Washirei | Alga oservas supra la evolui de LFN

• Autor: Washirei (“igor_selva”)
• Tema: Alga oservas supra la evolui de LFN
• Data: 2008-08-18 14:48
• Mesaje: 2914 (presedente, seguente)

Alo a parlores de LFN,

Me scrive a esta lista a prima ves, ma esta fato no sinifia ce me es nova a LFN. Me es un membro de esta lista de tempo basta longa, de 5 anios.
Me recorda, ce cuando me ia enscrive me a esta lista, LFN ia ave ancora
un forma a alga grado diferente ce oji. Ma la cambias es multe bon e los beli esta lingua. Jeneral, es plasente oserva esta beli de LFN.
Alora en 2003, cuando per esemplo on vole espresa tempo pasada o futur,
on ancora no ia fa esa a modo "isolinte" con "ia" e "va", ma on ia ajunta
"-va" e "-ra" a radises.  Me recorda bon, ce alora ancora no esiste un modo nonreal. La aspeta de LFN ia pare a me un poca simil a Interlingua, donce
me ia es contente cuando LFN ia vade sur propre via a la dirije de linguas
creol. Resente me gusta spesial la apare de parolas "car" e "afince".
Los es multe bon. Ma a alga loca (posable en gramatica completa) en la rede me vide "afin", e me suposa ce la forma coreta debe es "afince".
Ance la parolas "nun"," algun","cadun" es bon, ma me no pote recorda esata,
si los ia es ja en esta forma de tempo longa o apare resente.
Me scrive aora, car me vide ce LFN deveni plu e plu bela, e aperi plu e plu multe persones ci usa el multe bon.
Me desira es, ce seguente posablia, LFN ta deveni pronto lingua stable, esta es, me no ta vole tro multe cambias e reformas en el.
Esta opina ave ance relata con la tema presente, supra la stablia de LFN a modo simil a "Fundamento de Esperanto".
Me comprende natur, ce alga bonis es frecuente nesesada, ma si LFN va es stable pronto en se aspeta bela, esa va es multe plasente per oios e oreas. Me dise esta, car cuando me compare LFN de alga anios pasada con
la state de oji, me ave a veses un impresa, como la lingua no ta es la mesma (o, plu bon es dise, como du dialetos de la mesma lingua). Me gusta multe la aspeta de oji e a fato, me no ta vole vide pos 5 anios seguente alga testos, ce clar ta es tro diferente de la testos de oji. Esta no vole es un critica de cambias ce es serta bon e probable nesesada, ma sola un desira. Per esemplo, si pos anios la rexercores de interlinguisme va compare testos de 2000 con aceles de 2010 e vide, ce esa es cuasi como du linguas, los pote ave un impresa, ce LFN es un de acel linguas aidante, ce cambia e cambia sin fini. Tal situa conserna per esemplo Novial de 1928, 1930 e de oji. Ma a mesma tempo, me comprende ce a alga veses alga cambia es nesesa, car esa es la via a perfetia e serta esa es un fenomena natural de cada evolui. Posable va apare ancora alga puntos detalos, en ce la usores de LFN va deside adota un solve, ce asta aora no es ja adotada.
Un cosa interesante es la infinitivo con "r" o sin "r", esta tema ia apare en mesajes resente, como me vide. Ance me a alga tempo pasada ia gusta usa "r" per infinitivo, ma resente evita el e usa sola en la caso de sustantivo. O, esa pote es, ce ance acel "r" a no tempo es nesesada. Posable LFN nesesa ancora acel tempo peti, afince on pote dise con cuietia
- LFN es ja prepareda con tota detales e on pote usa el sin cualce dutas
(o cisa, acel tempo ia ariva ja?)  E natur, resta ancora parolas siensal etc, ce debe es creada - esa es clar e me no parla de esta cosa, ma me parla spesial de cambias en gramatica o en parolas ce ja esiste. Donce, me espera, ce LFN ia oteni aora ja esta perfetia o es prosima a perfetia e la usores de LFN va pote cuieta usa se lingua sin diferes. Estas es sola me oservas durante la resente anios sin cualce ostina per mostra la via, sur ce LFN ta debe vade. Me gusta multe la LFN de oji.

Igor