Clasi sintatical

Cuando tu ave tempo, esce tu ta pote revisa esta? Me sola nesesa la tradui de disyuntiva (disjunctive) e tua opina sur juntada sinifiante yustapose e atributiva per tradui atributiva en espaniol. — Chabi 2019/11/26 09:46

• Per la suproposas ajetivin, la distingui de la du tipos es serta usosa (car la du sinifias difere), ma me sujesta nomi los “restrinjente” e “nonrestrinjente”, o “esensal” e “nonesensal”, o simple “major” e “minor”. Me nota ce tu ia dona la eticeta “spesifante” a la tipo cual no spesifa, ma cual ajunta mera un comenta minor; la tipo cual tu nomi “esplicativa” es vera la tipo spesifante! (“La libros cual me leje” spesifa a cual libros on refere.)
  • Cambiada.
• Tua esemplo de suproposa comparativa (“como un porco”) no es un suproposa; lo es mera un formula de preposada; e tua esemplo de suproposa modal es ance comparativa, en fato. Ma la terma “comparativa” ave ja un otra sinifia gramatical, e multe plu comun: mejor es la forma comparativa de bueno; e lo pare confusante si on usa lo ance per nomi un tipo de suproposa. Si tu desira un eticeta per tal suproposas, me sujesta “suproposas de compara”. Ma me repete ce tal eticetas pare sin valua; los complica la situa sin clari lo.
  • Cambiada
• Me no comprende la intende de “completinte” como un tipo de frase simple. E me opina ce lo cual es “ativa” o “pasiva” es la partisipio, no la frase. Un esemplo: “Me es dansante e burlada” ­– esce esta frase es ativa o pasiva? On an no pote dise ce la verbo es ativa o pasiva. Sola la partisipios es. — Simon 2019/11/26 18:45
  • En la frase simple me difere entre acel con verbos como es o pare e la otra verbos. La verbo “es” mera lia “Me es deutx” e tal, lo no ave ojeto ma un completinte. Tal me nomi esta frase “frases completinte”.
  • Cualce otra frases simple con otra verbos, me ia clasi los en ativa e pasiva ma pos leje tua comenta, me va sutrae esta. An tal, cisa lo ta pote es divideda en transitiva, nontransitiva e nonpersonal?

Par manca de esemplos, me no comprende la eticetas su frases composada, donce me no pote aida direta sur la tradui de disyuntiva e atributiva. En mea model mental de elefen, nos ave frases simple e frases complicada; la frases complicada es de du tipos: coordinada (= liada par un conjunta: e, ma, etc), e suordinada (= conteninte un suproposa, liada par un sujunta: car, afin, en cuando, etc).

Me gusta tua divide de la frases complicada: coordinada e suordinada. Tal, tua clasi es esta:

• Frase simple
• Frase complicada
  • * Frase coordinada - liada par conjunta
  • * Frase suordinada - liada par sujunta

La divide cual me fa es tal:

• Frases simple
• Frases complicada (con suproposas) pd Frases suordinada
• Frases composada: Coordinada (liadas con juntas) e yuxtapuestas (sin junta)

La difere cual me fa entre complicada e composada es ce en la frases complicada la suproposa depende de la frase xef e en la frases composada la du frases es nondependente (a la mesma nivel) pd

• Frase complicada: Me desira ce tota los veni. “Ce tota los veni” depende de la frase xef “me desira”.
• Frase composada:
  • Coordinada: Me come e tu dansa. Ambos frases es nondependente e los es liada par conjunta.
  • Yuxtapuesta (Me no sabe como tradui lo). Pd:
    • Me ia ariva, me ia vide, me ia vinse.
    • Me es cansada, me vade a leto.
    • Me no gusta tua casa, lo es tro grande.

An tal, me duta sur la yuxtapuesta car on pote vide lo como

• Me ia ariva [e] me ia vide [e] me ia vinse.
• Me es cansada [donce] me vade a leto.
• Me no gusta tua casa [car] lo es tro grande.

Si nos vide la frases yuxtapuesta como un mera varia de la frases composada en cual la junta es sutraeda (car on comprende lo sin dise lo), la divide ta es:

• Frases simple
• Frases complicada (con suproposas) pd Frases suordinada
• Frases composada: Coordinada (liadas con juntas)

Ma con la difere entre frases complicada e frases composada en ce en la prima ambos frases es dependente e en la du los es nondependente.

Lejente esta a pos me ia scrive lo, me crede ce me ariva a la mesma clasi ce tu, ma me ia ajunta la nomes complicada e composada” cuando tu scrive direta “suordinada” e “coordinada”. Si lo es vera, mea sola demanda es si en tua clasi lo aveni como me ia dise (en la frase coordinada ambos proposas en nondependente e en la suordinada la un es dependente de la otra).

