Un tempesta grande talia la lias sirca Vancouver

En la ueste de Canada, lias de trafica sirca Vancouver ia es taliada par un tempesta matante, descriveda par la ministro de transporta como “la tempesta de clima la plu mal de un sentenio”.

Du autovias juntante esta site a la costa ueste ia es cluida pos deveni danada par inondas grave. Un fem ia es matada par un liscatera sur un autovia, e laborores salvante dise ce a la min du plu persones manca. On ancora no ia determina la cuantia de “veculos ocupada cual ia es perdeda en la lisca”.

Un motoriste ia dise ce el ia vide la liscatera desendente sur trafica ja nonmovente: “Apena nos ia reentra a nosa veculos, la persones ante nos ia es criante e corente. La espresa sur sua fases, lo ia es como un tsunami veni. Lo ia es la cosa la plu asustante cual me ia vide ja. Me ia turna me, e me ia regarda la lado intera de la monte desendente e eliminante esta autos, tota scopida a via. Un panica completa.”

Miles de casas en la provinse Columbia Brites ia es evacuada cuando un “rio atmosferal” ia cade la pluve rejional promedia per un mense en sola 24 oras. Tota 7000 abitores de la site Merritt, a sirca 190 cilometres a norde-este de Vancouver, ia es comandada a abandona sua casas a lundi. Neva ia cade ala ier, e on ia vide autos flotante en la inondas fria en la site.

Elicotores ia es enviada ance a Agassiz, vila montanial, per salva sirca 300 persones trapida sur un via.

La pluve e venta de lundi ia fini jeneral en la posmedia de martedi, ma alga comunias ia resta isolida. Un parte de la Autovia Transcanadian, cual junta Vancouver a la resta de la pais, ia es sumerjida. E un parte de la Autovia Coquihalla, cual lia Vancouver a la interna de la provinse, ia pare destruida par la inonda.

A reportores en la capital Ottawa, la ministro xef Justin Trudeau ia dise ce el monitori la situa: “Nos va es ala per aida en cualce modo, forma o manera.”

Tra alga tempo, la via xef disponable per sorti de Vancouver ia es par entra a la SUA ante reveni a Canada. Ma per reentra, on nesesa un analise negativa de coronavirus, e la vias en la stato Washington en la norde-ueste de la SUA ia es ance afetada par la tempesta.

La porto de Vancouver, la plu grande en Canada, ia debe suspende tota asedes ferovial par causa de inondas e liscateras, parante la moves de comables, combustables e otra benes. Tubones de carburante en la rejion ia es ance cluida per securia.

En la estate, Columbia Brites ia esperia un onda de caldia recordo cual ia mata plu ca 500 persones, e focones forestal cual ia destrui un vila intera. Plu temprana en esta mense, on ia vide ala un tornado a la ves prima en sinco desenios.