Pronunsias en la disionario

Bon dia, Simon. Cual es la usa de la * pos alga indicas de pronunsia? Per esemplo: /estingui/* o /bolonyan/* ? Aparente, me suposa ce lo es poneda pos parolas cual no es pronunsiada tal como Xercan ta pote indica lo automata… no? Ma cual es sua usosia? — Mixel 2020/09/28 18:31

• Lo indica ce la pronunsia apare direta en la datos e donce ce lo no segue esata la regulas. Lo pare usosa ce a tal esetas nos atrae la atende de usores ci ia aprende profonda la regulas. Estingui no es un eseta, e me ia sutrae sua campo “pronunsia”, como Cris ia fa ja per distingui. — Simon 2020/09/28 18:50
• Interesante e usosa! Ma en esta caso nos ta debe retira tota la pronunsias de la disionario cual es coerente – pe celsius e veia ave un stela, ma vera los es pronunsiada coerente. O cisa tu ta pote compara la pronunsia coerente con la pronunsia en la disionario e mostra la stela sola si ambos difere?
  • Me ia sutrae aora la campos “pronunsia” cual es coerente. Me ia estende ance la regula en Xercan cual dise ja ce la i en ei es /y/ cuando lo apare ante un otra vocal; aora esta regula aplica ance a la i en ui (ruia, per esemplo). Per es sever lojical e coerente, nos debe aora ajunta esta du regulas minor a la gramatica. Ai ai ai! La labora va sesa nunca! — Simon 2020/09/29 18:11
  • La gramatica dise: “Cuando I o U presede un otra vocal, on redui lo a un semivocal … entre du otra vocales”. Esce esta no esplica ja ruia? — Cris 2020/09/30 17:36
  • A, si, lo esplica lo! Me ia era en mea codigi de la regulas de Xercan per reconose la I e U semivocal. — Simon 2020/09/30 18:03
• Cuait es un caso interesante, car la pronunsia prima es coerente, ma la pronunsia du no es. — Cris 2020/09/29 17:26
  • La fato ce lo ave du pronunsias sufisi per declara ce sua pronunsia es noncoerente. — Simon 2020/09/29 18:11
  • Otra casos interesante: Taiuan /tayuan/ (3 silables) – me suposa ce esta es coreta? Miauiau /miawiaw/ ave 4 silables – si on ta scrive miau-iau /miaw-yaw/, lo ta ave sola 3.
  • Antiiudisme /antiiudisme/ (en loca de /antiyudisme/) pare es un era. — Cris 2020/09/30 17:36
    • Me ia coreti la codigo de Xercan, e tota esta parolas indica aora la pronunsia coreta. (Ance ciui ia malfunsiona.) — Simon 2020/09/30 18:03
    • Multe bon! Ma esta ia introdui on otra era: iuan es aora /ywan/, ma a ante – e serta coreta – lo ia es /yuan/. w entre du vocales (incluinte diftongos como ai e au) es un semivocal, ma pos un semivocal pur (como /y/ en iuan) lo resta un vocal. — Cris 2020/10/01 17:00
    • Me ia recoreti la trata de iuan. (/ywan/ ia aveni como un efeto ladal strana de la modo en cual me ia solve la problem de Taiuan con sua serie de cuatro vocales: taiuan → tayuan → taywan. La serie yua deveni ywa – tratante la y como un vocal – ma me ia oblida ce yua pote apare ance a la comensa de un parola. Complicada!) — Simon 2020/10/01 18:10
• E, pardona, ma un esplica corta en la “Aida” sur la stela e jeneral sur la sinifias de la leteras usada en la indicas de pronunsia ta es usosa. La sinifias coere a la AFI, estra j, x, y e la sulini per indica la asentua, me pensa. (E la usa de - en loca de . per indica ce vocales parteni a silabas diferente.) — Cris 2020/09/29 17:34
  • Esta es ja en mea lista de taxes, en fato. Ai ai ai! La labora va sesa nunca! — Simon 2020/09/29 18:11
  • Fada, con plaser. — Simon 2020/09/29 19:26
  • Eselente! P: es ance multe usosa! Usante lo me ia nota ce parolas como autovia, mediadia, antige, autoimune, dutia ave un stela, ma como composadas los es pronunsiada coerente, an si sua pronunsia ta es noncoerente si los es radises. SUA es un caso simil. Probable lo es vera plu bon ce on mostra la stela en tal casos…
    • P: esiste ja de cuando me ia suporta : per xerca campos spesifada. Per solve la casos strana cual tu veni de lista, me sujesta ce nos cambia la contenida de la campo pronunsia afin lo conteni esata la testo cual nos vole presenta en Xercan, incluinte la baras inclinada e (do desirada) la stela. A la mesma tempo, nos ta pote cambia á a _a_ per coere plu con la presenta sulinida en Xercan. — Simon 2020/10/01 18:10
    • La inclui (o no) de la stela es un bon idea! Ma perce las baras inclinada? Car los es mostrada en tota la notas de pronunsia, esta pare nonesesada. — Cris 2020/10/03 16:38
    • Esata car la baras apare en tota la notas, los pare importante e nesesada. Ta ce la campo de pronunsia es esata lo cual va apare en Xercan. La stela apare estra la baras, per esemplo, donce Xercan ta nesesa ave un caso spesial per esta, la baras no ta apare en la datos. — Simon 2020/10/03 17:31
    • Me pensa ce lo sufisi si nos ave en la disionario entradas como pronunsia: abriv_i_a (sin stela) e pronunsia: ag_u_* (con stela) e cambia los a /abrivia/ e /agu/* ante mostra los a la usor. Ajunta baras e move la stela (si presente) pos la bara du no ta es un taxe difisil per Xercan. Cisa en la futur nos vole cambia la formato usada a (pe) [abrivia] o move la stela ante la bara du o a la fronte? Tal cambias es plu fasil si nos no “hardwire” (?) la stilo de presenta en la disionario. En la presenta, tota la definis es incluida en brasetas reta e la tasonomias en brasetas curva, ma nos ance no scrive esta brasetas en la vicitesto de la disionario. — Cris 2020/10/04 18:46
    • Me acorda ce lo es plu bon si nos no “codigi permanente” la presenta en la disionario. En fato, aora Xercan calcula sua idea de la pronunsia, compara lo con la pronunsia en la datos, e ajunta la stela sola si la du es diferente. — Simon 2020/10/04 21:01
    • Interesante! Ma me ia pensa ce la punto de la idea de recorda la presentia o asentia de la stela en la disionario es ce no tota la pronunsias cual on ta debe lista en la disionario es noncoerente. Parolas como agu, asi o Bologna es vera tal – on debe memori la asentua o la pronunsia, car lo devia de la regulas normal de elefen. Ma parolas como parario, desplia e suprainvesti segue la regulas normal per parolas composada o prefisada – si on sabe ce los es tal e cual es sua partes (para+rio, des+plia, supra+investi), on sabe cual on pronunsia los. Donce on ta pote considera no mostra un stela en tal caso. (Ma esta no es un cosa cual Xercan pote “calcula”.) — Cris 2020/10/05 17:18
      • Me pensa ce lo es usosa ce Xercan tira la atende a parario, car an si esta parola segue la regula per composadas, lo es un caso nonusual. Ance, “sufisinte bon” es sufisinte bon. Perfetia completa no es posible! — Simon 2020/10/05 18:12
