Xina e Rusia va construi un stasion spasial lunal

Xina e Rusia ia anunsia un projeta de construi un stasion spasial a la Luna.

Roscosmos, la departe rusce de spasio, dise ce lo ia suscrive un acorda con la Ajenteria Spasial Nasional de Xina per developa un compleso de rexerca sur la surfas de la Luna, o en orbita, o ambos.

Un declara par ambos paises dise ce la stasion va es disponable per usa par otra nasiones. La Stasion Lunal Siensal Internasional va fa un varia grande de rexerca siensal, incluinte la esplora e esplota de la Luna.

“Xina e Rusia va usa sua esperia cumulada sur siensa spasial, sur rexerca e developa, e sur la usa de aparatos spasial e tecnolojia spasial, per developa juntada un mapa de via per la construi de un stasion lunal internasional per rexerca siensal,” la declara ia dise. Lo ia ajunta ce Rusia e Xina va colabora per projeta, desinia, developa e opera la stasion.

Xina es un arivor relativa nova en la campo de esplora la spasio, ma en desembre pasada, sua sonda Chang’e 5 ia susede retrae roca e solo cual lo ia prende de la Luna. On ia regarda acel como un plu esemplo de la capasia cresente de la pais en relata a la spasio.

Rusia, cual ia abri la via de esploras spasial, prepara selebra la aniversario 60 de la vola spasial prima de un person, fada par Iuri Gagarin a 12 april 1961. En anios resente, Rusia ia deveni eclisida en esta campo par Xina e la Statos Unida.

En la anio pasada, Rusia ia perde sua monopolio de transporta astronautas a la Stasion Spasial Internasional, cuando la compania privata SpaceX ia susede fa esta a du veses.

La SUA ia anunsia ja sua intende de revade a la Luna ante la fini de 2024. En acel program, nomida Artemis, un om e un fem va sta sur la satelite en lo cual va es la visita prima par umanas a la surfas lunal pos 1972.