Preposadas pos nomes verbal

Aora cuando nos conose con sertia la categoria de cada verbo (transitiva o nontransitiva), me proposa esta regula per la eleje de la preposada pos un nom verbal:

• si la verbo es nontransitiva (mori),
  • on va dise “Alberto ia mori” > “la mori de Alberto”.
  • on va dise “Bernardo ia mori Alberto” > “la mori de Alberto par Bernardo”
• si la verbo es transitiva (ama),
  • on va dise “Bernardo ama Alberto” > “la ama de Alberto par Bernardo”

Esce vos acorda? Sunido

• Me acorda multe. Me pote trova alga casos en cual esta no conforma a me abituas presente, ma me pote aseta fasil ce esta abituas es no plu ce eras acaso. Un esemplo es “la bate de la pluve sur la teto”. Sin duta, nos va trova ance alga situas en cual nos prefere usa “de” o “par” per indica un otra rol (plu minor) en la frase, donce nos no ta insiste sever sur esta regula. Ma me crede ce el va opera bon como un pratica costumal. Simon
• Tu esemplo no crea un malcomprende par causa de la situa. Ma tu pote ance dise “la bate de la teto par la pluve”. Ma si tu parla de la “ataca de la engleses”, esta frase no es clar sin me regula. Con me regula el sinifia ce on ataca la engleses. Sunido
  • Si, me acorda. Simon
• Si la verbo “mori” es nontransitiva, me no comprende como on pote dise “Bernardo ia mori Alberto”… Esce esta “mori” sinifia “fa Alberto mori” ? Si tal, me prefere “Bernardo ia fa Alerto mori” (e en Peru: Bernardo ia fa Alberto fuji-mori)… Patric
• “mori” es fundal nontransitiva, ma como per cada verbo nontransitiva on pote transitivi el par la ajunta de un ojeto. Acel es la regula en LFN. Me gusta esta regula car el evita la usa de sufisas. On pote ance dise “Bernardo fa Alberto mori”, ma la construi “Bernardo mori Alberto” segue la lojica de la gramatica LFN. No ave esetas. Si on pote dise “la ensenior comensa la curso” e “la curso comensa”, alora on pote usa esta construi con cada verbo nontransitiva. Sunido
• Grasias Sunido per esta clari. En linguas propre on dise sur esta verbos (comensa) ce los es a la ves transitivos e nontransitivos… Regardante “la transitivas” (?) esce on pote dise “Alberto ia mata” per “Alberto ia mata se” ? Patric
• No, la frase “Alberto ia mata” es un frase noncompleta, car “mata” es transitiva, e on espeta la ojeto. Sunido
• Oce. Grasias. Patric
• Un bon esemplo es “senta”. El es fundal nontransitiva, e el indica la posa sentada, no la move a acel posa. “Senta la enfantes” sinifia “fa la enfantes senta” (= move los a la posa sentada). Simil, “senta se” sinifia “fa se senta” (= move se a la posa sentada). Ma si on omete “se”, “senta” deveni denova nontransitiva. Compara “senta” con “come”, cual es fundal transitiva. On pote “come un poma”, ma on pote ance omete e la ojeto e “come” simple. En la caso de la omete, “come” no deveni nontransitiva; el resta transitiva, e se sinifia no cambia. “Cambia” es ance un bon esemplo. El es fundal nontransitiva, como “senta”. Simon
• Grasias per la clari. Patric