  • La pronunsias de relia es duple noncoerente: /relia/ per la verbo, ma /relya/ per la nom e derivadas. Esce lo es intendeda como un derivada de lia? Si no, perce nos no dise /relya/ en jeneral? — Cris 2020/10/01 17:00
    • Me no sabe. Car relia apare como sua propre radis, lo pare no es derivada. Ma como tu dise, si tal, la pronunsia debe es /relya/. Probable nos ia ajunta la pronunsia pos discute lo en la pasada distante, ma me no recorda la razonas donada. Me sujesta sutrae la pronunsia, afin Xercan va mostra /relya/. La otra pronunsia, /relia/, ta es bon per sinifia simple “lia denova”. — Simon 2020/10/01 18:10
    • Si, /relya/ con asentua normal es serta plu bon. Cisa, si la parola no es ja multe usada, on ta pote considera cambia lo a religa per conserva la asentua sur la i (ca: relligar, fr: relier, it: rilegare) e per evita un confusa posible con re+lia (liga esiste ance, ma lo es plu rara e sola un nom). — Cris 2020/10/03 16:38
    • No un mal idea. La forma relia ia es elejeda car jeneral nos prefere es coere en tota la membros de un familias de parolas con la mesma radis etimolojial. Ma esta causa difisiles peti en alga verbos cual comensa con re-; nos ia ajusta reconta a raconta per esata esta razona. — Simon 2020/10/03 17:31
    • Me ia cambia relia a religa. — Simon 2020/10/10 13:43
  • E, ance, perce on ave un stela pos la pronunsia de invia? La pronunsia /invia/ (o, plu bon: /invya/) pare normal, car invia es un radis vera, no un derivada de via. — Mixel 2020/10/01 17:24
    • Acel ia es per clari la pronunsia en la pasada. Aora nos pote sutrae lo. Me no ia vide lo en mea traversa rapida resente per sutrae pronunsias coerente. — Simon 2020/10/01 18:10
• Un otra punto interesante es la nomes de la leteras: a, be, ce, etc, cual apare sola como en la campo “pronunsia” de la entrada prima su cada letera en la disionario. Probable estas debe es tratada como nomes, con sua propre entradas, e lasante sua pronunsias a la misterios majiosa de Xercan. Me opina ce “la parola matematica conteni du emes” es un frase asetable, per esemplo. — Simon 2020/09/29 19:26
• Me ta prefere NO ajunta la nomes de la leteras a la disionario, car donce la spelador no plu pote trapa eras como “ef” en loca de “es”. Ma me pensa ce lo ta es bon si tu sutrae la stela en la caso de leteras (= parolas con un letera) – /em/ es simple la pronunsia normal (= la nom) de m.
  • Acel es posible, e tu fa un bon punto sur la spelador. Me regrete ce esta proibi inclui la leteras como nomes comun, an tal. Cisa la spelador pote trata la nomes de la leteras como malspeles, como un caso spesial, car los es multe noncomun en testos normal. Alora los pote apare felis en la disionario. — Simon 2020/10/01 18:10
  • Personal me pensa ce esta no es nesesa – ma si tu prefere lo, perce no? — Cris 2020/10/03 16:38
  • Me va labora sur lo a lundi. — Simon 2020/10/03 17:31
• Ma la pronunsia de q ta debe es /kwa/ en loca de /qua/, me suposa. /q/ no es un sona definida en nosa indicas de pronunsia. — Cris 2020/10/01 17:16
  • La forma qua ta es usada si on ta spele esta nom como un parola. Acel es perce lo apare en la pronunsia. Me sujesta ce nos ajunta qua, e tota la otras nomes, e cambia /qua/ (su q) a /kwa/. — Simon 2020/10/01 18:10