• Mea opina es ce multe de acel categorias no es nesesada en un esplica de la gramatica de elefen. Per esemplo, la sola difere entre la suproposas averbin es ce cada de los comensa con un averbo diferente. Eticetas como “concesiva” e “consecutiva” es usosa sola en linguas como latina (e cisa espaniol e franses?) de cual sua gramatica varia per la averbos diversa. (Me pensa a tal cosas como la usa coreta de la sujuntiva, e la usa de “ne” en franses.) Plu, la eticetas “final” e “consecutiva” es multe nonclar (an si me aseta ce los es tradisional); “final” vole dise “de intende” e “consecutiva” vole dise “de resulta”.
  • Me va pensa sur esta doman.

Completinte – La terma usual per esta es “predicativa”. “Deutx” es predicativa e lo pertine a la sujeto “me”. On pote dise ance ce la proposa intera es predicativa, ma esta pote cade en complicas cuando un frase conteni proposas coordinada como “Me es deutx ma abita en Frans”. (Vide plu su “Coordinada” a su.)

Nota ce en alga linguas, on ave ance predicativas cual pertine a la ojeto (“they elected him president”, “I painted the wall blue”), ma en elefen los esiste apena. La sola comun es con la verbo nomi (“los ia nomi la bebe Ronaldo”).

Transitivia – Lo cual es transitiva o nontransitiva es vera la verbo, no la frase. Cisa on pote estende, laxe, la usa de esta du termas a proposas, ma no vera a frases intera: considera la frase “me pasea ma no traversa la ponte”, cual conteni un verbo nontransitiva e un verbo transitiva. (Non)transitivia es un cualia fundal (vocabulal) de verbos en elefen; ma on pote usa cualce verbo nontransitiva en modo transitiva (sintatical), simple par presenta lo con un ojeto direta.

Nonpersonal – Un terma interesante. Esce la verbo “pluve” es fundal nonpersonal? Probable no, car nos pote dise (an si rara) “la nubes pluve”. Cuando nos dise “lo pluve”, nos usa “lo” – un pronom personal – ma con un sinifia spesial cual nos pote nomi “nonpersonal”. Donce lo cual es nonpersonal es la pronom “lo”, no la verbo, e no la proposa o frase intera. A la min, me opina tal a esta momento…

Coordinada – Nota ce un conjunta pote lia ance otra partes strutural. Per esemplo, en “me come e dansa”, la strutur es: “me” + “come e dansa” – la du verbos es liada, e la sujeto sta estra la combina. La coordina de proposas es mera un caso spesial de esta.

Yuxtapuesta – Me sujesta tradui lo como proposas aposada, esata como “mea ami Laura” es nomes aposada.

Me ia ariva [e] me ia vide [e] me ia vinse. – Acel analise es posible, ma lo es un truco, en mea opina. Cuando nos dise ce un strutur es un “corti” de un otra, nos parla laxe. Esta no es la mesma como dise coreta ce “lfn” es un corti de “lingua franca nova”, per esemplo. La frase con la conjunta e la frase sin la conjunta es frases diferente, con strutures diferente. Donce me acorda con tu ce frases aposada es un conseta vera esistente. (Personal, an tal, me evita usa los, car los aspeta usual como eras de stilo.)

en la frase coordinada ambos proposas en nondependente e en la suordinada la un es dependente de la otra – Si. La “su-” en “suordinada” (e “suproposa”) refere a esta depende. “Suordinada” e “coordinada” es termas paralel con “sujunta” (junta suordinante) e “conjunta” (junta coordinante), donce los pare la termas la plu clar.

Un caso multe interesante cual no apare en tua lista es la infinitiva. Como tu ta analise esta frase? “Un bon ventrilocuo pote parla sin move sua labios.” En mea opina, “sin move sua labios” es un suproposa infinitiva. Lo es un suproposa averbin, ma lo es liada a la proposa xef par un preposada (“sin”), no un sujunta (“sin ce [el move sua labios]”). Compara “Me no pote parla sin un move peti de mea labios”, en cual “move” es clar un nom, no un verbo infinitiva, car lo es preseseda par “un” e segueda par un ajetivo (e un plu descrive introduida par la preposada “de”). En ambos casos, la serie de parolas “sin … labios” funsiona como un averbio (= es averbin) per descrive la verbo “parla”; ma en la prima esta parolas formi un suproposa, e en la otra los formi un formula preposadal.

