Un disionario plu rapida

Me ia crea un prototipo de un xercador multe plu rapida, e probable min complicada per usa. A presente, lo suporta deutx, engles e franses. Si on tape alga leteras en la caxa, lo trova la parolas cual comensa con esta leteras, ma on pote ajunta alga otra sinias per spesifa plu detaliosa: clica “Aida” per la esplica. Me bonveni vosa opinas. — Simon 2020/05/31 18:09

• Lo pare bon ma me no ia pote asede a la spelador. — Chabi 2020/05/31 18:45
• Lo es sola un prototipo a presente. La spelador va es en un paje separada, ma me foca a la xercador per comensa. (Me ia sutrae aora la lia a la spelador, per evita confusa.) — Simon 2020/05/31 19:34

Me veni de coreti la presenta de parolas cual conteni leteras major (a ante, la xercador ia mostra frans en loca de Frans). E me ia cambia alga de la sinias spesial, afin los es plu fasil per tape en un telefoneta o tabletin. — Simon 2020/06/01 08:12

Me ia boni la presenta en telefonetas, e ia coreti du defetos minor cual ia preveni la xercador de inisia se en alga surfadores. — Simon 2020/06/01 09:11

• U la rapidia! Lo es un obra vera surprendente e eselente! Me ia xerca ance la traduis de nomes con Œ (œuf, oeuf) o con Ç (leçon), con É (Émilie), e lo funsiona multe bon (an si lo es pico plu lentida con parolas comensante con un vocal siniada)! Brava! — Mixel 2020/06/01 09:53

Me duta ce lo es plu lenta con parolas comensante con un vocal siniada. Si tu xerca étonné, la sistem simpli esta a etonne, cual es la spele usada en la datos. La datos inclui (como un campo minor) ance la spele coreta, afin la xercador pote presenta lo en la scermo de resultas. — Simon 2020/06/01 11:38

• En efeto! Lo es un pico lenta cuando on pone mera la letera un (an nonsiniada), perce on ave vera multe parolas comensante par acel letera, ma si on pone la letera du, lo es multe plu rapida. Plu cuantiosa la leteras, plu rapida la xerca! — Mixel 2020/06/01 13:38
  • Bon oservada. Plu resultas on trova, plu longa la sistem spende en ajunta los a la paje. Ma nota esta: Si on tape sola un letera, la sistem reposa per du secondos ante comensa xerca, per atenta evita esta problem (car lo es rara ce on vole xerca sola un letera). Pos la letera du, la sistem cansela acel reposa e reposa en loca per un cuatri de secondo, per caso ce tu va tape rapida un letera tre. Pos la letera tre, lo reposa per sola un desi de secondo ante comensa la xerca. Esta no es perfeta, ma lo ia es la compromete la plu bon cual me ia pote trova. — Simon 2020/06/01 14:24
• Me nota ce si me entra s'émerveiller, lo responde : “no trovadas”. Ma si me entra émerveiller, lo trova mervelia, VNT s’émerveiller de… Parente, la sinia de elidi confusa lo. — Mixel 2020/06/01 14:14
  • Op, un era par me: me ia oblida repone la datos franses a la servador pos cambia pico sua formato. Aora lo funsiona coreta. — Simon 2020/06/01 14:24
• Xercan (Shere Khan) move rapida per trova sua preda! El es un xasor grande de parolas. Donce, me sujesta acel nom Xercan per esta xercador nova! — Mixel 2020/06/01 15:38
  • Deletosa! — Simon 2020/06/01 17:31
• De cuando Xercan es disponable, me no pote desprende lo, me es tro abituante a lo. — Mixel 2020/06/03 12:22
  • Me va comensa labora sur la program nova de refresci, pos corta, afin Xercan pote deveni nosa disionario xef. Ma Xercan o Xircan? La nom orijina en un nara engles, do sua pronunsia es /ˈʃɪə ˈkɑːn/). — Simon 2020/06/03 13:06
• Serta, Simon!… Cuando me ia es un scolta joven (un “lupeta”), me ia pronunsia “Xercan”, car me ia leje “Shere Khan” a la modo franses! 🙂 Xercan, aora-asì, ta es un “Xercante”, de la familia de la Xercadores rapida. Cisa, la frate peti de Xircan! — Mixel 2020/06/04 16:30
  • Eselente! Me ia regarda tro pedante tra mea lupa, ma tu ia regarda tra tua lupa. Tu vinse serta. 🙂 — Simon 2020/06/04 17:16
• Ups! Un “lupo peti”, me ia vole dise! 🙂 — Mixel 2020/06/04 19:12
  • No, no, pardona – la era es mea. Me ia intende dise: “Me ia regarda tro pedante tra mea lupa (ma loupe), ma tu ia regarda tra tua lupeta” en un broma de parolas, ma me ia fa un gaxa de lo 🙂 — Simon 2020/06/04 19:19

comentas de Chris

Esta es multe impresante! Alga notas:

