Manteni de la resta de elefen.org

Elefen.org conteni no sola esta vici, ma ance un bon cuantia de pajes de HTML statical. La idea ia veni a me ce nos ta pote manteni acel pajes asi en la vici, usante un program per converti los a HTML e republici los de ves a ves, simil a lo cual nos fa per la disionario. Esce esta idea pare bon o bobo? (O bonobo? 🙂) — Simon 2020/07/23 11:01

• Me pensa ce esta es un idea multe bon! (Si lo no es tro complicada.) — Chris 2020/07/23 18:14
  • Lo es relativa simple en compara con scrive un xercador nova! — Simon 2020/07/23 18:44
• En mea opina, me no ave alga opina. Me vota blanca (si lo es posible ce me dise tal)… Cual ta es la profita de esta prosede? Me ia demanda a la bonobo, ma… — Mixel 2020/07/23 18:28
  • Me vide tre beneficas importante, a la min. (1) Acel pajes ta pote alora es ajustada par persones (fidada) otra ca sola me, Jorj e la bonobo. (2) Si nos ta vole fa cambias jeneral de tota pajes (par ajunta menus cadente o un panel ladal, o par jua con la sistem de stilos, etc), me ta prefere forte ajusta un program sentral cual jenera HTML ca edita sentos de pajes par mano. (3) La vici pote es lenta, a veses, ma la pajes statical apare estrema rapida. — Simon 2020/07/23 18:44
• Me es convinseda. Lo pare usosa. — Mixel 2020/07/23 19:16
  • (4) Un person lejente la leteratur ta pote eleje vide un testo traduida con o sin la testo orijinal. — Simon 2020/07/23 19:18
• Idea multe bon, ma on va nesesa un boton elejal per acel funsiona 4, no? — Mixel 2020/07/24 08:01
  • Nos ta pote reali lo par JavaScript en la HTML jenerada: un clica a un boton o un lia a la comensa o fini de la paje ta revela la traduis. Nos ta pote pone un tal boton/lia ance a cada paragraf individua, ma me pensa ce acel ta aspeta fea. Un otra posible, sin JavaScript, es ce nos ta jenera du fixes HTML per cada paje cual conteni traduis (fasil identifiable par <WRAP orijinal>), la un sin la traduis, la otra con, e ajunta un lia per salta entre la du. — Simon 2020/07/24 08:37
• Lo no va es un problem ce lo dupli la volum de la fixes? — Mixel 2020/07/24 09:29
  • Testo no ocupa multe spasio. La intera de la ramo leteratur ocupa min ca 6 megabaites – on ta pote teni lo en 5 discos mol en la tempo antica! — Simon 2020/07/24 09:47
  • Si nos jenera du fixes separada, la fix con la testo en ambos linguas ta pote presenta la du linguas como du colonas paralel. Acel ta aspeta bela, ma lo ta es cisa nonoportun per persones ci leje la paje en un telefoneta o simil. Donce me comensa prefere la idea de un boton simple cual revela o reasconde la testo orijinal. — Simon 2020/07/24 16:34
  • On no nesesa du fixes, ma on pote usa CSS per move la du colonas su lunlotra si la fenetra de la surfador es peti – me fa esta en la esemplos de Lytspel, pe Aliss’s Evidenss (cambia la grandia de la fenetra per vide la efeto). — Cris 2020/07/25 17:42
  • Grasias! Me oblida sempre ce on ave “flex” en CSS.

Me ia labora multe sur esta projeta oji, bataliante la monstro Pe-Hax-Pe, e me ave aora un motor jeneral cual es capas de converti a HTML cualce paje de DokuWiki (a la min, la partes de sua sintatica cual nos usa). A presente, me atenta ajunta sirca la motor un programeta per converti tota la ramo gramatica. Esta ia revela a me alga difisiles con la lias en la pajes rusce, cual es plu complicada ca los en alfabetas roman, ma me es prosima e va batalia plu… — Simon 2020/07/25 18:53

• Susede! La program publici cualce paje de gramatica cual ia cambia pos la publici presedente. Asi es la resulta. — Simon 2020/07/25 20:16
• Me ia fa alga plu bonis a lo. (Alga lias ia es rompeda, e alga caxas no ia apare.) Si vos persepi problemes en la pajes jenerada, dise a me, per favore! — Simon 2020/07/26 10:12
• Un lia defetosa: eras comun. — Mixel 2020/07/26 11:02
• Grasias. Acel va coreti se cuando me publici la ramo “eras”, ma entretempo me ia cambia la program per redirije tal lias a la pajes en la vici. — Simon 2020/07/26 11:50

