Bonveni a Xercan, un util per esplora la vocabulo de Elefen con rapidia tigrin! 🐯
(La nom es un broma en refere a la tigre Shere Khan
en La libro de la jungla de Rudyard Kipling.)
Esta paje de aida conteni multe lias cual tu pote clica per proba esemplos de la itemes discuteda.
Fundal
Xercan responde direta pos cada letera cual tu tape en la caxa.
Normal, lo lista la parolas cual comensa con la testo cual tu ia tape.
Ma tu pote fa otra demandas par ajunta alga sinias spesial. Esta sinias es descriveda en la resta de esta panel, con esemplos clicable. (Proba! -tri)
Regretable, si tu xerca un parola xines, esta sinias spesial no es suportada a presente. Xercas per sinias xines trova los en cualce parte de un parola.
Teclas
Presa la teclas ↑ e ↓ o Paje presedente e Paje seguente per rola la resultas, an cuando la cursor es en la caxa de xerca.
Presa la tecla ↵ Entra o la tecla Cansela per reveni a la caxa de tape pos rola la resultas. Un difere peti entre la du teclas es ce ↵ Entra desfa la rola e revade a la comensa de la paje.
Parolas cual comensa con …
tri trova la parolas cual comensa con tri, en elefen o tua lingua elejeda, incluinte tri mesma, triste e – si tua lingua es engles – trickle. “Parolas” es separada no sola par spasios ma ance par ifenes (-) e sinias de elidi (').
,tri trova la espresas (de un o plu parolas) cual comensa con tri, en elefen o tua lingua elejeda, incluinte tricota, trigo dur (ma no tera de trigo), e – si tua lingua es engles – trip over (ma no take a trip). (En tua lingua elejeda, la espresas es separada par virgulas o punto-virgulas.)
Parolas cual fini con …
-tri trova la parolas cual fini con tri, incluinte tri mesma, filtri e – si tua lingua es engles – centri-.
Parolas cual conteni …
?tri trova la parolas cual contenitri, incluinte distrito e – si tua lingua es engles – electric.
Si on prefere, on pote usa la sinia > en loca: >tri.
Parolas esata
tri. trova esata la parola tri en elefen o tua lingua elejeda.
Tota derivadas
Normal, per cada article cual lo presenta, Xercan mostra sola la radis e cualce derivadas direta trovada par tua xerca. Si la article ave otra derivadas, los es inisial ascondeda, ma tu va vide + 5 plu derivadas (o simil) a la fini de la article. Clica esta testo per revela tota la derivadas de acel radis. Tu pote revela los ance par clica la radis mesma, a la comensa de la article; clica la radis denova per reasconde los.
.tri trova la radises cual comensa con tri – per esemplo tribu e triste – e mostra instante tota informas sur los e sua derivadas. Lo no trova la parola elefen tri (⅓), car esta es derivada de la radis tre.
Afisas deduida
Xercan es ance capas de deriva alga formas de parolas – plurales de nomes; ajetivos derivada de verbos par la prefisas -nte, -da e -able; e ajetivos e verbos con la prefisa non-: pares.
Lo pote dedui an plurales de partisipios negativa: nonrojidas.
Esta funsiona es disponable sola per parolas simple, cual conteni sola leteras minor. Parolas con non- es incluida sola si tua xerca comensa con non e ave plu ca du otra leteras.
Per supresa esta, tape % a la comensa de tua xerca: %pares. Lo es ance supresada si la terma fini con . (per trova un parola esata) o usa cualce de la sinias spesial -?>/\.
Eleje de linguas
Normal, la xercador trova egal parolas en elefen e la lingua cual tu ia eleje en la menu su la caxa de tape. A presente, tu ia eleje tua lingua elejeda.
Ma tu pote restrinje tua xercas a sola un lingua par ajunta un braseta ronda:
)tri – o, egal, tri) – xerca sola en tua lingua elejeda.
