jan Kulawa

Sur la strutur de silabas

Par vocales e consonantes, me es parlante de la fonemes, e no de la leteras. Me comprende ce, en Elefen, un silaba debe ave un nucleo, e un silaba pote ave ance un comensa ante la nucleo e un coda pos la nucleo. Me comprende ance ce, en un silaba, la nucleo es usual un vocale, la comensa es un segue de consonantes, e la coda es sola un consonante. Donce, esce diftongos es permeteda en la nucleo? Cual segue de consonantes no es permeteda en la comensa? E cual consonantes no es permeteda en la coda?

• Diftongos es permeteda en la nucleo. La parola “causa”, per esemplo, ave du silabas. La consonantes permeteda a la comensa e fini de un silaba es listada asi en la gramatica. — Simon 2022/08/27 09:48

Per esemplo, si un diftongo como IA es permeteda en la nucleo de un silaba, donce consonantes como N e L debe es permeteda en la comensa de esta silaba, con intende ce silabas como LIA (como en “folia”) e NIA (como en “alinia”) es validas, en cuando otras consonantes no es permeteda en la comensa de esta silaba sin ce la diftongo deveni divideda entre du silabas; ma si esta diftongo no es permeteda, donce la segues NI e LI debe es permeteda en la comensa de esta silaba, com la mesma intende.

• Nosa regulas dise ce “liana” ave tre silabas, ma “folia” ave du. Ma ance: “An si esta regulas defini la pronunsia normal per diftongos, on pote iniora los sin confusa.” Lo es nonimportante esce on dise /li-an-a/ o /lyan-a/, /fo-li-a/ o /fol-ya/. En parla rapida, manteni la distingui pote es difisil. La intende orijinal de la regula spesial per -LI- e -NI- ia es refleta a alga grado la consonantes LL e Ñ en espaniol e la consonantes GL e GN en italian. — Simon 2022/08/27 09:48
• (… e la consonantes LH e NH en portuges) — Mixel 2022/08/27 10:28

Ance, como es la divide silabal en Elefen? Per esemplo, lo es “jo-ia” o “joi-a”? Lo ave an regulas ofisial par esta, o esta es intendente suspesifada? — Clara 2022/08/27 02:03 UTC

• En la disionario, on trova la pronunsia de joia notada tal: /joya/ Vide asi: /disionario/?terma=joia Me opina ce on pronunsia plu /jo-ya/ ca /joy-a/, ma la difere es vera peti, e nonsinifiosa. — Mixel 2022/08/27 09:37
• Si, la difere es nonimportante. Multe persones no pote an oia lo. On pote segue sua propre prefere. — Simon 2022/08/27 09:48
• Me comprende. Denova, grasias a du vos per la respondes. — Clara 2022/08/27 16:22 UTC

Sur la sintatica de sintagma de preposada

Esce un proposa pote ave plu sintagma de preposada ca un? Si tal, esce la ordina de la sintagmas de preposada importa? E como on pote sabe, par la sintatica de Elefen, cual es la parolas, sintagmas o proposa ce la sintagmas de preposada es descrivente?

Per esemplo, esce la frase “me gida a la boteca con mea auto” es valida sintatical? Si tal, esce la ordina de la sintagmas de preposada “a la boteca” e “con mea auto” cambia la sinifia de la frase? Esce “con mea auto” descrive la restante de la frase o sola la sintagma nomin “la boteca”? Esce la sintatica de Elefen pote determina se esta sintagma de preposada descrive la un o la otra? E si tal, como? — Clara 2022/08/27 02:03 UTC

• Un proposa pote ave plu ca un sintagma de preposada, ma la sintatica no aida determina a cual parolas los es liada. Sola la contesto, o conoses de lo cual es probable en la mundo, pote clari esce “con mea auto” descrive la viaja o la boteca. (Ma on ta dise plu comun “me gida mea auto a la boteca”, evitante la problem.) Tua esemplo ta ave la mesma sinifia con ordina reversada de la sintagmas. — Simon 2022/08/27 09:48
• Me comprende. Me ia pensa ce, en “me gida con mea auto a la boteca”, lo es plu clar ce “con mea auto” descrive la viaja e no la boteca, contra ce lo ave plu ambigua en la ordina reversa de la sintagma. — Clara 2022/08/27 16:10 UTC

Sur la sintatica de suproposas

En un frase con plu ca un suproposas, esce on pote omete la sujeto e/o la predica de un suproposa, si lo es ja indicada en un suproposa pasada? Per esemplo, esce la frase “me pensa ce …, e ce …” es valida sintatical? Si tal, como la sintatica de Elefen justi esta? Me sabe ce esta es valida en portuges, e ance, me nota ce, a la min en portuges, esta no jenera ambigua, an en parla formal o tecnical, donce me vide no razona perce esta no ta debe es ance valida en Elefen. — Clara 2022/08/27 02:03 UTC

• Si, on pote dise “me pensa ce me va reposa per un ora, e ce me va labora en la jardin a pos”. Sintatical, acel du suproposas es ojetos de la verbo “pensa”; la frase ave la mesma strutur como “me come pomas e peras”. On pote ance omete “ce” en la suproposa du, ma alora ambos verbos suordinada es en la suproposa: “me pensa ce (me va reposa per un ora e va labora en la jardin a pos)”. Si tu no ia trova ja lo, me recomenda nosa paje sur sintatica. — Simon 2022/08/27 09:48
• Grasias per la respondes a meas demandas, Simon. Me va trata cada de los. Me ia vide la sintatica paje, ma me ave estas demandas, an tal. En la esemplo, la frase es valida porce ambos la suproposas es ojetos de la predica, donce on pote omete ambas la sujeto e la predica. An tal, esce on pote omete sola la sujeto e cambia la predica? Como en “me pensa ce …, e dise ce …”; esta es mea demanda ultima sur suproposas per la presente. — Clara 2022/08/27 16:03 UTC
• Me pensa ce la sinifia es clar, e dise ce lo es posible. 🙂 — Mixel 2022/08/27 18:26
• Si. E en fato, la paje sur sintatica dise ce esta es posible, a la fini de sua sesion sur juntas. — Simon 2022/08/27 19:09