Un prison ave 20 prisonidas. La xef de la prison ama la teoria de probablias. El asembla la prisonidas e dise a los:
“Car la re ave sua aniversario 50, el vole dona a vos un posiblia peti per libri de la prison. Me ia reseta manos libre per organiza la proba cual determina vosa fortuna. Donce escuta atendente:
Pos du dias la salon xef de la prison va espeta ce vos entra en turnos - donce sola un a cada ves. Sur la table grande on va vide 20 cartas de carton, cada con un numero diferente (1 … 20) sur se. Cada carta ave ance un de la nomes de la prisonidas, ma on debe turna la carta afin vide la nom. Cada prisonida ave sua nom sur un carta.
Cuando un prisonida probada entra en la salon, tota la cartas mostra sola la numero sur se. La probada comensa turna la cartas. El turna un carta e regarda la nom sur lo. Si la nom no es sua propre nom, el continua turna. El pote eleje libre la cartas cual el turna, ma el ave a la plu 10 turnas per fa! Donce el ave la probablia de 10/20 = 0.5 per trova sua nom. Pos sua (a la plu 10) turnas el es gidada a un otra casa, isolida de la otra prisonidas, e la cartas de carton es organizada a sua situa orijinal per encontra la probada seguente.
La taxe de la proba es, ce cada de vos va trova sua propre nom. A pos la re va libri tota de vos de la prison. Si un de vos fali, nun va es libre.”
La joia peti cambia a un delude grande. Un prisonida Marco dise: “Me ia studia matematica. Me sabe ce nos ave pratical no posiblia car 0.5 a potia 20 es min ca un milioni!”
Sua camerada Luis dise. “Hmm. Acel modo de conta esije avenis intera nondependente. Me debe pensa a alga stratejia. Bon note, asta la doman!”
E a la dia seguente Luis asembla tota prisonidas e dise: “Me ia trova un stratejia cual dona a nos un probablia, plu ca 0.3, per libri! Lo funsiona sola si cadun segue la mesma stratejia. Donce per favore, prende a estra un pen e un libro de notas!”
Cada person ia scrive un lista de tota la 20 nomes alfabetida e seguente numerida. Donce tota de los ia ave aora un lista simil. Usante esta lista los ta pote ata longo esta stratejia:
La probada vide sua numero en la lista, e el eleje la carta con la mesma numero. El turna la carta e vide la nom sur lo. Si la nom de carta no es sua propre, el xerca per esta nom en la lista, e oteni ala un numero nova, longo cual el eleje la carta nova per turna.
Per esemplo: Micael ave la numero 8 en la lista. Donce el turna la carta numero 8. Sur esta carta el vide la nom Enrico. Enrico es numero 2 en la lista, e Micael turna la carta 2. Ala el vide la nom Rolf. Rolf es numero 13 en la lista. Micael turna la carta 13 e - cisa - trova sua propre nom Micael. Bon! El ia es fortunosa.
Tua taxe, lejor cara, es studia como esta stratejia funsiona, e descovre alga modo per conta la probablia, plu esata ca 0.3 (diseda par Luis en la nara).
—
La solve de esta problem es asi.
Esta paje es presentada con la lisensa CC Attribution-Share Alike 4.0 International.
Lo ia es automatada jenerada de la paje corespondente en la Vici de Elefen a 11 agosto 2024 (12:41 UTC).