Sur la eticeti de cosas cual no nesesa eticetas – Tal eticetas tende pare a me cuasi tan asurda como la declara ce “mea gato es negra, vea e dormosa” es un frase “felinativa” car lo ave un gato per sua sujeto. La declara ce “an si el ariva” es un “proposa concesiva” dise sola ce “an si” sinifia… lo cual lo sinifia. Multe de la termas de gramatica cual es tradisional usada en la linguas indoeuropean (e sin duta ance en espaniol) es eritada de latina e elinica – ma si on analise la gramatica de un lingua a cual esta termas no pertine, lo es bizara si on continua usa los. La gramatica latina es plen de la complicas de “proposas final”, “proposas consecutiva”, etc, car acel lingua pote comunica esta diferes de sinifia par sua sintatica e morfolojia (la sujuntiva, etc). En elefen, par contrasta, tal diferes es comunicada a la nivel de la vocabulo (la disionario), e donce on no nesesa clasi los a la nivel de la gramatica. — Simon 2019/11/26 22:55

Lejente tua comentas, me pensa ce tu es coreta: lo es plu bon lasa lo simple, an tal:

• Sur la frase simple: en tua comentas sur la completinte e transitivia, tua esemplos es noncoreta car tu ia scrive “Me es deutx ma abita en Frans” e “me pasea ma no traversa la ponte” ambos no es frases simple ma complicada. Cual me ia fa con la frases simple es “estende la sinifia de la verbo” pd, car la frase simple ave sola un verbo e la verbo es o transitiva o nontransitiva, la frase deveni transitiva o nontransitiva par esta razona (per clasi los).
  • Un bon punto, ma perce tu dise ce la frase deveni transitiva o nontransitiva? Me ta dise ce lo cual deveni transitiva o nontransitiva es la proposas de cual la frases es composada. — Simon 2019/11/27 08:37
• Tu ia dise ce “ma on pote usa cualce verbo nontransitiva en modo transitiva (sintatical)”, tal, la proposa deveni transitiva an si la verbo es nontransitiva e viceversa. En esa caso, cuando on analisa la sintatica de la frase, on vide ce la proposa es intransitiva an si la verbo no lo es. A esta me refere cuando me clasi la proposas e, par estende, la frases como transitiva o nontransitiva.
  • Denova, tu pote clasi sola la frases simple como transitiva o nontransitiva, car estas es la sola frases cual conteni sola un proposa. On no pote clasi “me pasea e traversa la ponte” como transitiva o nontransitiva (lo es miscada, en efeto). — Simon 2019/11/27 08:37
• Sur la completinte, en la gramatica lo es scriveda Un otra composante comun de frases es la completinte. Esta es un descrive ajuntada de la sujeto, e el pote segue verbos como es, deveni, pare, e resta: Computadores (sujeto) es (verbo) macinas (completinte). Cual me ia fa es dise ce la proposa intera es completinte, car lo ave un completinte pd estende la sinifia como me ia fa con transitivia. An tal, si tu prefere nomi lo predicativa, me ta concorda con tu. Tu deside la terma.
  • Grasias per tira mea atende a esta. La terma “predicativa” ia es ajuntada a la disionario a alga anios pos la scrive de acel parte de la gramatica. Aora, serta “predicativa” es preferable, e me veni de ajusta la testo. Con “predicativa”, on pote refere a la espresa predicativa (me es… “deutx”, “un om bobo”, etc) cual segue la verbo e ance a la proposa predicativa composada de la sujeto, la verbo e esta espresa predicativa. Acel no es tan clar con “completinte”: on pote refere bon a la espresa completinte, car lo completi la proposa; ma on cade en confusa si on dise ce la proposa intera es completinte, car… cual cosa lo completi? — Simon 2019/11/27 08:37
• Nota: Esta sola aveni en la frase simple, car lo sola ave un verbo. En resoma, mea proposa de la clasi de la frase simple es completinte (o predicativa), transitiva e nontransitiva. En la tre casos la nom es prendeda par estende de sinifia de verbo transitiva e nontransitiva, e de completinte.
  • Si. La verbo en un proposa predicativa es nomida un “verbo liante”. La difere entre verbos liante, transitiva e nontransitiva es nomida la “valentia” de la verbo (“valency” en engles). On ave ance casos rara como “los nomi la bebe Ronaldo” – esta no es mera un aposa, car en acel interprete, la frase ta sinifia ce los ia ave un bebe (Ronaldo) e los ia dona un (otra?) nom a el. Tal proposas ave un verbo transitiva con un espresa predicativa cual pertine a la ojeto. — Simon 2019/11/27 08:37
• Me sujesta sutrae la frases nonpersonal de la clasi.
• Me ajunta la frase aposada a la clasi.
• Regardante la eticeti de cosas cual no nesesa eticeta. Me ia releje mea esemplos e cisa la lojica es esta: si un supraposa averbin es introduida par un averbo de loca, lo deveni un suproposa averbin de loca. Con la suproposas averbin on pote ave du grupos: aceles con averbos de loca, tempo e modo e aceles cual espresa causa, condision, concede, resulta, etc. Como la grupo du es plu relatada con sinifia e, como tu ia dise, lo veni de la clasi de gramatica latina, me sujeta sutrae los e lasa sola la grupo un.
  • Me vide no difere grande (a la nivel de clasi) entre modo e causa, o entre tempo e condision. “Me bate la clo – como? – con un martel.” “Me bate la clo – perce? – car me ave un martel.” “Me bate la clo – cuando? – cuando me ave un martel.” “Me bate la clo – en cual situa? – si me ave un martel.” Tempo e condision pare spesial simil a lunlotra, e alga linguas (deutx, per esemplo: wenn) usa la mesma sujunta per ambos. E an la difere entre loca, tempo e modo pare pertine sola a la sinifia. “Me bate la clo con un martel.” “Me bate la clo con mea ami.” Du sinifias diferente de “con”. Esce ambos indica modos? Ultima, on fini con un categoria per cada sinifia de cada preposada e sujunta, cual es asurda. (Me sabe ce tu discute suproposas, e “con un martel” no es un tal, ma la mesma punto aplica a ambos, e suproposas de modo pare alga rara.) — Simon 2019/11/27 08:37

