AORA OJI

Novas de la mundo, simple reportada en elefen
2021 · 2020 · 2019 · 2018 · 2017 · 2016 · 2015 · 2014 · 2013

La abri grandiosa de la Bolevar de la Sfinjes

28 novembre 2021

En Misre, en la site Luxor, carones de faraones e sentos de presentores ia apare en un rituo lusosa per selebra la abri publica de la Bolevar de la Sfinjes.

On ia pasa desenios en escava esta paseria antica. Lo ave cuasi 3 cilometres de longia e lia du de la templos la plu grande de la site, Karnak e Luxor.

La rituo ia conteni elementos de la festa antica cual ia viaja longo la via en cada anio.

Lo ia inclui ance musica inspirada par naras scriveda en ieroglifos sur la mures de la templos.

Misre espera ce la spetaculo grandiosa va aida sua setor de turisme, cual ia es resente bateda par tumulta political e la pandemica.

Omicron, un varia nova grave de coronavirus

27 novembre 2021

La Organiza de Sania Mundal (OSM) ia declara ce un varia nova de coronavirus es “consernante” (sua categoria la plu grave), donante a lo la nom omicron.

La varia ave un cuantia grande de mutas, e indicas temprana sujesta un risca aumentada de reinfeta.

Lo ia es prima reportada a la OSM de Sudafrica a 24 novembre, ma ia es ance identifiada en Botswana, Beljia, Hongkong e Israel. Alga paises ia deside ja o proibi o restrinje viajas a e de Africa sude.

Ier, la OSM ia dise ce la cuantia de casos de esta varia, inisial nomida B.1.1.529, ia pare crese en cuasi tota provinses de Sudafrica. Sola sirca 24% de la popla ala es completa vasinida.

La OSM ia dise ance ce on va nesesa alga semanas per comprende la efeto de la varia nova, en cuando siensistes va labora per determina como transmetable lo es.

Dr Anthony Fauci, conselor medical xef a la presidente de la SUA, ia dise ce an si la reportas sur la varia nova leva un “bandera roja”, lo ia es posible ce vasines va susede ancora preveni maladia grave.

Asionerias tra la mundo ia esperia un cade agu ier, refletante la temes de investores sur la efeto economial posible.

Un asidente matante en un mineria rusce

26 novembre 2021

A la min 52 persones ia mori en la desastre de mina la plu grave en Rusia en un desenio.

La aveni ia comensa cuando polvo de carbon en un duto de venti ia ensende ier, pleninte la mineria sibirsce con fuma, e matante 11 persones.

Cuando lo ia noti, un opera nonsusedosa per ateni deses de escavores mancante ia deveni trajedin car alga salvores mesma ia sofoca. Un fonte en la servis de crise ia dise ce “nun resta vivente”.

La majoria de la 285 persones en la mineria Listviajnaia, en la rejion Cemerovo a sirca 3500 cilometres a este de Moscva, ia sorti direta pos la ensende a 08:35 de ora local ier.

Ofisiores ia dise ce 49 persones es ospitalida con feris. Alga sufri de veneni par fuma, e cuatro es en state estrema grave.

Deses de escavores no ia pote evade pos la aveni inisial, ma on ia debe pausa la labora de salva pos deteta un cuantia perilosa alta de metano en la mineria, creante temes sur esplodes posible.

Un de la ecipos de salva ia fali emerji de la mineria a pos. Plu tarda, la corpos de tre salvores ia es trovada, levante la cuantia ofisial de persones mor a 14.

Ma en la tarda de jovedi, alga fontes ia reporta ce on no previde trova plu survivores e ce la cuantia de mores ia suprapasa 50, incluinte ses laborores de salva.

Tre persones, incluinte la dirijor de la mineria, es arestada en relata con alegas de falis de securia. Esta no es la asidente prima a esta mineria. Un esplode de metano ia mata 13 persones en 2004.

Plu jeneral, asidentes en minerias rusce no es noncomun. En 2016, la autoriosas ia evalua la securia de la 58 minerias de carbon de la pais e ia declara ce 34% de los es potensial nonsecur. La lista no ia inclui Listviajnaia.

Vladimir Putin, presidente de Rusia, ia dise ce el espera ce on “va pote salva tan multe persones como posible”, descrivente la perde de vive como “un trajedia grande”.

La ministro xef fema prima de Sveria resinia rapida

26 novembre 2021

La ministro xef fema prima de Sveria ia resinia a mera oras pos sua asinia.

Magdalena Andersson ia es anunsiada como la gidor ier, ma sua bujeta no ia es aprobada. En loca, la parlamento ia aseta un bujeta preparada par la partitos oposante, cual inclui la destra estrema antimigral.

Sua aliada en governa, la Partito Verde, ia resinia ance (e a ante), disente ce lo no ia pote aseta un tal bujeta.

Andersson, democrata sosial, ia dise ce el espera atenta deveni denova la ministro xef como gidor de un governa de un sola partito.

“On ave un pratica constitual ce un governa de aliadas debe resinia cuando un de la partitos abandona,” el ia dise. “Me no vole gida un governa de cual sua legalia va es dutada.”

La presidente de la parlamento ia dise ce el va contata la xefes de partitos sur la modo de continua.

Andersson ia es elejeda como ministro xef en la parte plu temprana de martedi car, su leges svensce, el ia nesesa sola ce un majoria de parlamentores no vota contra el.

A sento anios pos cuando femes svensce ia reseta la direto de vota, partes de la parlamento ia sta per aplaudi la gidor de la democratas sosial.

Sua eleje a la posto xef de un governa minorial ia segue un acorda a minuto ultima con la Partito Sinistra (oposante), par intercambia per pensiones plu alta per multe svensces. El ia oteni ance la suporta de la Partito Verde (aliada).

De la 349 membros de la parlamento o Riksdag, 174 ia vota contra Andersson. Ma ultra la 117 ci ia suporta el, 57 ia asteni, tal ce el ia vinse par un sola vota.

Andersson, un nador pasada campionida de la site universial Uppsala ci ave aora 54 anios, ia comensa sua carera political en 1996 como conselor a Göran Persson, la ministro xef alora. Tra la sete anios pasada, el ia es la ministro de finansia.

Ante sua vinse ier, Sveria ia es la sola pais nordica cual ia ave nunca un ministro xef fema.

Un documento de Einstein es vendeda a custa recordo

24 novembre 2021

Un manoscrito con calculas fada par Albert Einstein, en cuando el ia atenta formula sua teoria jeneral de relativia, ia es subastada per 11 milion euros.

La vende a la subasteria Christie’s en Paris ia rompe la recordo per un documento suscriveda siensal.

Esta es un de sola du paperes cual mostra la labora de la fisiciste teorial sur sua avansa grande. La teoria, publicida en 1915, ia cambia profonda nosa comprende de spasio, tempo e gravita.

La manoscrito de calculas ia es scriveda entre 1913 e 1914 par Einstein e sua colega Michele Besso, ci ia reteni la documento. La subasteria ia loda Besso per sua preconsidera en salva la paper.

“Einstein es algun ci ia teni vera poca notas, donce la fato mera ce la manoscrito ia survive e ia trova sua via a nos fa ce lo es ja estracomun,” Vincent Belloy, esperta a Christie’s ia dise.

La paperes conteni 54 pajes de calculas en inca negra de pen e, longo Belloy, mostra alga eras longo la viaja a la formula de la teoria.

Christie’s ia reporta ce la vende “ia atrae coliores de tra la mundo intera ci reconose la importa de la documento”. Ma on no ia revela la identia de la compror.

La teoria de relativia ia lansa lus a la orijina de la universo, la orbitas de planetas e la bucos negra. En maio pasada, un letera scriveda par Einstein, conteninte la egali la plu famosa de la teoria, E=mc², ia es vendeda contra plu ca 1,2 milion dolares esuan.

Ses inuites gronlandes xerca compensa de Danmarc

23 novembre 2021

Ses persones nativa gronlandes esije compensa de Danmarc pos es moveda a acel pais en un esperimenta sosial nonsusedosa en 1951.

La inuites, aora en sua desenios oto, es la membros survivente de un grupo de 22 enfantes ci ia es prendeda de sua casa per es educada como “dansces peti”. Cuando los ia reveni plu tarda a Gronland, los ia es poneda en un orfaneria e multe no ia revide sua familias.

Sua avocato dise ce cada de la ses survivores solisita 37 800. La autoriosas dansce ancora no ia comenta publica.

Ma en la anio pasada, la ministro xef Mette Frederiksen ia espresa formal la regrete de sua pais. “Nos no pote cambia lo cual ia aveni,” el ia dise. “Ma nos pote aseta la respondosia e demanda per un pardona par los ci nos ia debe cura ma a ci nos ia fali ata tal.”

Gronland es un teritorio autonom en la rena de Danmarc e depende de Kobenhavn per la maneja de sua mone, relatas esterna e defende, como ance la furni de la suveni anial grande.

En 1951, la autoriosas dansce ia deside ce un modo posible de moderni Gronland es par crea un tipo nova de person gronlandes.

Enseniores e pretes ia es solisitada a identifia enfantes a ci on va pote dona un reeduca e “un vive plu bon” sur la tera xef de Danmarc, e ci va revade a pos per deveni esemplores per relatas entre Danmarc e Gronland.

Multe familias ia esita ma alga ia acorda, e en maio 1951, la barcon Disko ia parti de la capital Nuuk, portante 22 enfantes.

Pos ariva, la enfantes ia es privada de contata con relatadas, ia ave problemes de lingua e ia es poneda en casas tempora adotante.

Un auto colide con un parada en la SUA

22 novembre 2021

Sinco persones ia mori e plu ca 40 ia es ferida cuando un auto ia colide con un parada en la stato Wisconsin en la SUA.

Un multiterenal roja ia es dirijeda tra un parada de natal en la site Waukesha, a ueste de Milwaukee, a sirca 16:40 de ora local. La xef de polisia ia dise ce lo ia colpa deses de persones, incluinte enfantes. Un person ia es arestada.

Longo un ofisior ci conose la trovas temprana de la investiga, la aveni no pare “a esta tempo” es un ata teroriste. Lo pare ce la suspetada ia es fujinte de un otra loca cuando el ia colide.

Un abitor local ia dise ce la ecipo de dansa de sua fia ia es colpada. “On ia ave pompones e sapatos e xocolada calda malversada a tota locas. Me ia debe vade de un corpo craseda a la otra per trova mea fia.”

La polisia ia averti ce cisa la cuantia de moris e feris va cambia en cuando on “colie informa ajuntada”, notante ce multe persones ia transporta se mesma a ospitales local.

Esta parada en Waukesha, un comunia de sirca 72 mil persones, aveni a cada anio en la soldi ante la festa de grasia. Lo inclui vestes fantasin, dansores e bandes marxante. La tema a esta anio ia es “comforta e joia”.

La xef de polisia ia dise ce sua ofisiores ia regania un “veculo suspetada” e ce un person ia es arestada, ma ia dona no plu detalias. El ia ajunta ce la investiga es “multe fluente”, e ce la polisia ia spara a la auto per atenta para lo.

La xef de pompores ia dise ce sua departe ia prende 11 adultes e 12 enfantes a ospitales prosima pos la aveni. Plu tarda, la polisia ia anunsia ce la scolas en Waukesha va es cluida oji.

Un video publicida en redes sosial mostra la auto pasante con rapidia grande tra paradores de strada. Un otra mostra la veculo colidente con lo cual aspeta como un grupo de musicistes. Polisiores ia core longo la strada, comandante persones a refuja en botecas.

Un atestor ia dise ce on ia ave silentia, segueda par xilias, e cores per esamina la persones ferida cuando la veculo ia colpa un ecipo dansante de xicas de entre nove e des-sinco anios. Un otra ia dise ce la auto ia colpa ance un grupo de “avas dansante” e a la min un person ia es lansada supra la fronte de la veculo.

La maior ia dise ce esta es un tempo de trauma per la site. “Mea cor estende a tota los afetada par esta ata fol.”

Un totem es redonada a la tera pos viaja longa

21 novembre 2021

Un totem spesial creada ia completi un viaja de 9000 cilometres de Mexico a la sude de Scotland.

La Totem Latamat ia es siselida par Jun Tiburcio en Chumatlán, Veracruz, de un sola arbor. Lo ia viaja tra Britan, incluinte un visita a Glasgow en la confere COP26, per asentua la consernas de persones nativa sur la cambia de clima.

Ier lo ia es redonada a la Tera en un rituo en la vila Dumfries, do lo va descomposa natural.

On descrive la totem como “un mesaje de la popla totanac a nosa comunias e xefes de mundo”. Lo intende remente como “profonda entretexeda con la natur es nosa esiste” e ance sur “la nesesa de ata sin retarda per disturba la dana fada par cambia climal”.

La dirijor artal de Border Crossings, compania teatral brites cual ia organiza la projeta, ia dise: “En tota locas do lo ia vade, Totem Latamat ia es bonvenida con cantas a rituos, emosiosa mostrante la spirito de unia entre nosa propre comunias e la poplas nativa ci sta a la linia fronte de la cambia de clima.