• La notas de pronunsia e la imajes manca (esta probable es evidente…).
  • Me repete mea comenta ce lo es ancora sola un prototipo (ma rapida developante 🙂). Me ia ajunta la pronunsias e alga otra campos oji. La imajes va apare en un dia prosima. — Simon 2020/06/02 16:32
• Lo ta es usosa re-ajunta “tota” como lingua, car nun de la disionarios – esetante engles – es completa. Donce, si me xerca un parola deutx e no trova lo, me desira xerca la mesma parola en engles en sua loca. Un otra usor ci parla portuges desira cisa xerca per la parola en espaniol o frances en un tal caso.
  • No un mal idea. An tal, un de la causas de la rapidia alta es ce esta xercador teni cada lingua en sua propre fix, e carga un lingua sola cuando on eleje lo. Ma me va nota tua comenta per considera lo plu pos cuando me ia completi mea ideas inisial. Cisa un perde de alga rapidia es asetable si on ia eleje “tota”. — Simon 2020/06/02 16:32
• Cual on fa si un parola manca un tradui en la lingua elejeda? Aora la disionario nova mostra sola la defini en elefen (si lo esiste), ma no tradui. Lo ta es usosa si on trata esta caso como si “tota” ta es elejeda e mostra tota la traduis cual esiste – cisa la usor comprende alga de los.
  • Esta ta introdui un pausa relativa longa a sua aveni prima en la sesion, spesial cuando nos jua con 16 linguas e no mera 3. — Simon 2020/06/02 16:32
    • Un bon solve ta es ce me ta copia la tradui engles a un campo spesial en la otra linguas, si no otra tradui es disponable. Tal, la sistem ta pote ofre automata la tradui engles en tal casos, o (elejable) tota casos. — Simon 2020/06/02 17:27
      • Un idea bon. — Chris 2020/06/04 15:58
• Si me entra “sad”, cisa me xerca per “saddle” o “sadism” – ma plu probable me xerca per triste = “sad”. Donce lo ta es usosa si on ordina la entradas en un tal modo ce corespondedas completa (triste = “sad”) es mostrada ante aceles partal (como ensela = “saddle” etc.). — Chris 2020/06/02 15:26
  • Me ia pensa la mesma, ma cuando me ia esperimenta con la idea, me no ia gusta ce la ordina no es perfeta: lo ia pare strana e acaso, an si ultima comprendable. Si me tape sola la parte prima de un parola elefen (car me es pigra, o car me no recorda bon la resta), lo es disturbante si la resultas comensa con un article nonpertinente cual apare sola car me ia tape acaso un parola completa engles. Per esemplo, me prefere no vide la articles sur “encampa” e “visina” si me tape “camp” per regarda la difere entre “campa” e “campo”. — Simon 2020/06/02 16:32
  • Un plu problem con esta idea es ce la xerca considera sola lo cual on demanda. Si me xerca “camp”, esta vole dise “trova ‘camp’ a la comensa de un parola” – alora, la xercador trova simple la cuatro leteras “camp”, e serti ce la sinia cual presede los no es un letera. Lo no sabe do la parola trovada fini: cisa lo es “camp”, cisa “camps”, cisa “campanile”. Descovre do la parola fini es posible, natural, ma lo ta ajunta lentia a la sistem. Jeneral, mea disposa asi es ce la rapidia es plu importante ca la risca de emete cisa un o du resultas nonpertinente. Si la usor senti ce la lista de resultas es tro longa, el pote tape un plu letera. — Simon 2020/06/02 16:52
  • En tua esemplo de “sad”, tu pote evita “saddle” e “sadism” par ajunta un punto a la fini: “sad.” La punto obliga la sistem a iniora trovadas en cual “sad” es direta segueda par un plu letera. Me ia eleje pone esta punto a la fini de la enflue (diferente de tota otra simboles, cual es prefisas) car me ia trova ce me tende usa lo sola pos comensa tape, cuando me pote vide esce me vide ja la article desirada. — Simon 2020/06/02 17:05
    • A! Esta es multe bon. — Chris 2020/06/04 15:58
      • Leje la aida. On ave simboles diversa per controla la xerca. — Simon 2020/06/04 17:18

plu developas

Un nota plu jeneral: Me veni de ajunta un modo per distingui leteras major e otra sinias spesial, per la casos rara en cual on nesesa esta. Si on tape !, tota la sinias a pos es xercada en modo esata. Per esemplo, .!X mostra la articles de cual sua radis comensa con un X major, e en deutx, )!fün trova fünf ma )!fun trova funktionieren. — Simon 2020/06/02 16:52

Oji (3 junio), me no ia ave multe tempo per labora a esta. Ma tu pote aora ajunta ( o ) ance a la fini de tua tape, per restrinje la resultas a sola elefen o tua lingua elejeda. Esta es usosa cuando on trova tan multe resultas en la otra lingua ce on no pote fasil iniora los. Doman me va labora sur la sistem de refresci; me pensa ce me va nomi lo un sistem de “reconstrui” a esta ves. — Simon 2020/06/03 19:47

Oji (4 junio), me ia scrive la program cual construi la banco de datos per la disionario nova. Me ia pone un lia a lo en la panel de naviga en nosa pajes de disionario asi. Ambos disionarios conteni aora la informas la plu fresca. Me ia ajunta espaniol e ivri como linguas de xerca, e en tota linguas, cuando un tradui manca, la xercador mostra aora la tradui engles. (En pasa, mea esperia oji ia confirma mea crede ce PHP es un lingua de la diablo. Iu! 🙂) — Simon 2020/06/04 18:21

Oji (5 junio), me ia coreti la presenta de mesajes sur eras en la program de construi: lo ia mostra los en testo blanca sur fondo blanca! Esta servador es un macina vera stonante lenta: cuando on construi la disionario nova, esta ocupa entre 100 e 300 secondos, ma cuando me esecuta la mesma program en un computador multe vea en mea casa, lo completi pos sola 10 secondos. Fortunosa, la codigo de la xercador opera en vosa surfadores, no en la servador, donce lo no es afetada par la lentia. — Simon 2020/06/05 07:00

Ance oji (5 junio), me ia altera la spelador afin lo usa la mesma disionario como la xercador nova. — Simon 2020/06/05 10:18

la spelador e la sufisa “-ia”

• Bon note, Simon. La spelador marca ce lentia no apare en la disionario. Esce on debe ajunta lentia en la disionario, o la spelador pote considera ce la construi con -ia es sempre posible de cualce ajetivo (e, alora, la spelador ta debe no marca cualce parola posible)? — Mixel 2020/06/06 23:30
  • Un bon punto. La reconose automata de la sufisa -ia es complicada, car la program debe divina cual vocal manca: en lentia, un A manca, ma en angulia, la vocal mancante es un O. Me pensa ce la esplora de tota vocales posible ta ajunta alga… lentia (!)… a la spelador, per un caso no multe comun. (Compara -nte e -da, cual la spelador reconose fasil, car los reteni la vocal de la verbo.) Ma me ia ajunta lentia a la disionario: lo es un parola importante, e me es surprendeda ce lo ia es ja entrada. — Simon 2020/06/06 06:49

