Un elicotor sur Marte completi sua vola tre

NASA, la ajenteria spasial esuan, ia fa un vola susedosa tre de un elicotor sur Marte.

Ier, la elicotor peti, nomida Ingenuity (Injenia), ia asende a altia de 5 metres ante vade orizonal tra 50 metres. Pos 80 secondos volante, lo ia reveni a sua loca de enaira.

Esta ia es sua vola la plu aspirante asta aora, ma on intende proba an plu la tecnolojia. La injeniores desira descovre la limitas de la capasia de la elicotor, an si lo va colide alora con la surfas.

La du volas presedente ia es fada a lundi e jovedi. La aveni a lundi ia es la ves prima cuando un avion ia vola propulsada e controlada sur un otra planeta.

Ingenuity ia es portada a Marte par la vagador Perseverance (Persiste), cual ia atera en la crater Jezero a media de febrero. La avioneta pesa 1,8 cilogrames e on regarda lo como un demostra de la usosia de la capasia de vola en la atmosfera rarida de la planeta roja.

En futur, cisa on va usa elicotores per esplora vias cual vagadores e astronautas intende segue e per esamina locas como falesas a cual on pote ariva en no otra modo.

Ofisiores permete du plu volas a la ecipo de la elicotor ante comanda Perseverance a comensa sua mision xef de xerca sinias de vive en Jezero.

Tra la semana pasada de probas, esta robot, cual pesa un ton, ia servi como base de radio per la elicotor e como fotografiste. Perseverance ia fa fotos e filmas corta a distantia de 65 metres de la “campo de avion”.