De tua responde me crede ce on pote clasi la frases tal:

• Frase simple
• Frase composada
  • Frase coordinada
  • Frase suordinada
  • Frase aposada

La clasi de la frases simple ta es (si on deside segue lo, si no, on pote lasa lo sola como “frase simple”)

• Completinte o predicativa
• Transitiva
• Nontransitiva

La clasi de la frases suordinada ta es:

• Suproposas ajetivin:
  • Restrinjente
  • Nonrestrinjente
• Suproposas averbin
  • de tempo
  • de loca
  • de moda

• Tu ia omete la suproposas nomin, de cual un sucategoria importante es la suproposas infinitiva. E me sujesta ce cisa ance la partisipios ativa pote representa suproposas: “la om traversante la ponte” = “la om ci traversa la ponte”. On no pote dise “traversante” es mera un ajetivo, car lo ave un ojeto direta, e ajetivos no fa esta. — Simon 2019/11/27 08:37

Cual tu pensa?

• Si tu vole fa un analise formal de la sintatica de elefen, me recomenda comensa con la tre regulas fundal de sintatica en cuasi tota linguas umana:
  • Composantes. Un frase es scriveda como un serie linial de parolas, ma sua strutur es un ierarcia de composantes, cual on pote representa en un scema simil a un arbor de familia.
  • Categorias. Un composante pote es o un parola solitar o un “formula” (engles: “phrase”) de du o plu parolas. Cada parola en la disionario ave un categoria sintatical: nom, verbo, ajetivo, etc. E cada formula ave ance un categoria sintatical: formula nomin (“la libro vea en la boca de la can”, “la boca de la can”, “la can”), suproposa ajetivin, etc. Formulas es nomida per la categoria de la parola a sua cor: “libro”, “boca”, “can”.
  • Roles. La composantes ave roles en la frase. Per esemplo, un formula nomin pote ave la rol de sujeto, o ojeto de verbo, o completinte, o ojeto de preposada, e probable ance otras. — Simon 2019/11/27 08:37

PS: Thank you so much for taking your time taling about this and explaining it to me. I am sorry for bothering you about this but I find it very interesting and it helps me learn the language as well.

• Vera, no problem! Ance me trova ce esta tema es fasinante. — Simon 2019/11/27 08:37

• Si tu vole fa un analise formal de la sintatica de elefen, me recomenda comensa con la tre regulas fundal de sintatica en cuasi tota linguas umana:
  • Composantes. Un frase es scriveda como un serie linial de parolas, ma sua strutur es un ierarcia de composantes, cual on pote representa en un scema simil a un arbor de familia.
  • Categorias. Un composante pote es o un parola solitar o un “formula” (engles: “phrase”) de du o plu parolas. Cada parola en la disionario ave un categoria sintatical: nom, verbo, ajetivo, etc. E cada formula ave ance un categoria sintatical: formula nomin (“la libro vea en la boca de la can”, “la boca de la can”, “la can”), suproposa ajetivin, etc. Formulas es nomida per la categoria de la parola a sua cor: “libro”, “boca”, “can”.
  • Roles. La composantes ave roles en la frase. Per esemplo, un formula nomin pote ave la rol de sujeto, o ojeto de verbo, o completinte, o ojeto de preposada, e probable ance otras. — Simon 2019/11/27 08:37

Per aora, esce on pote concorda en la seguente clasi?

• Frase simple
  • con proposa transitiva
  • con proposa nontransitiva
  • con espresa predicativa (en esta caso, la tota frase sujeto + verbo liante + espresa predicativa forma un proposa predicativa).
• Frase composada
  • Frase coordinada
  • Frase suordinada
    • Suproposas ajetivin:
      • Restrinjente
      • Nonrestrinjente
    • Suproposas averbin (on no divide los)
    • Suproposas nomin: Me va scrive sur esta plu tarde.
  • Frase aposada

Esce on pote dise ce on concorda con esta clasi per aora?

