Un manada tumultosa ocupa la Capitolio de la SUA

En la SUA, legores ia revade a la Capitolio per fini validi la vinse presidental de Joe Biden, a poca oras pos cuando suportores de Donald Trump ia ataca violente la construida en un tumulta do cuatro persones ia mori.

La manada ia entra a la construida, suspendente un sesion de Congresa. Joe Biden, presidente elejeda, ia condena forte la “revolta”.

Donald Trump, ci ia urje la protestores a marxa contra la Capitolio, ia recomenda plu tarda ce los “vade a casa”, an en cuando el ia continua fa alegas falsa sur manipula de votas. Twitter e Facebook ia suspende tempora sua conta.

En la sera, vispresidente Mike Pence ia inisia la sesion recomensada, do la legores conta e confirma formal la votas elejente, descrivente la aveni como “un dia oscur en la istoria de la Capitolio de la Statos Unida”.

Alga republicistes leva oposas en la sesion per atenta reversa la resulta, ma lo es cuasi tota nonprobable ce los va susede.

La caos a martedi ia segue pos la vinse de du senatores democrata en elejes en Georgia, cual ia dona a sua partito la controla political de la Congresa.

Protestores ia surje per asende la scalera estra la Capitolio a sirca 14:15 de ora local, puxante a via paradores e polisiores antitumultal per penetra la construida.

Congresores ia asconde su sua sejas cuando on ia xuta gas lacrimojen. La atacores, de ci alga ia porta armur, ia usa iritantes cimical contra la polisia. Los ia cria e ia brandi banderas de Trump e de la SUA en vaga tra la coredores, esijente ce on reversa la resulta de la eleje.

Un fem ia es fusilida par la polisia, e tre otras ia mori par causa de urjentes medical.

Miles de soldatos de la Garda Nasional e ajentes de la FBI e de la Ajenteria Secreta ia es postida per aida la polisia inondada. On ia trova du bombas tubo en construidas prosima, la un en la ofisias de la Comite Nasional Democrata, e la otra en la xeferia de la Comite Nasional Republiciste.

La ocupa de la Capitolio ia dura tra plu ca tre oras ante cuando la enforsores de lege ia securi lo. On ia vide poca indicas ce la protestores obedi la recomenda par Trump ce los vade a casa, an con un proibi de sorti declarada par la maior de Washington de 18:00 asta 06:00.

Biden ia dise ce democratia es “su ataca sin presedente”. “Ce on ataca la Capitolio, rompe fenetras, ocupa ofisias sur la solo de la Senato de la Statos Unida, foraje en buros en la Salon Basa, menasa la securia de ofisiores coreta elejeda – lo no es un protesta; lo es un revolta.”