Reorganiza de parolas con prefisas tecnical
Bon, me ia pasa un dia longa (ma jeneral gustable) en move sentos de “radises” como astrobiolojia, criptomone e minibus a derivadas. Los ia es orijinal tratada como radises par causa de alga dogma strana ce la prefisas tecnical no es prefisas ofisial, ma en fato nos no ia segue an la dogma en modo coerente (per mostra sola un esemplo, neopagan ia apare e su pagan e como un radis). Aora me espera ce la sistem es plu fasil per avansa.
La disionario es denova editable. Mixel, tu va trova ce me ia ajunta cuasi 150 entradas minor cual nesesa un tradui franses ☺ (Multe de los es la resulta de mea labora matinal sur la lista de parolas mancante cual Cris ia trova.)
- Tua capasia de labora es vera stonante! Lodas! — Mixel 2020/08/16 09:46
- Multe impresante! — Cris 2020/08/16 15:56
- Me ia nota ce tu ia dejeta tota la notas de orijina – perce? — Cris 2020/08/16 17:00
- Acel ia es un projeta cual Jorj ia comensa a multe anios pasada, probable sin comprende cuanto laborosa lo va es. El ia ajunta un etimolojia a apena plu ca 200 parolas. Alga de la informa no ia es intera coreta, o ia es nonclar presentada. Ultima, si algun va reemprende acel projeta, recomensa ta es cuasi tan fasil como revisa la poca informa cual ia es ala. — Simon 2020/08/16 17:13
- Alga esemplos de la problemes:
- ablativa “de latina ablativus (sutrae)” [ablativus no sinifia “sutrae”]
- acrofobia “de elinica akron (alta, culmina) + phobia (teme)” — ma acromion “de elinica akros (la plu alta) + omos (spala)” [perce la difere entre akron e akros? e omos debe es ōmos o an ὦμος]
- afelio “de elinica aph- (de) + helion (sol)” [la preposada es apo, elideda a ap- ante la vocal, e la h veni de helion; e la parola per “sol” es hēlios, no helion]
- La parolas stranjer no es marcada per permete un presenta italica o simil. — Simon 2020/08/16 17:28
- Per conserva la labora fada, me ia copia la informa a un paje dedicada en la ramo “linguistica”. — Simon 2020/08/16 18:05
Me ajunta alga comentas, bonveninte vosa opinas!
- Nos ave multe parolas con sufisas tecnical comun, como -filia, -fobia, -olojia, -metria, -ite, -gram, -grafite, -scopio. En alga casos (pe: vinofilia), la resta de la parola es un radis elefen, e nos pote move la parola sufisada a un derivada de acel radis. En otra casos (pe: asidofilia), cisa la parola sufisada debe apare como un derivada de la sufisa mesma (-filia). Me ia fa ja tal con -edro e -gon, e ance con -jemelo e -sacarido (un sufisa cual me ia ajunta per la oportunia organizal cual lo furni).
- Jeneral, me no ta considera parolas como derivadas de un sufisa. Sin un parola (completa) elefen su cual on pote lista la parola sufisada, me ta lasa lo como un radis nondependente. — Cris 2020/08/16 15:56
- Bon. La casos como -edro, -gon, -jemelo e -sacarido es alga spesial, car los formi series clar e prosima relatada, e lo pare plu aidosa ce nos ta grupi los ca ce nos ta lasa los sperdeda tra la alfabeta. Nos no dise ce pentagon es derivada de -gon, ma -gon es mera un loca oportun per pone lo. — Simon 2020/08/16 16:36
- Me ia lasa multe parolas cual ave, etimolojial, prefisas tecnical, ma en cual la resta de la parola no es un radis elefen. Airobio e airobiose es du esemplos tipal.
- Nos ave antiteroriste e contrateroriste. Esce nos nesesa ambos?
- Me pensa ce un sufisi. anti- es usada plu frecuente como prefisa ca contra-, e lo es plu corta. Donce me ta prefere antiteroriste. (En pasa, engles: “antiterorrist” es un maltape.) — Cris 2020/08/16 15:56
- Me acorda, e ia sutrae contrateroriste. (Me ia es serta ce me ia coreti acel maltape ier. Suposable lo ia apare en du locas.) — Simon 2020/08/16 16:36
- Nos ave antivenenal e contravenena (con codas noncoerente). Esce nos nesesa ambos?