• Me sujesta esta clasi: — Simon 2019/11/27 13:49

• Proposa
  • transitiva
  • nontransitiva
  • predicativa
• Frase simple (sola un proposa)
  • transitiva
  • nontransitiva
  • predicativa
• Frase composada (du o plu proposas)
  • Frase aposada (nonliada)
  • Frase coordinada (liada par conjunta)
  • Frase suordinada (un proposa xef e un suproposa, liada par sujunta)
    • Suproposas ajetivin
      • Restrinjente
      • Nonrestrinjente
    • Suproposas averbin
    • Suproposas nomin
      • Declarante (“ce”)
      • Demandante (“esce”, “do”, etc – “el demanda do es sua libro”)
      • Infinitiva
    • Suproposas partisipial

Me gusta multe tua responde sur la regulas de sintatica, car me ia pensa parla sur esta a pos nos fini la clasi a supra.

Cuando tu parla sur categorias, tu dise: Cada parola en la disionario ave un categoria sintatical: nom, verbo, ajetivo, etc. E cada formula ave ance un categoria sintatical: formula nomin (“la libro vea en la boca de la can”, “la boca de la can”, “la can”), suproposa ajetivin, etc. Formulas es nomida per la categoria de la parola a sua cor: “libro”, “boca”, “can”.. Per me, cada parola en la disionario ave un categoria morfolojial, pd, nom, verbo, ajetivo, etc e cada formula ave un categoria sintatical (formula nomin, suproposa averbin) e, como tu ia dise, formulas es nomida per la categoria de la parola a sua cor: “libro”, “boca”, “can”.

• Ambos spesies de categoria es sintatical. La defini de “nom”, “verbo”, “ajetivo”, etc pertine a la modo en cual on pote usa la parolas en la sintatica. Per esemplo, un nom pote ave determinantes ante se e ajetivos pos se; un verbo pote ave un formula de nom per sujeto ante se, un averbo pos se, un formula de nom per ojeto pos se, etc. Morfolojia pertine a la forma de la parolas, ma en elefen la forma no permete ce nos predise la categoria: “parla” es fundal un verbo; “parola” es fundal un nom. Oce, nos pote ajunta (-s) sola a nomes, ma acel no es la defini de un nom – no, lo es un resulta ladal de la fato ce nomes es pluralable. — Simon 2019/11/27 13:27

Aora, esta categorias ave roles, como tu ia dise, pd un formula nomin pote ave la rol de sujeto, o ojeto de verbo, o completinte, o ojeto de preposada, e probable ance otras. Relatada con esta, me ia vole clasi la suproposas nomin tal:

• Sujetal - Lo es nesesada ce tu vade a scola.
• Ojetal direta - Me desira ce tota los veni.
• Ojetal nondireta - Me refere a [la fato] ce la sielo es azul. Suproposas ojetal nondireta es multe rara
• Predicativa - La problem es ce nos no ave tempo.

Pd, la clasi de la suproposas nomin es seguente sua roles. — Chabi 2019/11/27 09:17

• La difere entre la strutures de “Lo es nesesada ce…” e “La problem es ce…” es sutil. On pote razona an ce la prima es aposada, simil a “Lo es bon, esta musica”. Me crede ce esta es la sola strutur en cual elefen pone un sujeto pos la verbo, donce cisa esta analise no es coreta. Un esemplo plu serta de un suproposa nomin sujetal es: “Ce tu vade a scola es nesesada.” — Simon 2019/11/27 13:27

Oce, on ave un clasi sintatical en elefen:

• Proposa
  • transitiva
  • nontransitiva
  • predicativa
• Frase simple (sola un proposa)
  • transitiva
  • nontransitiva
  • predicativa
• Frase composada (du o plu proposas)
  • Frase aposada (nonliada)
  • Frase coordinada (liada par conjunta)
  • Frase suordinada (un proposa xef e un suproposa, liada par sujunta)
    • Suproposas ajetivin
      • Restrinjente
      • Nonrestrinjente
    • Suproposas averbin
    • Suproposas nomin
      • Declarante (“ce”)
      • Demandante (“esce”, “do”, etc – “el demanda do es sua libro”)
      • Infinitiva
    • Suproposas partisipial

Esce nos pote ajunta a la suproposas nomin:

• desirante: Me desira ce tu ave un note bon.
• esclamante: Me no pote crede ce me ia aproba!

(Cisa los es tipos diferente de suproposas nomin declarante?)