Pos plu pensa, me deside contra ajunta entradas per tota la nomes de la leteras. Me ia ajunta sola qua, car lo ave un spele nonpredisable (ma lojical, car tota esta nomes conteni la letera pertinente). En loca, me va ajusta Xercan per no ajunta la stela si lo calcula esata la mesma pronunsia como lo donada en la datos. A presente, me labora tra la entradas per cambia áéíóú a _a_, etc, e per cambia c a k. (Lo pare ce mea serebro no es intera capas de fa esta du taxes a la mesma tempo: me trova ce me omete cambia c a k a multe veses. An tal, me persiste, car du traversas en un sola dia ta es estrema noiante.) E me sabe ce Xercan mostra sulinis leteral (_a_, etc) a presente – esta aida me a serti ce me ia visita tota la entradas pertinente, e me va coreti la codigo per mostra a pos ateni la fini. — Simon 2020/10/04 11:47

• Taxe completa. — Simon 2020/10/04 13:23

Alga pronunsias:

• La pronunsia de Hongkong ta debe es /hoŋkoŋ/ en loca de /hoŋgkoŋ/. Probable lo es la plu bon si on recorda esta pronunsia en la disionario, car la spele no segue la regulas de elefen.
  • Bon, me ia ajunta lo. — Simon 2020/10/05 18:12
• La pronunsia de Beaufort, Mar es /bofort/* – suposable lo ta debe es /mar bofort/. Multe otra Mares no ave cualce pronunsia mostrada (Alboran, Mar; Arafura, Mar etc.). Usual on no nesesa un pronunsia per espresas con alga parolas, car on pote xerca separada per la parolas. Ma en esta casos la nomes frecuente aveni sola en la combina con Mar.
  • Ajuntada. — Simon 2020/10/05 18:12
  • Alga relatada: an si Xercan mostra Beaufort, Mar, lo trova 0 articles si on entra esta parolas tal.
  • Esta es car la datos reteni virgulas car los es nesesada per la opera coreta de la funsiona “,” cual tu ia sujesta. E vera, esta pare coreta, car la terma es vera Mar Beaufort, no Beaufort, Mar. En pratica, la usor va tape simple Beaufort, donce esta no es un problem importante. — Simon 2020/10/05 18:12
  • Ma si on xerca “Mar Beaufort”, Xercan trova ance sola 0 article. Si lo trova la entrada en tal caso, on ta pote considera presenta la nomes de mares (e simil) en esta ordina natural en loca de la ordina inversada. En disionarios primida, on ta espeta “Mar Beaufort” su B, ma en un disionario enlinia, un tal ordina pare min importante, e vide nomes en sua ordina natural ta pote es vantajosa. — Cris 2020/10/06 15:35
  • Oce, ma lo pare nonprobable ce la usor ta xerca un espresa de du parolas; e pos proba lo sin susede, el ta simpli lo a mera “Beaufort”, me suposa. Si tu vole emprende la labora de ajusta tota la nomes jeografial en la disionario, me no oposa. Ma si tu vole ce me emprende lo, me sujesta cortes ce tu sesa cexa ☺ — Simon 2020/10/06 16:04
  • Me no cexa! E me serta no vole cambia cualce cosa en la vicitesto de la disionario. Sola, cisa, en la presenta. Ma no lo es importante e on serta pote lasa cosas como los es. — Cris 2020/10/07 14:26
  • Si tu vole pote tape Mar Beaufort e trova la article listada como Beaufort, Mar, acel no es fasil. Me ta pote deteta la virgula en la terma e reversa la ordina de la du parolas en la presenta, ma Mar Beaufort ta trova ancora no cosa, car la vicitesto (e donce la datos) dise Beaufort, Mar. A! un idea veni de veni: me ta pote ajusta la program cual leje la vicitesto per emete la datos, afin lo ta deteta la virgula e reversa la ordina. Me va atenta lo… — Simon 2020/10/07 17:48
  • … con susede. — Simon 2020/10/07 18:10
  • Multe bon, grasias! — Cris 2020/10/09 20:09
• Me es surprendeda ce Xercan mostra paranoica como /paranoika/. Me ta pensa ce la pronunsia es /paranoyka/, con la oi un diftongo?
  • Si, acel es surprendente, no? Lo es un era en la program – me ia atenta simpli la regulas, ma acel no susede. Aora coretida. — Simon 2020/10/05 18:12
• Perce reuni /re-uni/* ave un stela? Lo pare es un pronunsia coerente. — Cris 2020/10/05 17:53
  • La pronunsia coerente ta es /rewni/. Lo es marcada car on debe reconose lo como prefisada. — Simon 2020/10/05 18:12
  • A, evidente! — Cris 2020/10/05 19:10

pronunsia de parolas con ifen e de esclamas

Me nota ce Xercan no indica la pronunsia de parolas cual ave un ifen, como uau-uau. Cisa on ta pote mostra la pronunsia en tal casos, car la partes frecuente no es listada en la disionario? — Cris 2020/10/10 17:08