• Demanda: Car de cualce ajetivo on deriva un verbo, esce esta verbo fini sempre con -i?
  • Si. -i es la sola sufisa (o, vera, la sola du sufisas) per deriva verbos.
• Si la responde a la demanda es “si”, on pote imajina ce la program sutrae la -a final de la parola fininte con -ia. Resta la -i final. Si esta parola es simil a un verbo esistente, la parola con -ia final es bon. Esemplo:

• En pasa, nota ce tua metodo ave defetos: lentia es derivada de la ajetivo lenta, no de la verbo lenti; e no cada verbo con la coda -i es derivada. Tua metodo ta era en aseta finia como bon speleda. — Simon 2020/06/10 19:02
  • Esata! Me ia pensa ce, en loca de trova esata la radis de do es derivada la nom, on ta pote trova plu fasil un otra derivada, cual ia ta es contraeda en la mesma modo. — Mixel 2020/06/06 19:44
    • Tu comensa convinse me ce la spelador debe permete la ajunta de -ia a cualce ajetivo. A presente, lo aseta parolas rara como nonlentable, ma lo no aseta parolas plu usosa como parlosia o comprendablia. Ma vera, si un parola es usosa, lo debe es entrada en la disionario mesma. Cisa me pote programi ce lo dona un color diferente a parolas derivable e nonderivable. — Simon 2020/06/10 21:02

• Me no sabe esce esta metodo pote funsiona fasil! — Mixel 2020/06/06 09:43
  • La spelador inisia se par leje rapida la disionario e construi cuatro listas de parolas: la nomes, la verbos, la ajetivos, la otras. Un parola es alora bon speleda si lo es en un de esta listas – o si lo es un ajetivo o verbo con la -(e)s plural, o si lo es un verbo con un de la sufisas -da, -nte o -able, o si lo es un ajetivo con la prefisa non-. Esta regulas recorsa, tal ce an nonconfusadas es regardada como bon speleda. Ma… probable no bon razona esiste per no aplica esta regulas ja cuando la spelador inisia se, tal ce nonconfusadas ta apare direta en la lista de nomes. En esta modo, la spelador ta responde plu rapida a cada letera tapeda (a presente, lo es lenta si la testo es longa)… e lo ta pote alora reconose fasil -ia per cada ajetivo. An tal… on ta risca permete tro multe parolas cual es apena usada/usosa, contra la intende de la spelador. Si on tape confusadia en loca de confusada, lo es probable plu bon si la spelador avisa esta. — Simon 2020/06/06 10:34

la spelador e la sufisa “-able”

Consernante -able, me ave un demanda (per comprende la metodo), car la reconose automata de la sufisa -able pare es tan complicada como esta de la sufisa -ia. Par cual metodo Xercan pote sabe ce traduable veni de tradui? Si on sutrae -able, on resta con tradu, e si on sutrae -ble, on resta con tradua, ma no la parola un, no la parola du esiste… [?] — Mixel 2020/06/10 16:47

• Xercan comensa par considera e rejeta tradua; seguente, lo considera e rejeta tradue; final, lo considera e aseta tradui, car esta parola esiste e es un verbo. Lo ta pote fa un prosede simil per parolas cual fini con -ia, ma lo ta debe considera asta sinco formas, car ajetivos e nomes pote fini ance con -o e -u. (E car -ia conteni sola du leteras, la posiblia de tape lo sin intende es alga plu probable ca la posiblia de tape -able.) — Simon 2020/06/10 17:23

Sin oblida la forma 6 (Ø) de la ajetivos cual no fini con un vocal: comun, felis… [!] — Mixel 2020/06/10 22:38

• Vera. Ma me no sujesta ce la disionario debe automata aseta la ajunta de -i a cualce ajetivo o nom, car esta ta ruina lo. Un de la eras la plu comun en elefen es la malrecorda de la vocal final de un radis. — Simon 2020/06/11 07:08

no plu un prototipo

De oji (7 junio), la disionario nova mostra la imajes. Lo ofre aora tota la funsionas importante de la disionario vea, donce me va move lo a la adirije xef (elefen.org/disionario). La disionario vea va resta asedable a elefen.org/disionario/vea per la futur previdable.