Ance la leteratur es aora publicable e publicida. — Simon 2020/07/26 15:30

E Aora Oji. — Simon 2020/07/26 18:20

• U la labora! Lodas. E la boton   Mostra ance la testo orijinal|Asconde la testo orijinal   funsiona bon; lo es multe usosa ce on pote leje tota la testo traduida de (per esemplo) La Prinse peti, sin (o con) la incluis de la testo orijinal. — Mixel 2020/07/26 23:43
• Cuando on labora sur cualce parte de la vici (“gramatica”, “leteratur”…), on no asede fasil a la paje de publici. Me pensa ce la ajunta de un lia a acel paje, en la caxa de naviga, ta es usosa. — Mixel 2020/07/28 11:27

Un lia esiste a la pede de la paje xef de cada de acel ramos, ma probable la caxa de naviga ta es un loca plu bon, e plu coerente con la naviga en la pajes de la disionario. Me va ajusta lo pos mea come media. — Simon 2020/07/28 11:54
Si me fa esta, lo va confusa la program de publici, enviante lo en un sicle infinita. Me ta pote solve acel problem, ma la caxa de naviga formi un parte de lo cual es publicida, donce la pajes publicida ta conteni un lia (nonfunsionante) per publici se! Me sujesta ce tu ajunta la paje de publici a la lista de pajes favoreda en tua surfador. — Simon 2020/07/28 12:45
Ma… do la vole esiste, la pote esiste. Me ia crea un paje naviga cual conteni sola un lia a utiles:xef, e me ia ajunta {{page>utiles:naviga}} a la caxas de naviga en la gramatica e la disionario. Esta ave la vantaje ce la lia apare sola si a usores ci ave la permete de asede la ramo utiles. Aora me va fa la mesma a leteratur. — Simon 2020/07/28 14:11

• Multe grasias, Simon. Me ia ave la paje de publici en mea favoredas, ma me ia pensa ce la ave de la lia en la caxa naviga ta es usosa per tota la laborantes. — Mixel 2020/07/28 17:09

Me no sabe serta esca lo pote es un problem con Google ce multe pajes esiste aora en du locas en esta loca ueb – http://elefen.org/gramatica/sintatica.html e http://elefen.org/vici/gramatica/sintatica, per esemplo. Google no multe gusta “contenidas duplida”. Cisa lo ta es un bon idea ajunta un rel=canonical lia en la testas de la pajes en la vici, per marca la otra varia como canonal? (Vide Consolidate duplicate URLs.) — Cris 2020/07/28 15:31

• La pajes en la vici no es catalogida par cualce xercador cual segue la informa en nosa fix “robots.txt”. Per esemplo, a esta momento, Google trova no cosa cuando me xerca “estra si on es un ofisior stupida” (entre sinias de sita), cual veni de capitol 1 de Frate peti, e trova sola la varia nova publicida de la paje xef de la gramatica cuando me xerca “gramatica de elefen es un simpli de la gramatica comun”. Me ia ajunta la proibi a “robots.txt” a la comensa de esta anio, cuando la vici ia pare es constante visitada par robotes ci ia consuma tro multe recursos de la servador. — Simon 2020/07/28 16:34
• A, oce. — Cris 2020/07/29 13:13

Me nota, en pasa e con surprende, ce nosa Vicipedia conteni un copia intera de la gramatica, sin duta con alga diferes, car me no ia manteni lo en paralel con la testo en esta vici. Google ia deteta ce la du es esensal la mesma, e ofre sola la testo en Vicipedia, si on no clica per vide tota la “resultas ometeda”. — Simon 2020/07/28 18:08

• O, lo ta es serta plu bon si acel paje ta ave sola un resoma corta e lia la gramatica asi per plu detalias. — Cris 2020/07/29 13:13

La sistem de publici es aora capas de deteta lias rompeda. La ramo relijio ave multe, xef par causa de la paneles per naviga la Biblia. La gramatica ave ance un cuantia peti. — Simon 2020/07/30 19:07