el" es la padre de se!

La grupo prima responde:
- LFN es un varia SIMPLIDA de la linguas romanica;
- on debe ja comprende la difere entre la PRONOMES "el" e
  "se", donce la eleje entre la AJETIVOS es egal fasil;
- "el es se padre" sona ance strana, car la ajetivo "se"
  recorda tan forte la pronom "se".

Ce vos opina?

Simon