Presidental

Bon dia, Simon. En relata con: “Maduro ia resta en la palasio presidential.”, esce ambos formas es coreta: presidental – formada sur “presidente” –, presidential – formada sur “presidentia”? Esce on ave un difere de sinifia entre la du? — Mixel 2020/09/02 10:22

• La un pertine a la presidente, la otra a la state (la posto) de es la presidente (o a la periodo en cual un person definida ocupa la posto). La difere es multe sutil, e serta ambos es coreta. La palasio parteni (e donce pertine) a la presidente, ma ance a la posto, car cada presidente en la serie abita ala (e a la periodo, car la presidente abita ala en sua periodo de posto). Vera, me es surprendeda par trova ce la disionario lista presidental e no presidential, car presidential pare plu natural. (Nota a me mesma: ta ce me usa acel spelador cual me ia crea…) — Simon 2020/09/02 12:25
• Esce nos nesesa vera ambos de presidental e presidential? Me pensa ce un ajetivo (preferable la forma plu simple: presidental) sufisa per ambos casos. Como tu dise, “la difere es multe sutil”, e otra linguas ave sola un forma. Cisa presidential pare plu natural a tu, car lo es la forma usada en otra linguas? Ma esta no es un bon razona per usa lo ance en elefen. — Cris 2020/09/02 17:09
• Jorj ia espresa a plu ca un ves ce el no gusta lo cual el nomi “la esperanti” de elefen, cuando naturalia sede a lojica. Un esemplo es ce nos ia ave la ajetivo europan, ma Jorj ia prefere cambia lo a european car esta forma es plu natural. Tota nosa linguas de fonte ave -ial(e) o -iel en esta ajetivo, donce si on ta eleje sola un forma, me opina ce presidential ta es preferable. Ma nota ance ce on pote usa parolas coerente derivada an si los no es en la disionario; mea usa de presidential oji no ia es un era. Per acel razona, me acorda ce nos no nesesa ave ambos formas en la disionario, e sujesta ce nos sutrae presidental. — Simon 2020/09/02 17:44
• On ta pote fa esta si presidental ta es un forma nova, ma lo es ja usada cuasi 50 veses en nosa Vicipedia e pare bon instituida. Lo es ance plu corta e plu lojical. Donce me ta razona ce en esta caso presidental vinse presidential (en la mesma modo como fortres ia vinse “forteres” e “fortalesa” 🙂). — Cris 2020/09/02 18:50
  • Oce, fortres es usada (apena) 40 veses en nosa vicipedia, e fortalesa 0. Ma, cauti, me es capas de scrive en la vicipedia un testo con 41 veses la parola fortalesa, si lo basta per entra esta parola *bonsonal en nosa vocabulo 🙂 ! — Mixel 2020/09/03 14:24
  • Tu ta nesesa scrive lo en multe pajes diferente, e su un nom falsa, per evita ce me ta reconose la engana ☺ — Simon 2020/09/03 14:33
• Oce, tu vinse par indica ce presidental es ja multe usada en Vicipedia. (Clar, me ia es contente con presidental en la pasada, o lo no ia ta survive mea editas en prepara la disionario primida! Un de la problemes minor en labora tan longa sur la mesma projeta es ce on pote cambia gradal sua prinsipes e ideas sin intende e sin persepi lo.) — Simon 2020/09/02 19:23