Alga linguas disponable ancora no ave traduis per tota parolas elefen. Cuando la xercador trova no tradui, lo mostra la tradui engles en loca.
Si tu cambia tua lingua elejeda, tu va vide la frase “Mostra traduis ance en [la lingua(s) vea]”. Si tu no deseleje la lingua(s) vea en acel frase, cualce traduis disponable en los va es ajuntada a la resultas de tua xercas seguente. Nota ce, an tal, la sistem va trova parolas sola en elefen o tua lingua presente.
Leteras major e sinietas
Normal, sola leteras e dijitos es considerada, e la xerca no distingui leteras major.
Leteras con sinietas es simplida (ä = a, é = e, œ = oe), etc.
Tu pote tape o la letera con sinieta o la forma simple, con resultas egal.
!Tri o !tri- o !tré trova esata acel formas. Tota sinias pos ! es xercada en modo esata, incluinte cualce parolas entre brasetas (normal iniorada).
/[dt]ris xerca un regex – un motif de sinias, trovante en esta esemplo la parolas cual conteni dris o tris. Si tu vole ce la regex distingui leteras major, usa \[dt]ris en loca. Regexes no iniora parolas entre brasetas.
Si tua lingua elejeda es engles, esperanto, franses o italian, /^-$ trova tota parolas per cual no traduis estas rejistrada en la disionario. (Per esta cuatro linguas la disionario es completa, estra un pico de derivadas minor.)
Lista bruta
#tri produi mera un lista bruta de parolas elefen, sin traduis o otra informas.
Combinas de sinias
Tu pote combina la sinias spesial: .tre. (tota informas sur la radis esata tre e sua derivadas); (-spa (parolas elefen cual fini con spa); )?eur (parolas cual conteni eur en tua lingua elejeda). Esperimenta! 🙂
Alga esemplos plu avansada: .?fre mostra tota informas sur radises elefen cual conteni la silaba fre; (r;/^[dt]ru lista la radises cual comensa con dru o tru; #z;b lista la parolas elefen cual comensa con b e ave ancora no tradui en tua lingua elejeda.
Pronunsia
La pronunsia de cada parola es indicada entre baras inclinada, usante la spele elefen per la plu de sonas.
En parolas de plu ca un silaba, la vocal de la silaba asentuada es sulinida.
/k/ representa la sona de la letera c, e la simbol /ŋ/ representa la sona velal de n en la combinas ng e nc. Per esemplo, la pronunsia de banco es mostrada como /baŋko/.
/y/ e /w/ representa la sonas de la leteras i e u cuando los es semivocal, forminte un diftongo con la vocal visina. Per claria, cuando un i o un u es a lado de un otra vocal ma no formi un diftongo, la du vocales es separada par un ifen en la indica de pronunsia – per esemplo /pro-ibi/*.
Pronunsias cual no segue esata la regulas normal es segueda par un stela. Xerca P: per lista tota de los.
Frecuentia de parolas
Per multe parolas, Xercan indica a cuanto veses la parola apare en la obras de elefen.
Per nomes, lo indica ance la frecuentia de la forma plural, e per verbos, la frecuentias de la du partisipios (-nte e -da).
Si un frecuentia manca, esta sinifia ce acel forma no es usada en la obras, o ce la forma consiste de plu ca un parola e donce no statistica es disponable.
Si tu ajunta ?lingua=xx a la adirije ueb de Xercan, lo va carga sua vocabulo en la lingua xx, per esemplo de per deutx, en per engles o fr per franses. Asi es un esemplo espaniol.
Si tu ajunta ?terma=parola a la adirije, Xercan va xerca la parola indicada. La "lia a esta xerca", cual apare a la comensa de la resultas de cada xerca, es de esta tipo.
Alga persones prefere ave la disionario en sua computador como un fix de testo plata. Asi tu pote descarga tal fixes per la cuatro linguas en cual cada parola en la disionario ave traduis. Tu pote descarga ance un fix completa, con tota detalias, incluinte la traduis disponable en multe linguas: