Tribuis pos la mori de la Duxe de Edinburgh

Monarcos e xefes de stato ia envia tribuis pos la mori de Prinse Philip, Duxe de Edinburgh e sposa de Rea Elizabeth 2 de la Rena Unida. El ia ave 99 anios.

La presidente de la SUA, Joe Biden, ia loda la duxe per sua dedica “a la popla de la RU, a la Comunia de Nasiones e a sua familia” como ance per sua servi en la Gera Mundal Du, sua promove de laboras ambientiste e sua inspira de persones joven.

La duxe, de ci sua mori ia es anunsiada par la Palasio Buckingham ier, ia acompania Rea Elizabeth en sentos de visitas ultramar. El ia ave lias de sangue con alga familias reial presente o pasada de Europa.

Un telegram de Re Felipe e Rea Letizia de Espania ia es emosiosa, enviante “tota nosa ama e afeta” a Tia “Lilibet”, la nom amosa usada par la duxe per sua sposa.

Ance Re Carl Gustaf de Sveria ia es emosiada, disente ce la duxe ia es “un ami major de nosa familia tra multe anios, un relata cual nos ia valua profonda”. La familia reial de Nederland ia dise ce los recorda Prinse Philip con respeta grande, ajuntante: “El ia dedica sua vive longa a la servi de la popla brites e a sua multe debes e encargas. Sua personalia vivosa ia fa un impresa nonoblidable.”

Tribuis ia veni ance de la Comunia de 54 nasiones, de cual la plu ia ave sua radises en la Impero Brites e do 2,4 mil milion persones abita aora.

Scott Morrison, ministro xef de Australia, ia loda la duxe como la patron de deses de organizas en acel pais, disente: “El ia corpi un jenera cual nos va vide nunca denova.” La comentas par Jacinda Ardern, ministro xef de Zeland Nova, ia es simil, notante ce “miles de persones joven ia completi defias cual cambia vives” en la program de la Premio Hillary de la Duxe de Edinburgh.

Imran Khan, ministro xef de Pacistan, ia descrive Philip como “un gidor saja”, ajuntante ce sua “rol en promove relatas entre Pacistan e la Rena Unida va es sempre recordada”. La ministro xef de Barat, Narendra Modi, ia es un otra ci ia loda un vive dedicada a “multe stratejias de servi comunial”.

La presidente de Cenia, Uhuru Kenyatta, ia dise ce la duxe ia es “un simbol torinte de valuas familial e la unia de la popla brites como ance la comunia global intera”, e un om ci ia labora per la “coesiste pasosa de la raza umana”.