• Me vide no benefica en distingui los. Esce “me espera ce tu ave un note bon” es “esperante”? Esce “me proibi ce tu ave un note bon” es “proibinte”? No, estas es distinguida par la sinifia de la verbo xef. Simil, “ce me ia aproba” no es un esclama – la frase intera es la esclama. — Simon 2019/11/27 14:59

Como nos ta clasi esta du:

• Tu no sabe cuanto persones ia es ala (esclamante?)
  • La frase intera no es un demanda, ma la suproposa es un demanda nondireta/reportada, pd: un suproposa nomin demandante. La suproposa es egal a “la cuantia de persones ci ia es ala”. Ma cisa an la distingui entre demandas e declaras no es importante, car lo no coresponde a cualce difere de regulas sintatical. (Demandas direta ave sua propre regulas sintatical – cuanto tu ave? / tu ave cuanto? – ma en la nondiretas la parola de demanda (cuanto, do, etc) veni sempre prima, esata como ce en proposas declarante. Donce me recomenda iniora esta distingui per aora. — Simon 2019/11/27 14:59

Esce tu pote pone esemplos de suproposa nomin infinitiva e de suproposa partisipial?

• “Me desira parti pronto.” (ojeto)
• “Si, parti pronto es un bon idea.” (sujeto)
• “Me ia desende la scalera sin fa an un ruido peti.” “Pos asende la monte, me ia reposa per un ora.” (ojetos de preposadas)
• “La fem traversante la ponte es mea tia.” (ajetivin)
• “Vidente la nubes negra en la sielo, nos ia vade a en la casa.” (averbin)

Oce, multe grasias e pardona denova per esta conversa tan longa, me ja ajunta la clasi asi.

Parlante sur otra cosa (ma relatada), tu ia scrive:

Si tu vole fa un analise formal de la sintatica de elefen, me recomenda comensa con la tre regulas fundal de sintatica en cuasi tota linguas umana:

• Roles. La composantes ave roles en la frase. Per esemplo, un formula nomin pote ave la rol de sujeto, o ojeto de verbo, o completinte, o ojeto de preposada, e probable ance otras.

Cuanto roles on pote ave? — Chabi 2019/11/27 15:32

• Esta depende de la analise cual on usa. Cada composante ave un rol, e composantes es ierarcial, donce on pote ave un cuantia grande de roles. Jeneral, cada formula ave un nucleo e satelites (ance nomida “dependentes”). En “mea can vea”, “can” ave la categoria nom e la rol nucleo (de un formula nomin); “la” e “vea” es satelites, ma evidente los difere en sua sintatica, car la un apare ante la nucleo e la otra pos lo. On pote inventa eticetas como “determinativa” e “atributiva” per esta roles, si on vole, ma la cuantia de tal eticetas pote deveni enorme. A la nivel de la proposa intera, on ave sujeto, ojeto, predicativa, vocativa, e ajuntiva. (Me inventa la terma ajuntiva per refere a tota formulas averbin, como “en la note pasada”, “cuando me ia es plu joven”, etc.)
• On debe ance considera la modo la plu bon de analise la strutur sirca la verbo. Como tu vole analise “ia”, “va” e “ta”? Los no es averbos de la spesie normal, ma los no parteni a la verbo mesma. Esce “ia vade” es un spesie de formula? Esce “ia vade rapida” es un spesie diferente? Me no ia trova respondes sasiante a esta demandas en mea mente. — Simon 2019/11/27 18:13

Grasias per tua responde. Me vole sujesta cambia la ordina de la capitoles en la gramatica e pone frase e proposa una pos la otra. Ance, esce nos ta pote divide la capitol cual dice pronunsia e spele en du capitole, me ia scrive mea proposa en esta paje.

• La capitol “Frases” sta prima, car lo es intendeda como un introdui rapida a la ideas cual permea la resta de la capitoles. La capitoles seguente discute la categorias vocabulal. La capitoles sur la demandas e proposas apare pos la juntas, car los es la strutures en cual la juntas tende apare. En cual modo tu vole divide la capitol de spele e pronunsia? Lo es normal ce on presenta ambos a la mesma tempo, spesial en un lingua con un spele completa fonetical. — Simon 2019/11/27 19:38
• Oce, lo es lojica. Si tu vole, tu pote cisa move esta conversa a la foro con otra temas sur gramatica. — Chabi 2019/11/27 19:44

Un plu punto sur la teoria de sintatica. La verbo es la nucleo de cada proposa, e la otra partes (sujeto, ojeto, etc) es sua satelites. — Simon 2019/11/28 08:09

• Me crede ce me ia comprende cual tu vole dise, ma me va scrive un esemplo per vide esce nos pensa egal, car me duta a cual tu refere con cada proposa, si la verbo xef de tota la frase es la nucleo de cada proposa o cada verbo es nucleo de sua proposa.
• La verbo es la nucleo de la frase (e la otra partes como sujeto, ojeto, etc) es sua satelites. Aora, cuando tu dise “de cada proposa” tu no refere a “suproposas”, si? La suproposas ave sua propre nucleo (an si lo pote es ance un verbo) pero no la verbo xef de la frase intera.

Pd

Me pensa ce tu parla bon esta lingua.

• Pensa es la nucleo de la frase intera.
• Ce tu parla bon esta lingua es la proposa suordinada declarante.
• parla es la nucleo de la proposa suordinada declarante.
• La sujeto no ave un verbo como nucleo.
• La ojeto es esta lingua e la nucleo es lingua, no la verbo.

Esce tu ia refere a esta? — Chabi 2019/11/28 09:07

Pardona: me ia scrive ambigua. Me ia intende: En cada proposa, la verbo es la nucleo de acel proposa, e la otra partes de acel proposa es sua satelites. Ma lo es ance vera ce la verbo de la proposa xef es la nucleo de la frase intera, car la suproposas es satelites de acel nucleo.

La nucleo de un formula nomin es un nom o un pronom. La nucleo de un formula verbin (per esemplo: ia parla bon) es un verbo.

Con preposadas, linguistes tende regarda estas como la nucleos de sua formulas: imajina un verbo transitiva eni con la sinifia “es en”: me eni la casa = “me es en la casa”. Alora tu va vide ce me core en la parce (me core eninte la parce) es multe simil a me core comente un banana, do comente es evidente la nucleo de la parte comente un banana.

A su, me estende tua esemplo de frase e analise sua ierarcia intera. La termas en leteras MAJOR es la roles. Me ia sulinia la nucleos; tota otra roles es satelites. La termas entre [brasetas reta] es la categorias. Alga de la roles no ave nomes bon conoseda, donce me ia inventa los: los es mera eticetas.

• FRASE [proposa]: Me pensa ce acel om vea en la xapo parla bon esta lingua en la parce.
  • NUCLEO [verbo]: pensa
  • SUJETO [formula nomin]: me
    • NUCLEO [pronom]: me
  • OJETO [suproposa nomin]: ce acel om vea en la xapo parla bon esta lingua en la parce
    • NUCLEO [sujunta]: ce
    • ¿CORPO? [proposa]: acel om vea en la xapo parla bon esta lingua en la parce
      • NUCLEO [verbo]: parla
      • SUJETO [formula nomin]: acel om vea en la xapo
        • NUCLEO [nom]: om
        • ¿DETERMINATIVA? [determinante]: acel
        • ¿ATRIBUTIVA? [ajetivo]: vea
        • ¿ATRIBUTIVA? [formula preposadal]: en la xapo
          • NUCLEO [preposada]: en
          • OJETO [formula nomin]: la xapo
            • NUCLEO [nom]: xapo
            • ¿DETERMINATIVA? [la]: la
      • ¿ATRIBUTIVA? [averbo]: bon
      • OJETO [formula nomin]: esta lingua
        • NUCLEO [nom]: lingua
        • ¿DETERMINATIVA? [determinante]: esta
      • ¿AJUNTATIVA? [formula preposadal]: en la parce
        • NUCLEO [preposada]: en
        • OJETO [formula nomin]: la parce
          • NUCLEO [nom]: parce
          • ¿DETERMINATIVA? [determinante]: la

Nota ce on pote ance analise en la parce como un parte de la formula nomin esta lingua en la parce. Esta cambia la sinifia: lo cual es en la parce es alora la lingua e no la parla. Lo es comun ce la sintatica de frases es ambigua en tal maneras; persones usa sua comprende de la situa e de la mundo jeneral per eleje la interprete la plu probable. — Simon 2019/11/28 10:39

Me gusta la analise e me acorda con tu. La sola duta cual me ave es esce preposadas pote es nucleo (cisa par influe espaniol). Cuando on analisa un formula de preposada en espaniol, la preposada es la lia (enlace) e la formula nomin es la término, con la nucleo esente la nom. Ma me no ave problem si on segue tua sujesta de ave preposadas como nucleo de la formula preposadal. Ance, me ia coreti la paje, esce tu pote dise me si lo es bon?

La analises varia entre la linguistes, serta. Personal, me es relativa sasiada par analise la preposada como la nucleo de sua formula, seguente la lojica cual me ia dona a supra: un preposada es multe simil a la partisipio ativa de un verbo transitiva. Cisa la idea espaniol, de regarda la formula nomin como la nucleo, ave sua orijina en latina, do la morfolojia de nomes inclui multe casos cual pote usada en loca de un preposada. Ma ultima, tota analises es mera teorias!