• Multe bon! Ma aora la lia de la disionario a la spelador es rompeda, car lo conteni ancora la parola “nova”. La lia reversada es ance rompeda. — Chris 2020/06/07 15:57
  • Grasias! Me ia ajusta un monton de lias, ma lo ia es previdable ce me va oblida un o du. — Simon 2020/06/07 16:08
• Si me entra “.back”, la xercador trova no articles. Me ta espeta ce lo trova entradas como “dorso – back, dorsal area…”, “retroacronim – backronym”, “arci a retro – backbend”, e preferable ance entradas como “apostor – bettor, better, gambler; backer (of horse)”, do “back” aveni a la comensa de un defini nova. (Ma no “reariva – arrive back, get back” etc.) — Chris 2020/06/07 16:31
  • Ma .x es un funsiona spesial. Lo mostra la article completa per la radis x. E back no es un radis de elefen. Me pensa ce tu debe xerca simple back sin la punto, per trova lo cual tu vole. Nota ce la xercador no comprende la difere entre virgulas e punto-virgulas; en fato, lo iniora tota sinias de puntua. La capasia de trova back, dorsal area sin trova arrive back no pare multe usosa en la caso jeneral; back es un caso alga rara. (Un ora pasa…) Ma lo es fasil per programi, donce tu va trova aora ce ,back trova cada aveni de back pos un virgula o un punto-virgula, o a la comensa de la peso de testo. — Simon 2020/06/07 17:57
    • Grasias, , es multe usosa en alga casos! Ma on ave un era: si me xerca ,das. en la disionario deutx, la xercador ance trova ce – dass – esta no es coreta. Si me xerca das., ce no es trovada, como on espeta. — Chris 2020/06/08 11:37
    • Si, acel es serta un era. Aora coretida, an tal! — Simon 2020/06/08 12:03
  • Me ia tape: ) back, con un spasio entre ) e back. E mera parolas comensante con back ariva, no arrive back, no get back. — Mixel 2020/06/07 22:50
  • La problem es acel spasio entre ) e back. Par tape ) back, tu demanda per la parolas engles cual comensa con la sinco sinias back; ma natural, no parolas comensa con un spasio. Per deside esce un trovada es a la comensa de un parola, la sistem regarda esce la sinia presedente es nonalfabetal: en arrive back, la sinia presedente es la e, donce esta trovada es rejetada; en tiring, arduous, backbreaking, lo es un virgula, donce esta trovada es asetada. Cisa me debe iniora spasios a la comensa o fini de la terma tapeda. — Simon 2020/06/08 06:54
  • Un otra posible ta es ce me ta divide la cadena de traduis a virgulas e punto-virgulas, per ave los en un lista, e alora ce me ta fa un xerca separada a cada parte de la lista. Ma esta ta lenti la macina par aumenta la cuantia de probas individua nesesada. O me ta pote fa un analise plu sever per deside esce un trovada es a la comensa de un parola. Ma ance esta ta lenti la macina. On no pote ave la luna! — Simon 2020/06/08 07:26
• Si me entra .saleta, la xercador trova 0 articles. Me ta espeta ce lo trova saleta, saleta de comedas etc. — Chris 2020/06/10 13:33
  • La punto inisial mostra la article completa per un radis, per esemplo .sala. Saleta es un derivada. En la terminolojia de esta disionario, me distingui “article” (un radis e sua derivadas) e “entrada” (un radis o un derivada); un article es un lista de entradas. La grupo [saleta, saleta de comedas] no esiste en la strutur. — Simon 2020/06/10 15:14
  • Me ia descovre ce me pote usa ,saleta per trova esta parolas. Esta es bon! Ante me ia pensa ce , funsiona sola en la traduis en linguas nasional, car la aida dise: “cada trovada comensa un tradui individua”. Lo ta es plu clar si lo dise: “cada trovada comensa un defini individua”. Ance “.tri mostra la articles completa cual comensa con tri” no es multe clar, car nun esetante tu sabe cual es un “article completa”. Me ta proposa dise “.tri mostra la radises elefen cual comensa con tri” en loca. En ajunta, me pensa ce , es plu usosa ce . cual es un funsiona alga spesialida. Cisa es un bon idea si tu move ,tri en la parte fundal e .tri su “Otra sinias spesial”? — Chris 2020/06/12 15:42
    • Per trova tota la saletas, me ta tape simple saleta, cual trova tota parolas cual comensa con acel ses leteras. En la majoria de casos comun, esta sufisi, me pensa. Lo no es un problem grande si la xercador trova ance du o tre cosas nonpertinente – on pote fasil iniora los.
      • ,saleta no es un bon esemplo (an lo es la esemplo vera cual ia fa ce me ia descovre ce . no funsiona en la modo espetada de me). ,minor es plu bon: si me xerca minor en la disionario engles, la xercador trova 20 articles; ,minor trova sola 8; (minor trova 11 e (,minor sola un! Multe usosa! Me usa frecuente , per trova plu fasil la article coreta. — Chris 2020/06/14 14:54
    • Me trova ce la aida es multe difisil per scrive clar, a la min si lo va resta consisa. La funsiona de la virgula es spesial complicada per espresa. En scrive la aida, me ia suposa ce usores ta proba la sinias diversa per vide mesma lo cual cada fa. Ma me va ajunta alga esemplos aora. Esemplos es usosa; me oblida sempre esta…
    • Me no acorda ce “cada trovada comensa un defini individua” ta es plu clar, car “defini” es un conseta tota diferente: lo es la testo blu entre brasetas reta (cual coresponde a la campos defini: asi en la vici).
    • “Un article completa” es simple tota la informas sur un radis e sua derivadas; me ia cambia la aida per evita la parola “article”.
    • Si me ta scrive ce “.tri mostra la radises elefen cual comensa con tri”, me ta malgida la usor, car .tri mostra ance la derivadas de acel radises. — Simon 2020/06/12 15:50
      • Bon, me ia fa multe bonis a la aida, incluinte la ajunta de lias a cada esemplo, afin on pote clica e vide direta la efeto. — Simon 2020/06/12 17:03
      • Multe impresante! Ma esta testo: “,tri es simil, ma cuando tri es trovada en tua lingua elejeda, lo va es a la comensa de la parola prima de un tradui” sujesta ancora ce , funsiona sola en la lingua nasional, no ance en elefen. Me ta proposa: “,tri es simil, ma cuando tri es trovada, lo va es a la comensa de la parola prima de un espresa elefen o de un tradui”. — Chris 2020/06/14 15:05
        • Lo es vera. Me ia trova un modo plu simple de dise esta, usante la terma “espresa (de un o plu parolas). Grasias! — Simon 2020/06/14 15:50

Mi ia nota ancora du problemes:

• “ajetivo prenomal” en la testo de fonte de la disionario deveni “ajundefined” en la disionario interatante (e.g. “bon”).
  • Grasias – me ia coreti esta. Ance “averbo preverbal” (pe: “ta”) ia ave la mesma problem. — Simon 2020/06/15 16:45

la tecla Esc no clui

• La xapo de la testo aidante dise “Clui (Esc)”, ma la presa de la tecla “Esc” NO clui lo. — Chris 2020/06/15 16:24
  • Lo clui lo cuando me presa lo. Cual surfador tu usa? En la codigo me deteta la tecla par un metodo cual es suportada par tota surfadores moderna tra ja du anios. Ma me ia ajunta aora ance un otra modo plu vea de deteta la tecla. Esce lo funsiona plu bon per tu aora? — Simon 2020/06/15 16:45
  • Me usa Firefox o Chromium (Chrome) su Linux, e lo funsiona en zero de los. — Chris 2020/06/20 13:52
  • Interesante. Lo pare ce no tota surfadores envia la sinial “keypress” per la tecla Esc. Me ia cambia la codigo per deteta la sinial “keyup” en loca; esta pare funsiona plu bon. — Simon 2020/06/20 14:11
    • La mesma cosa per me: la tecla Esc no clui la fenetreta. (Me surfa con Chrome.) — Mixel 2020/06/20 19:27
    • Per me lo funsiona aora en ambos surfadores. Grasias! — Chris 2020/06/21 12:55

ideas veninte

Asi es la ideas cual me espera reali en la semanas seguente. La plu de los es per usores tecnical:

• indica la proportio de entradas cual (no) ave traduis en la lingua elejeda
  • Esta informa apare aora en la panel de aida.
• xerca en un campo spesifada: – esta funsiona es aora disponable
  • D:erbivor = trova parolas con definis cual conteni erbivor
  • T: = trova parolas cual ave la campo tasonomia
• restrinje par categoria: – aora disponable per la categorias sintatical
  • n;-u = trova nomes cual fini con u
  • on; = trova tota parolas onomatopeal – ancora no
  • n;je;>x = trova tota nomes jeografial cual conteni x
• restrinje a radises o derivadas: – aora disponable
  • r;fas = trova radises cual comensa con fas
  • d;-eta = trova derivadas con la sufisa -eta
  • d;v;-eta = trova verbos con la sufia -eta
• xerca par un regex: – esta funsiona es aora disponable
  • (/[^aeiouflmnrsx]$ = trova parolas elefen con finis nonusual
• converti la campos “vide:” a lias clicable – aora fada
  • ancora no, ma me ia ajunta lias a la gramatica per la preposadas
• limita la cuantia inisial de trovadas (100?), per evita la pausa peti pos tape sola un letera
  • cuando no tota trovadas es listada, ajunta un lia per revela tota
  • fada – la masima es 150
• simpli la panel de aida (move la consetas rara usada a un panel separada)
  • o ajunta un menu, en cual cada elejable va ajunta un sinia spesial a la caxa de tape

Plu ideas:

• xerca tota linguas a la mesma tempo? (lo ta es lenta)
  • o permete ce la usor eleje un grupo de linguas en cual el vole xerca (o cual el vole vide como ajuntas statical a la trovadas)
• permete otra ordinas de la trovadas, per esemplo: la trovas esata ta pote apare prima

nom comun - nom propre

Cisa, on ta pote eleje mera nomes comun, sin nomes propre. Per esemplo, si me xerca como on dise lac, me no vole afoca su la multia de la lagos de la tera intera… — Mixel 2020/06/08 16:45

• Esta es un idea eselente. Grasias per lo! — Simon 2020/06/08 16:53
• Tua desira es mea comanda (en esta relata, a la min). Me ia ajunta la categoria I a la entradas con un letera inisial major (en elefen), e i a los con un inisial minor. E car categorias es aora xercable, tu pote aora tape i;)lac per evita la lagos jeografial. — Simon 2020/06/09 10:43
  • 🙂 !

lias a en la disionario

Esce lo es fasil posible ce on lia un article (o ce on refere) a un otra article, en la disionario? Per esemplo, si on xerca fr: étoile, on pote es interesada par sabe como on dise ance constellation, o si on xerca constellation, on pote es interesada par étoile. — Mixel 2020/06/09 09:57

• Ance un bon idea. Nos pote usa la campo vide: per esta. A presente lo es apena usada: sola per nomes alternativa de paises, e du o tre otra cosas minor. Mea lista a supra conteni la idea de presenta esta campo como un lia interna, cual va presenta la article completa (.x) de la parola refereda. — Simon 2020/06/09 10:43

Vera! U ce me es distraeda! — Mixel 2020/06/09 23:41

• La campos vide: es aora presentada como lias. — Simon 2020/06/12 08:25
• Grasias! Lo es multe usosa e pratical. — Mixel 2020/06/12 10:31

respondes listada

Otra idea de presenta de resultas: imajina ce on ta desira ce la disionario responde su la forma de un lista de parolas bruta, sin defini, sin indica gramatical; per esemplo, imajina ce on ta vole ave la lista de tota la verbos nontransitiva lfn comensante con la letera b. — Mixel 2020/06/09 15:12

• Si, ance un bon idea. Me ia reali lo: prefisa # en la caxa de tape, per esemplo #N;b. — Simon 2020/06/09 18:09

Me ia proba #N;b — la resulta es ordinada bon, como un lista. Lodas! — Mixel 2020/06/09 23:00

derivada o nonderivada?

Bon dia, Simon. Mera un detalia: cuando me entra T;d; en la caxa de tape, me espeta mera verbos transitiva derivada. Ma me vide ce Xercan dona ance: abitua. Donce, la usa transitiva de abitua es considerada como un forma derivada de la radis abitua. Esce, longo tu, lo es coreta? — Mixel 2020/06/12 10:15

• Lo no es coreta longo la defini usual de “derivada” en linguistica, ma lo es coreta longo la strutur de nosa disionario, en cual on ave sola radises e derivadas. Serta la sinifia nontransitiva es fundal e la transitiva es deduida de lo. — Simon 2020/06/12 10:20

problemes de construi simultan

• Me ia spende un ora misera en atenta trova un defeto bizara: un o du linias ia manca acaso en la fixes construida, tal ce la xercador ia deveni confusada o ia colasa. Ultima, me ia repara la situa par sutrae la fixes de la servador e reconstrui los. La sola esplica a cual me pote pensa es ce tu (o algun) ia atenta construi la disionario en la mesma minuto como me, produinte fixes pico noncoerente entre se. Uf, me nesesa reposa alora. Acel ia es frustrante :) — Simon 2020/06/13 11:26
  • Lo es problemal. Me recorda ce tu ia perde parolas cual tu ia ajunta, car me ia es laborante sur la mesma parte de la disionario. Como on ta pote fa? — Mixel 2020/06/13 12:25 (Ora de Reikiavik.)
    • Acel ia es un problem diferente. Lo ia aveni cuando ambos de nos ia edita un paje a la mesma tempo; tu ia fisa plu tarda e ia suprascrive mea cambias. Me no comprende como acel ia aveni, estra si tu ia iniora un averti par la vici ce la paje ia es ja cambiada, cuando tu ia atenta fisa lo. DokuWiki proteje bon contra tal avenis; si on resta en la editador per alga minutos sin tape, lo averti ce la paje va deveni editable par otra persones.
      
      La problem oji, contrastada, ia pare es en construi la datos per Xercan: la fixes con la traduis ia es como me ia espeta, ma en articles.js (cual conteni la informas sentral sur cada parola) un parola ia es malocada. La parola consernada ia es calmitose, cual me ia move oji a sua propre article (a ante, lo ia es mostrada como un derivada de calma, diferente de tota otra parolas composada). En articles.js, calmitose ia es ancora su calma, an pos cuatro o sinco reconstruis!
      
      Me conclui ce, car du programes de construi ia esecuta simultan, la fix articles.js no ia es coreta cluida, restante abrida e preveninte ce cada esecuta seguente fali suprascrive lo. Me veni de ajunta aora un sistem simple de semafor, per atenta preveni ce du persones construi la disionario a la mesma tempo. — Simon 2020/06/13 12:59
      • Lodas per la solve! — Mixel 2020/06/13 14:39 (Ora de Reikiavik.)

En pasa, me ia trova un modo per rapidi multe la construi de la disionario. Ance esta va aida preveni ce du persones construi simultan. — Simon 2020/06/14 15:56

• En efeto! Sirca 50 secondos per fa la construi. Multe bon! — Mixel 2020/06/15 15:58

Selebra!

Nosa disionario peti conteni aora plu ca 30 000 entradas! — Simon 2020/06/14 18:30

• Bon sania! Lodas! — Mixel 2020/06/14 23:54

Bonis a la spelador

On pote aora tape un lista de parolas cual la spelador va iniora, per esemplo la nomes propre de la persones en un raconta. (Per trova plu fasil mea eras de tape en Frate peti, me ia aplica esta lista: Marcus Yallow Anj Carvelli Darryl Glover Vanessa Pak Van Jolu Benson Galvez Andersen Carl Zeb Masha Barbara Stratford Chavez Francisco Angeles Harajuku W1n5t0n M1k3y PortaScola PortaScolas Potrero Nob Xbox Microsoft esprit escalier cripto Bayes Trudy Doo BandaPronto BandaProntos Dolores nondep 5e5o5a xic yipi yipis scoviles Sputaputas Djazira Graeme Sutherland Kurt Rooney Carrie Johnstone Jack Kerouac dinieldodios JuReAl JuReAles JuRoVi JuRoVis JuRoViste coJuRoVistes Iskandariyya Creative Commons Kameraspia MalusasDeAutoria Cornelio Lego Guantanamo Yorkshire Scoville Jacobs Ness Faraday Nat Liam.)

Me ia ajunta ance un boton cual dejeta tota paragrafes cual no conteni un malspele, per fasili la taxe de trova tota la eras en un testo longa. — Simon 2020/06/20 09:13

Spele simplida + Indicas de categoria, de campo

En pasa, Xercan trova “vitro”, ma no trova “vitro de vino”. — Mixel 2020/06/22 16:56

• Cual cosa tu tape? Cuando me tape vitro, lo trova ambos (e otras). — Simon 2020/06/22 17:20

Lo es un detalia, sin duta. Me ia vole dise ce cuando me tape sola vitro, Xercan trova tota, ma si me tape vitro de, la resulta es vacua. Esce lo no debe mostra vitro de vino e vitro de coniac, cual conteni vitro de? A contra, si me tape verre à, verre à vin apare. — Mixel 2020/06/22 18:01

• Lo es un detalia importante: un defeto, introduida par mea cambias a esta matina en relata con ifenes e spasios. Aora, cuando tu tape verre à, Xercan xerca verrea; si tu tape go-kart, lo xerca go-kart. Ma me no ia vide ce esta rompe la xercas per termas elefen cual conteni ifenes e spasios: cuando tu tape vitro de, Xercan xerca vitrode, ma esta trova no cosa, car ifenes e spasios es retenida a presente en la datos. Txa. Esta es un noncoere entre la datos elefen e la datos traduida, e car Xercan permete xerca en ambos a la mesma tempo, me va debe estende la datos elefen con un campo per la spele simplida. No cosa es simple! — Simon 2020/06/22 18:06
  • Fada 🙂 — Simon 2020/06/22 19:28

On ave tan multe cosas cual tu debe pensa! E, volente sabe si pensa es transitiva, me veni de xerca lo en la disionario, e me vide ce la indicas de categoria e de campo (“verbo”, “transitiva”, “siensa umana”…) no apare plu. Istoria sin fini! Bon coraje, Simon! — Mixel 2020/06/22 22:13

• Op! Ma esta es fasil per repara: mera un era bobo par me. Aora coretida. — Simon 2020/06/23 07:43