“La plu de la propre casa de Jun Tiburcio mesma ia es destruida par Siclon Grace en la periodo de la projeta, par resulta direta de la crese global de temperatur.

“Diferente de cultures materialiste ueste, cual atenta conserva sua obras de arte como modo de atrae valua monal, cultures nativa regarda sua obras como esentes con vive, e donce mortal.”

Osteraic enclui sua popla per evita un onda sinco

20 novembre 2021

A alga dias pos obliga persones nonvasinida a enclui se, Osteraic ia anunsia un enclui nasional completa contra covid, comensante a lundi.

La canselor Alexander Schallenberg ia dise ce esta va dura per no plu ca 20 dias, e ce on va es legal obligada a deveni vasinida de 1 febrero 2022. El ia reata a un cuantia recordo de casos a lado de un de la niveles la plu basa de vasini en Europa ueste.

Pos consenta con la governores de la nove provinses de Osteraic, Schallenberg ia dise: “Nos no desira un onda sinco.” El ia ajunta ce tro multe persones ia es provocada a evita la vasin, par causa de “tro multe fortes political, oposores debil de la vasin e novas falsa”.

Multe otra paises european introdui restrinjes con ce sua cuantia de casos crese.

En Nederland, un protesta en Rotterdam contra un projeta de pasaporto de covid, e contra un proibi de focos artal a la vijila de anio nova, ia dejenera a un tumulta violente en cual protestores ia lansa petras a la polisia e ia ensende autos. La site ia es poneda a state de crise e sua stasion xef de ferovia ia es cluida.

Deutxland ia esperia alga dias de infetas recordo en esta semana, e la ministro de sania ia parla sur “un crise nasional cual esije un labora nasional combinada”.

Xefes deutx ia acorda ja introdui restrinjes per persones nonvasinida en rejiones con cuantia alta de ospitalis. La parlamento suporta ce persones debe mostra pasaportos de covid en buses, trenes e laborerias.

Ma aora en la stato Baiern, bordante Osteraic, la ministro presidente Markus Söder ia declara “un enclui par fato per la nonvasinidas”. Bares e locas de note va clui per tre semanas e on ia cansela tota mercatos de natal.

Un eglesor djihadiste es matada en Kampala

19 novembre 2021

La fortes de securia en Uganda ia mata par fusil un eglesor muslim acusada de labora con un grupo armada relatada con bombis umana en la capital Kampala.

Ofisiores ia dise ce Xec Muhammad Abas Kirevu ia enscrive persones a selulas dirijeda par la Fortes Democrata Aliada (FDA), rebelores ci ia promete sua fida a la grupo djihadiste Daex. El ia es matada direta estra Kampala.

A la min cuatro persones ia es matada par atacores sur motosicles ci ia esplode se en la site a martedi. Plu ca 30 otras ia es ferida en la ataca, cual Daex ia dirije (longo sua propre declara) e per cual ofisiores ia culpa la FDA.

La FDA militariste islamiste ia es formida en Uganda en la desenio de 1990 ma ave aora sua base en la Republica Democrata de Congo. Pos promete sua fida a Daex en 2019, lo ia esecuta sempre plu atacas en la nom de acel organiza.

Dudes-un persones ia es arestada pos la ataca a martedi, en lo cual la polisia ia descrive como la desasembla de selulas teroriste FDA en Kampala e tra la pais. 13 suspetadas, incluinte alga enfantes, ia es intersepida en atenta traversa la frontera a RD Congo. A mercurdi, cuatro operores suspetada de la FDA ia es matada prosima a acel frontera.

On xerca ance un plu eglesor, Xec Suleiman Nsubuga, ci on acusa de instrui teroristes, radisali enscrivedas potensial, e furni materias per improvisa aparatos esplodente.

En la mense pasada, un servor de restorante ci ia ave 20 anios ia es matada cuando un bomba, lasada en un saco de compra, ia detona en un bar en Kampala. A alga dias plu tarda, persones plural ia es ferida cuando un bomba umana ia detona se en un bus prosima a Kampala. La polisia dise ce ambos avenis ia es liada con la FDA.

Reportas plu vea …

Esta paje es presentada con la lisensa CC Attribution-Share Alike 4.0 International.
Lo ia es automatada jenerada de la paje corespondente en la Vici de Elefen a 28 novembre 2021 (08:43 UTC).