- Car la sinifias alga difere me ta lasa ambos. Ma cisa lo ta es plu lojical cambia antivenenal a antivenena (on pote usa antivenenal como la ajetivo corespondente si on desira esta.) — Cris 2020/08/16 15:56
- La parolas con anti- (e multi-) ave normal un sufisa ajetival (antigovernal, anticorodente; multibaital, multicolorosa). Contra- pare funsiona en modo diferente. — Simon 2020/08/16 16:36
- Bon, en esta caso me ta lasa ambos como los es. — Cris 2020/08/16 17:00
- Nos ave multivalente e polivalente. Esce nos nesesa ambos?
- Resente, nos ia introdui la parola metrica como un terma tecnical de poesia. A ante, esta ia es un sinifia de metre. Esce nos debe cambia dimetre, esametre e la otras en acel serie a dimetrica, etc?
- La disionario presenta nomes composada (parafango, portavose) como radises, ma los es clar no tal. Esce los debe es listada como derivadas de la verbo o de la nom, o en alga otra manera?
- Me pensa ce lo ta es un bon idea lista los como derivadas de un parte o la otra. Lista los su la verbo ta ave la vantaje de no multe cambia la ordina alfabetal. Ma si on segue nosa lojica usual, me pensa ce on ta debe lista los su la nom, car tipal lo es la parte plu spesial. — Cris 2020/08/16 17:00
- Me acorda ce la nom es la parte plu spesial, ma donce lo ta es plu lojical si los ta apare su la verbo, cual es la elemento comun, no? Astrobiolojia es un tipo de biolojia, e parafango es un tipo de “paracosa” (para-x). — Simon 2020/08/16 17:13
- Un bon razona. Me acorda ce on pote grupi “paracosas” su para etc. — Cris 2020/08/17 08:13
- Cisa, on pote ajunta un lia
videde la nom a la nom composada, per esemplo:
fango – nom / vide: parafango
vose – nom / vide: portavose
— Mixel 2020/08/17 11:59
- Me gusta esta idea! — Simon 2020/08/17 14:42
- Tota la nomes composada es aora presentada como derivadas de sua radis prima, liante a la radis du; e la radis du lia a la composada. — Simon 2020/08/23 13:22
- La xerca de la nomes composada ia es fada automata o nonautomata? Me teme ce tu ia debe xerca los con tua oios, lejente la parolas un pos un. Labora grande! — Mixel 2020/08/24 08:46
- No, no, automata! Me ia xuxa
V;a Xercan e lo ia fa la resta. (An tal, me ia trova du o tre nomes composada cual no ia ave la categoria verbo-nom. Me ia ajunta estas a la categoria, natural.) — Simon 2020/08/24 09:11 - Me ia oblida la categoria
V;! Xercan ia previde tota! A mea lado, lo no es tal: me ia vide ce, a veses, la Profador ia plurali nomes ja plural… Entre la nomes trovada par Xercan, cuando me ia xuxetan;a el, algas es plural. E donce, en alga poesias, me ia trova “imajeses”, per esemplo! (Bon, me ia sutrae de la lista la nomes plural e la espresas nomal composada de diversa parolas, e me ia conserva nomes singular simple, e tota es bon aora.) — Mixel 2020/08/24 09:45 - Si tu xerca
;n;j, tu reseta un lista de la nomes plural, e tu pote scrive un program simple per sutrae los de la lista;n. O me ta pote ajunta “singular” como un un categoria computada par Xercan mesma. — Simon 2020/08/24 10:51 - Tua sujesta es esata lo cual me ia fa. Me pensa ce on no nesesa otra categoria. Grasias, Simon! — Mixel 2020/08/24 11:42
- Me no es intera contente sur la regula per ordina la derivadas en un article. Cisa nos debe move la derivadas prefisada a la fini de cada article. Ance la derivadas cual comensa con un otra parola: lo es pico strana ce asta revide no apare prosima a revide, e ce vidable apare cuasi a la fini. Ma me teme risca crea un regula cual es tan complicada ce nun pote segue lo… Cisa la regula debe es simple ce la derivadas apare en ordina alfabetal – estra, probable, la caso spesial de los cual ave la mesma spele como la radis (ajetivo → nom, verbo → nom, nontransitiva → transitiva).
- Si, me pensa ance ce la ordina alfabetal (con esta eseta) es bon car lo es simple. Otra regulas ta pote es difisil per comprende e usa. — Cris 2020/08/16 17:00
- Bon, ma nota ce la ordina presente es pico plu complicada ca lo cual me veni de descrive asi. Nos ave vide tunelin a la comensa, ante asta revide. Me sujesta ce tal espresas de plu ca un parola, en cual la parola prima es identical a la radis, ta es alfabetal ordinada. — Simon 2020/08/16 17:13