Parente la xercador ave ancora un problem con spasios. Si me xerca such and such, lo trova “alga o otra – such and such, some … or other”, ma no si me xerca alga o otra. Si me xerca la un o, lo trova “la un o la otra”, ma no si me xerca la un o la. — Chris 2020/06/24 20:18

• Un era de regex cuando la terma tapeda ia conteni un parola con sola un letera. Lo ia prende alga o otra e ia simpli lo a algao otra en loca de algaootra. Aora coretida. — Simon 2020/06/24 20:46

Si me entra ,around, la xercador no trova sirca. Per dise esata, esta es coreta car la tradui es “1 around, round …” – ma ta es plu bon si la numero ta es iniorada en tal casos. — Chris 2020/07/01 20:45

• Bon punto! La disionario vea ia representa la partes numerida como campos separada, donce no tal problem ia aveni. Me no es convinseda ce acel numeros conveni bon a la sistem; serta los complica multe la construi de la fixes de datos, e los apare en sola un cuantia pico de articles (sempre de preposadas). On ave un problem simil si on xerca ,oil: on no trova petrolio car la tradui es “(crude) oil”. Me va pensa sur modos de sircoveni la problem. — Simon 2020/07/02 07:00
  • Me ia trova un solve simple: aora acel numeros apare entre brasetas, me reteni la brasetas en la formas simplida, e la simbol , aseta ) en ajunta a , e ;. — Simon 2020/07/02 08:13
  • Multe bon! — Chris 2020/07/02 20:19

#.b = .b (no lista bruta otenida)

Bon dia, Simon! Entrante #.b en la caxa, me intende oteni un lista bruta de radis comensante con b. Ma, en esta caso, Xercan pare iniora la grilia #, e paneli como si me ia entra .b. — Mixel 2020/07/08 11:59

• . e # no pote coesiste. Si on mostra un article completa, acel no es un lista bruta. — Simon 2020/07/18 18:56

Clar! Me ia crede ce . mostra la radises. Grasias! — Mixel 2020/07/19 09:37 En fato, me ia ta debe entra (#r;b o an: (#r;i;b ! — Mixel 2020/07/20 09:37

xerca con du esijes de categoria

Esce lo ta es posible xerca formas cual, per esemplo, pote es e nom e ajetivo, o e nom e verbo, o e ajetivo e verbo)? Lo pare a me nonfasil… Per esemplo, si on ta entra v;+n; Xercan ta esflue en la lista parolas cual pote es verbo o nom, per esemplo:

ama
arma
canta…

Si on ta entra: n;+a;, Xercan ta esflue en la lista parolas cual pote es nom o ajetivo, per esemplo:

blu
gris…

— Mixel 2020/07/19 15:39

• Lo ta es difisil, car Xercan ta debe regarda plu ca un entrada a la mesma tempo, e lo no es abituada a acel. Serta on ta pote scrive relativa fasil un otra program per interoga la datos e produi un tal lista. Ma teorial cada ajetivo e cada verbo pote es usada como un nom, an si lo no apare direta en la disionario. — Simon 2020/07/19 15:48

En esta periodo, me es laborante sur la cuasiomonimes e la “multicategoriales”… En efeto, la xerca ta es plu interesante sur v;+a;.
La program ta pote constitui 1. un lista un de verbos; 2. un lista du de ajetivos; 3. Lo ta xerca si cada parola de la lista un, posible, parteni ance a la lista du. Si tal, lo ta esflue lo: plop! a en un lista tre. — Mixel 2020/07/19 16:26

• Plopis (e plufis) no es nesesada. Pos plu pensa, me vide ce me pote estende la construador afin lo deteta, per cada radis, la nomes cual ave la mesma forma como un ajetivo o verbo su acel radis, e ajunta los a un categoria spesial. Me ia reali esta. La categorias es w; per la nomes deajetival e W; per la nomes deverbal. Grasias per fa ce me aplica plu mea serebro a la problem. — Simon 2020/07/19 17:12

Lodas! Lo funsiona bon! (Sola un bizaria peti per aira/airi cuando on entra W;)

• Perce bizara? airi es un verbo e un nom. Sola la nomes es en la categorias w e W. — Simon 2020/07/19 19:23

Serta airi es bon; lo es un nom e un verbo. Ma me no ia comprende perce aira ia apare… car aira es mera un nom, no un verbo. Me comprende, aora: cuando me pone # ante W;, aira desapare. — Mixel 2020/07/19 18:28

bonis a Xercan

Me ia ajunta un funsiona nova a la xercador! Lo pote aora mostra traduis en otra linguas ca la lingua elejeda. La xercas mesma considera ancora sola la lingua elejeda, ma la resultas pote ofre aora otra linguas, per informa.

Per usa esta funsiona, on nesesa mera eleje un otra lingua (ante reveni a sua lingua prefereda). La sistem es cumulante: lo va ajunta traduis en cada lingua cual tu ia “visita” en esta modo. Per esemplo, si tua lingua normal es franses, ma tu vole vide la traduis en deutx e engles, eleje “deutx, engles, franses” e fa un xerca. Tua istoria de linguas “visitada” es dejetada a la fini de la sesion, o cuando tu refresci la paje.

(Esce esta es sufisinte clar en la interfas? La linguas visitada ave la simbol ✓ a sua lado en la menu. Ma cisa acel simbol es plu confusante ca aidosa.)

Ance, me ia reorganiza la panel de aida. Me espera ce lo aspeta aora min densa, tecnical e confondente. — Simon 2020/08/16 14:45

1. Me ia proba acel funsiona multilingual: lo es multe usosa per serti la sinifias.
2. Lo es bon ce la menus pote desestende: la vista jeneral es plu clar. On abri sola la parte cual interesa.
3. Cisa on ta pote redui pico la grandia de la leteras, afin la panel prende min spasio en la paje. — Mixel 2020/08/17 15:08
   • Me ia grandi lo pos nota ce alga de la simboles spesial en la esemplos ia es difisil per leje clar, ma aora me vide ce esta ia es plu car los ia es spesa ca car los ia es peti. Donce aora me ia redui la grandia denova. — Simon 2020/08/17 15:20
4. Per mea oios vea, la grandia pare perfeta aora. Mixel 2020/08/17 15:08

• La xerca multilingual es interesante! Ma me vide un problem: engles pare es sempre la lingua elejeda prima. Si on vole usa un otra lingua, on eleje lo a pos. Ma aora lo no es posible diseleje engles – lo resta sempre la lingua du. Me pensa ce lo es multe usosa ce on pote eleje vide la traduis en du o plu linguas, ma no en esta modo automata. Cisa on ta pote dise: sola si on presa un tecla spesial (cisa “controla”) cuando on eleje la lingua nova, la lingua vea resta elejeda ance. — Cris 2020/08/17 18:19
• La lingua elejeda prima es lo cual on ia eleje ultima en la sesion presedente. Natural, on pote presa F5 per comensa un sesion nova e deseleje cualce otra linguas. La usa de un tecla spesial a la mesma tempo como la eleje no ta funsiona bon en un tableta o telefon. Probable lo cual es nesesada es un menu du, a lado de la prima, per eleje e deseleje la “otra” linguas. Me ia esita ajunta esta car lo ta complica la aspeta pur de la interfas. Cisa la bon solve es ce me ta crea un panel avansada per conteni esta menu (e cualce otra utiles simil en la futur). La panel ta es inisial ascondeda, ma un lia ta revela lo, simil a la panel de aida. — Simon 2020/08/19 18:55
• A, en esta caso lo es oce. Me no ia nota ce la xercador memoria la lingua elejeda car me dejeta cucis cuando me sesa la surfador. — Cris 2020/08/19 20:32
  • Me ia boni la presenta de esta funsiona. Aora, on vide la frase “Mostra traduis ance en …” con un lista de la otra linguas cual on ia usa en la sesion, e on pote fasil deseleje los cual on no desira plu. — Simon 2020/08/20 09:19
  • Eselente! — Cris 2020/08/20 09:32

Me ia trova un otra problem de la xercador: cuando me xerca “urgroßmutter” (o “urgroßm”) en deutx, la parola duava = Urgroßmutter no es trovada. “urgroß” ancora funsiona. Lo pare es un problem con la letera ‘ß’. — Cris 2020/08/17 18:19

• Me ia note ce si on xerca per “urgroß mutter” (con spasio), duava = Urgroßmutter (sin spasio) es trovada. Ma no si on xerca per “urgroßmutter”. Donce lo pare es un problem con la normali de spasios en xercas e entradas. — Cris 2020/08/19 18:09
  • Surprendente, me ia omete ß de la lista de leteras nonascii cual es reconoseda. Aora lo es coreta. — Simon 2020/08/19 18:55

xerca de parolas pluralida

Un idea per Xercan: Si on xerca per un parola elefen plural (pe problemes, laboras), la entrada singular no es trovada. Esta pote fa problemes per persones ci copia e coli parolas trovada en un paje ueb o simil. Me sabe ce esta no va es fasil, ma cisa, si un parola aspeta como un plural, on ta pote xerca ance per la singular? A la min, si no entrada es trovada en otra modo. Natural, esta idea refere sola a plurales elefen – per la linguas natural lo ta es tro complicada. — Cris 2020/12/07 18:15

• Me va debe medita sur esta. Lo pare problemosa. Si on xerca cortes (sin ajunta sinias spesial), Xercan trova la ajetivo cortes; si on xerca contes, lo trova contesa. Si on xerca la esclama engles alas, probable on ta prefere ce Xercan trova ai e no ala. (On ta pote ajunta ) per restrinje la xerca a engles, ma esta no pare multe oportun per la usor.) Si me ta suporta esta per la plurales, lojical, me ta debe suporta lo ance per la partisipios ativa e pasiva.
  Un solve posible es cisa fa ce la compilador ajunta entradas pupetin per plurales e partisipios. Estas ta conteni mera un refere a la entrada per la nom o verbo simple. Alora Xercan ta lista los en sua curso normal de opera. — Simon 2020/12/07 18:22
• Un idea relatada: nos ave ja un forma alternativa, usada per xerca iniorante spasios. Cisa tu ta pote ajunta un otra forma alternativa per nomes con sola un parola (ala → alas). (Me no ta usa lo per nomes con du o plu parolas como republica de bananas, car plurali los ta es tro complicada.) Si nos vole suporta ance partisipios, cada verbo con sola un parola nesesa cuatro formas alternativa (parla → parlante, parlantes, parlada, parladas). Cada xerca esamina no sola la forma xef, ma ance la formas alternativa. Donce ala es ance trovada si on xerca alas (ma no, evidente, si on xerca )alas). — Cris 2020/12/08 18:08
• Si, acel ta pote susede. Me medita ancora… — Simon 2020/12/08 19:19
• Me ia emerji de mea medita e ia ajunta esta funsiona a Xercan. Aora, si on xerca rojis, roji es trovada. Ance si on xerca nonrojidas! La sistem dedui la mesma infletas/afisas como la spelador (-s, -nte, -da, -able, non-), estra ce lo aseta afisas sola a un parola intera composada de leteras minor – lo no va plurali nomes propre o entradas como leon fema o leon-de-mar. Pos trova un parola como nonrojidas, Xercan no colori la trovada, car en efeto la trovada no es presente sur la scermo. Me medita ancora sur esta, ma cisa lo es apena un problem. Nota ce esta funsiona nova supresa se si on xerca un parola esata. o si on usa un de la sinias spesial - ? > / \\ per controla la modo de xerca. On pote ance supresa lo par prefisa la sinia spesial %. — Simon 2020/12/10 17:25
• Eselente, mil grasias! — Cris 2020/12/11 18:16