Un mafior es caturada pos posta un video de cosini

La desira de un gangster italian per esibi sua capasia de cosini ia prisoni el pos sete anios de fuji.

La polisia italian ia trasa Marc Feren Claude Biart par la videos cosinal cual el ia publici en YouTube. An si el ia asconde sua fas, tatuas sur sua corpo ia resta vidable.

Esta membro alegada de la gang criminal ’Ndrangheta, ci ave 53 anios, ia es arestada en la Republica Dominican a mercurdi de la semana pasada e es aora estradida a Italia.

Biart ia ave un vive cuieta en la vila Boca Chica. El ia es un fujor pos 2014, cuando la polisia ia xerca el par causa de sua contrabanda alegada de cocaina a Nederland per la clan Cacciola de la mafia ’Ndrangheta.

On regarda la ’Ndrangheta como un de la grupos criminal organizada la plu potiosa de mundo, car lo controla la plu de la cocaina cual entra a Europa. Lo ave sua base en Calabria, la rejion de Italia la plu prosima a Sisilia.

La xef alegada de la clan, Luigi Mancuso, ci ave 66 anios, es conoseda como “La Tio”. Otra membros ave nometas como “La Lupo”, “Grasosa” e “Blonde”.

Aora, tota va es judida en la litiga de mafia la plu grande cual Italia ia vide en desenios. 355 persones, sur ci on alega ce los es gangsteres o ofisiores sobornosa, es acusada pos un investiga longa contra la grupo.

En un escuta ante la prosede formal, plu ca tre oras ia es usada per leje la nomes de la litigadas. La acusas inclui omiside, contrabanda de drogas, estorse, e lava de mone.

On previde ce plu ca 900 persones va presenta sua atesta en la litiga, cual ia abri en janero e va dura tra du anios.