En relata con tua paje, me sujesta ce tu pone “Cortis” e “Puntua” direta pos “Spele e pronunsia” o a la fini pos tota otra puntos. Los pare alga perdeda entre la morfolojia e la sintatica. La divide entre morfolojia e sintatica es tradisional, ma en elefen la sola infleta es la -s per la plural de un nom; e la sola otra morfolojia pertine a “Crea de parolas” e (a alga grado) “Numeros”. La otra puntos su “Morfolojia” pertine plu a sintatica ca a morfolojia, e “Demandas” e “Proposas” es serta temas de sintatica. Me no es convinseda ce la distingui tradisional es multe usosa: lo es plu clar si on presenta tota la informas sur nomes, o ajetivos, o simil… en un sola loca. An tal, me no conose tua projeta: esce tu intende scrive un gramatica nova de elefen per aprendores, o tu organiza la consetas gramatical en un modo sistemin per aida tua propre comprende de los? — Simon 2019/11/28 11:13

Me ia cambia cortis e puntua. Esce tu ta pote vide como organiza la resta? Me ia junta tota cual ia esiste ante en tua gramatica en la grupo morfolojia per ajunta cual nos ia discute como sintatica, ma cual tu dise es lojica: esente elefen un creol, on no ave multe morfolojia e la esplica xef es sintatical. La categoria sintatica ia es divideda en roles e construis sintatical car me no sabe cual nom dona a esta cual me ia ajunta (clasi sintatical?). Alora, me no sabe como organiza lo de forma sistemin.

Mea ojeto es truple:

• ajunta un parte sur “sintatica” a la gramatica (car me ia vide lo como sola morfolojia, seguente la model espaniol). Ma con tua esplica me ia reali ce lo es clar ce la gramatica es xef sintatica e no morfolojia e la organiza corente es la plu bon. Donce, me sujesta o ajunta un parte con cual nos ia debate (cisa nomida clasi sintatical) o cisa ajunta esta informa a la parte de proposas e frases.
• organiza la consetas gramatical en un modo sistemin per aida me comprende e studia los.
• Rescrive la libro de aprende cual me ia crea de lingua franca nova.

Si tu pote leje esperanto, cisa la organiza de PMEG va dona a tu bon ideas; capitoles 32 e 33 discute la clasi de frases e suproposas en esperanto, e la consetas corespondente en elefen es multe simil. “Clasi sintatical” pare un bon nom per la parte final de tua lista – ma nota ce la carater de acel parte es alga diferente de la lista simple de temas o capitoles cual presede lo. Me acorda ce un resoma de la sintatica ta es un bon ajunta a la gramatica, car multe de la eras cual elefenistes fa es sintatical, malinflueda par la sintatica de sua propre linguas. (Un esemplo: tu veni de scrive “esente elefen un creol”, ma tal “asolutas” no es permeteda par la regulas de elefen, e es confusante per leje.) Como tu dise, la gramatica de elefen es xef sintatical, e nos no asentua sufisinte esta en presenta lo. Cisa nos pote ajunta la resoma de sintatica en la paje esistente sur “Frases”. O tu opina ce un paje separada, plu prosima a la fini de la gramatica, ta es plu bon? — Simon 2019/11/28 13:07

Me conose ido (cual veni de esperanto) do me va atenta leje acel capitoles. Como la resoma inclui frases e proposas, cisa lo es plu bon ajunta lo como un parte separada a fini. Cual me ia vole fa es usa esta resoma como funda per esplica sintatica. Ance, me pensa (lejente tua responde) ce cisa on pote ajunta un capitol con eras e coretis (sintatica) e otra con false friends en alga linguas. — Chabi 2019/11/28 14:08

• Pos plu pensa, me opina ce la resoma es vera un supravide inisial de la teritorio, e va senta bon en la capitol “Frases”, do nos parla ja sur roles e proposas. A presente, acel paje es sceletin: lo nesesa alga plu carne. E lo no nesesa repete tota la esplicas e esemplos ja trovable en otra pajes, ma lia mera a los en un stilo resomante. Me va atenta labora sur esta a la fini de esta semana. Un paje de eras comun es ance un idea eselente; probable lo no ta parteni direta a la gramatica, ma lo pote apare en la ramo “Linguistica” de esta vici. Me no ia oblida la idea ce me ta scrive un blog tratante tal cosas; me ia prepara an un lista longa de temas posible per articles; ma scrive la articles ta consuma plu tempo ca me ave a presente. Un paje de eras comun en la vici ta es un bon compromete. — Simon 2019/11/28 14:22
• Do, tua sujesta es ajunta lo ante la capitol frases o en la capitol? Lo es ver ce la capitol nesesa plu labora, ma a la min on ave alga con cual comensa labora. Multe grasias denova per tua aida. — Chabi 2019/11/28 14:38
• Me sujesta ajunta lo en la capitol, o probable rescrive la capitol intera. — Simon 2019/11/28 15:05
• Oce, perfeta. — Chabi 2019/11/28 15:22