Un stato nijerian va proibi testas de manicines

La polisia en Kano, un stato de majoria muslim en Nijeria, ia comanda botecas a usa sola manicines sin testas per mostra vestes.

“Islam desaproba idoli,” Haruna ibn-Sina, comandor de la polisia de xaria, ia dise. “Con la testa, lo aspeta como un umana.” El vole ance ce la manicines sin testa es covreda a tota tempos car mostra “la forma de la seno, la forma de la posterior, es contra la instruis de xaria”.

Kano es un de 12 statos en la norde de la pais cual pratica la codigo moral muslim. On intende ce la sistem pertine sola a muslimes, ma en realia, nonmuslimes es ance presada a segue la comandas.

Comersiores a Sabon Gari, un parte de Kano de majoria cristian, ia espresa sua desplase, disente ce mostra vestes sur manicines sin testa ta redui sua atraosia a pasores e ta afeta sua comersia.

En la semana pasada, ibn-Sina ia critica fotos de la selebra de sposi de Zahrah Bayero, la prometeda de Yusuf, fio de Presidente Muhammadu Buhari, disente ce el ia fali mostra un bon esemplo a otra muslimes car la fotos mostra sua spalas esposada. El ia critica ance los ci ia comparti la imajes, descrivente esta como pecosa.

En la anio pasada en la site Kano, polisiores ia rasa la capeles irocuoi de omes joven sur la troterias, e ibn-Sina ia reproxa otras ci porta pantalones basa.

El ia proibi ance la usa de la terma “venerdi negra” per anunsia sua dia de descontas, disente ce venerdi es un dia santa en islam. El ia es jeneral iniorada par stasiones de radio e sentros comersial, e los no ia es punida.

Multe eglesores muslim major, como Halliru Maraya de la Consilio Muslim de Nijeria, dise ce la disposa polisial sur la manicines es coreta, car “islam es oposada a siseli scultas umana, sin depende de la nom usada”.

An si la anunsia en Kano es la prima en Nijeria, on ia vide atentas en otra paises xef muslim per restrinje la usa de manicines.

En 2009, la polisia en Iran ia averti botecores contra mostra manicines fema con curvas de corpo o sin hidjab. E en Gaza en 2010, la organiza islamiste filastini Hamas ia comanda ce botecas sutrae manicines e fotos de modeles en vestetas, per proteje “la moralia publica”.

Per la abitores de Kano, lo no es clar como on va enforsa la comanda nova, car ibn-Sina ia esclui saisi la manicines desaprobada, disente ce el prefere “otra stratejias”.