• Fada. Me ia pone la asentua a la parte final en cada caso, cual ia es la intende de la ifen en esclamas como ta-da, etc. Me ia ajunta un campo de pronunsia a a-uu, i-aa, no-oblida-me (per asentua oblida) e me-no-sabe-lo (per asentua sabe). On ta pote imajina respele a-uu e i-aa como a-u e i-a, ma me prefere la speles con la vocal duple – estas es apena parolas de la tipo normal. A-uu! — Simon 2020/10/11 07:43
• Me acorda, grasias. Me note ce nos ave alga otra esclamas cual fini en un letera duple: bzz, caa, grr, maa, mm, muu, ss. Probable la pronunsia es clar si la letera final es un consonante, ma en caso de vocales cisa nos ta cambia plu bon la pronunsia a /ka/, /ma/, /mu/ per clari ce sola un vocal es pronunsiada?
  • La idea es simple ce la vocal o consonante es pronunsiada en modo plu longa. — Simon 2020/10/11 17:54
  • Me acorda, ma an tal la indicas de pronunsia confusa en la caso de esclamas cual fini en un vocal. Pe, /kaa/ – si la parola ave du silabas, lo ta debe es /ka-a/, ma si lo ave sola un, lo no ta debe ave un sulinia. Parente Xercan pensa ce lo ave du silabas e ajunta la sulinia par esta. (Tua nova pronunsia /iii/ ave la mesma problem.) Si la pronunsia es /kaa/ o /ka/, la cosa ta es multe plu clar. — Cris 2020/10/12 14:49
  • Perce la indica presente no es clar? Estas es onomatopeas, e la usor conose ja la sonas cual los imita. Ma bon, la cambia es fasil per fada en Xercan, e me aseta ce lo es un boni, donce me ia fa lo. Grasias per la sujesta! — Simon 2020/10/12 16:00
• La pronunsiada indicada de iii es /yii/, ma cisa la pronunsiada intendeda es /i/, con sola un vocal longa? (en contrasta con i-i-i, cual ave tre).
  • Si. Me veni de ajunta un campo spesial per clari iii. — Simon 2020/10/11 17:54
• Cisa on ta pote cambia la spele de iu a i-u per representa plu bon la pronunsia (cual ta es coerente en esta caso) e clari ce lo es pronunsiada diferente de parolas como ia e ie?
  • Cisa, ma i-u aspeta fea, e si on prefere dise /ju/, acel pare egal asetable. Lo es mera un espresa natural de repulsa, no un parola sever sistemal. — Simon 2020/10/11 17:54
  • No plu o min fea ca a-uu e i-i-i, me ta dise, ma oce. O cisa lo ta pote es ii-u, en la modo de a-uu e i-aa? — Cris 2020/10/12 14:49
  • Jorj ia deside esta speles en la pasada. A-uu e i-i-i es sonas de animales. Iu es un esclama umana, donce de un clase diferente. I-u pare spesial fea: 33% de la parola es la ifen. — Simon 2020/10/12 16:00
• Cisa nos vole cambia la pronunsia de cucurucu a /kukuruku/ con la asentua en la silaba final? Un tal asentua pare tipal per esta onomatopea en multe otra linguas. — Cris 2020/10/11 16:28
  • Un idea eselente, bon trovada! — Simon 2020/10/11 17:54

nonclar, nongovernable

Pardona per disturba denova tu, ma me nota ce Xercan ave ance un problem si NC o NG aveni entre un prefisa e la parola xef, pe nonclar /noŋklar/ e nongovernable /noŋgovernable/. Me suposa ce la pronunsia intendeda es /non-/ en loca de /noŋ-/? En esta caso, car nos no ave radises cual comensa con nonc o nong, on ta pote ajunta simple un regula per cambia /noŋ/ inisial a /non/.

En tota, nos ave sete prefisas cual fini en N (bon, con, en, in, non, pan, sin), ma me trova la mesma problem sola en un otra composada: pangermanicisme. Nos ave pangolin como radis con pang-, donce en esta caso lo es cisa plu fasil si nos ajunta la pronunsia en la vicitesto (an si esta va produi un stela). — Cris 2020/10/18 19:19

• Interesante. Me ia solve lo par esamina la letera cual presede la (tronco de la) radis en un derivada. Si esta letera es N e la radis comensa con C o G, me supresa mostra /ŋ/ per la N. — Simon 2020/10/19 08:53
• Un idea multe bon! — Cris 2020/10/19 15:21

Me ia ajunta ance un numero serial a la adirije cual Xercan usa per carga la datos de la servador. La numero es ajustada a fini de compila la datos. Me ia fa esta car a veses me ia esperia ce, per alga razona, mea surfador ia refusa carga la datos nova, iniorante la fato ce la fixes distante es plu fresca ca los en la prememoria local. En esta modo la adirije de la datos difere cuando la datos difere, donce esta problem debe no reaveni.

