Un festa de filma svensce, solitar en un faro

Un ospitalor svensce ia gania un compete per regarda tota 60 filmas de la Festa de Film Göteborg en un faro sur un isola peti a la costa de Sveria.

Lisa Enroth ia vinse 12 mil otra sinemafilicas ci ia compete de tra la mundo. Esta fem, ci ia labora con pasientes de covid tra la pandemica, previde felis la esperia.

La pandemica ia obliga la organizores a cambia sua festa. On va fa no presentas en sinemas. La program intera va es flueda enlinia.

La organizores ia dise ce los xerca un fan vera de filmas ci es emosial e psicolojial capas de la taxe.

Enroth, ci ia descrive se como “drenada de enerjia” par la pandemica, va pasa un semana solitar en la faro Pater Noster sur Hamneskär, sin telefon, computador, libros e cualce otra forma de diverti.

“La venta, la mar, la posible de parteni a un tipo intera diferente de realia per un semana – tota esta es vera atraosa,” el ia comenta.

El abita usual en Skövde, un site peti a este de Göteborg, do el es un membro de un club local de filmas.

A la matina de saturdi, on ia prende Enroth par barco a la isola, prosima a Marstrand. El va posta dial un jornal video.

Mirja Wester, dirijor de la festa, ia dise ce lo pare justa ce on dona esta esperia unica a un de la multe eroes ci furni aida medical en la pandemica.