Un otra boni peti: la paje pos compila la datos mostra aora la cuantia de traduis mancante en cada de la linguas xef. — Simon 2020/10/19 09:18

Me nota ce protoindoeuropean es mostrada como /protoyndoewropean/ en loca de /proto-indoewropean/. Me suposa ce otra derivadas do la letera final de la prefisa e la letera prima de la parola xef formi un de nosa diftongos ai, au, eu, oi ave la mesma problem. Nos ave ja coretis fada par mano en alga casos como reuni, ma cisa tu pote solve esta caso en la mesma modo como n/c e n/g? — Cris 2020/10/20 15:01

• Si – fada. Intrauteral ia es un otra. Me ia ajunta un ifen sempre cuando la prefisa fini con un vocal e la radis comensa con I o U. Donce reinventa indica aora la pronunsia /re-inventa/, cual es plu clar. — Simon 2020/10/20 16:07

pronunsias calculada compilada

La codigo per calcula la pronunsias es aora relativa longa e complicada, e me ia es ansiosa ce lo dana pico la rapidia de Xercan. Donce me veni de move lo a la compilador: la pronunsias calculada es aora en la fixes de datos cual nuri la tigre. Si me no ia era, tota debe funsiona como a ante, ma si vos vide un pronunsia noncoreta, no esita de informa me! — Simon 2020/10/20 12:02

• Interesante! Do on pote trova esta fixes? — Cris 2020/10/20 17:06
• En la mesma loca como sempre: la datos comun es asi e la traduis es asi per engles, asi per deutx, etc. — Simon 2020/10/20 17:11
• La fix comun es un lista [] de articles. Cada article es un lista de entradas; la entrada prima es la radis. Ance cada entrada mesma es un lista, comensante con la forma vera de la lexem. Esta es segueda par la forma simplida cual la xercas va considera, o un cadena vacua "" en la caso comun do la forma simplida no difere de la forma vera. A pos, on trova un lista de numeros, comun vacua [], cual descrive la diferes entre la du formas (afin Xercan pote colori coreta sua trovadas). La resta de la entrada es organizada como grupos de du: un corti de un campo usada en la vici (C per categoria, D per defini, P per pronunsia spesial, K per pronunsia calculada, entre otras), segueda par la contenida de acel campo. — Simon 2020/10/20 17:15
• Cada fix de traduis ave esta mesma strutur – un lista de listas de entradas – ma cada entrada conteni sola tre (o cuatro) cosas: la testo presentable de la tradui(s), la testo simplida, la lista numeral de diferes, e (si la tradui a la lingua pertinente manca e la tradui furnida es donce en engles) la numero 1. — Simon 2020/10/20 17:15
• Grasias! Me ia xerca ja futil en en.js per la pronunsias precalculada, ma me ia oblida esamina articles.js. — Cris 2020/10/21 19:48

pronunsia de la cortis

Bon dia, Simon. Me ave un demanda sur la pronunsia de la cortis, cual no es indicada en la disionario. Car, per esemplo, me suposa ce la corti pe no es pronunsiada /pee/, ma /peresemplo/, e pd no es pronunsiada /pede/ ma /perdise/. Ma on ave otra cortis, como lfn o lgbt cual es vera pronunsiada /elefen/ e /elgebete/. Cisa on pote spesifa la pronunsia de la cortis? — Mixel 2021/03/17 10:50

• Un bon idea. Ma personal, en mea mente cuando me leje, me “dise” pe e e pe de, simil a i dji e ai i per e.g. e i.e. en engles. — Simon 2021/03/17 13:15