Tesoros de la eda de bronze en un foresta svensce

Un om, jeometrente un foresta per sua club de corsa de orienta en la ueste de Sveria, ia descovre acaso tesoros de la eda de bronze.

La trovadas inclui sirca 50 ojetos como brasaletas, colaretas, e spinos de veste, e on estima ce los ave sirca 2500 anios.

La cartografiste, Thomas Karlsson, ia dise: “Me ia pensa prima ce lo es cisa un lampa, ma cuando me ia regarda plu atendente, me ia vide ce lo es joalas vea.”

Arceolojistes svensce descrive la ojetos como un reserva volente lasada como un ofre a un dio o dios, o per investi a la vive pos la mori. On trova rara un tal colie en un foresta. Tribus antica ia lasa tipal tal ofres en rios o pantanes, ma esta ojetos ia reposa sur la solo de la foresta, a lado de rocas.

On crede ce un o plu animales ia disturba la tera, partal esposante la tesoros, cual inclui ance un tipo de baston usada per speroni cavalos, trovada a ante en Danmarc ma nunca en Sveria.

Karlsson dise ce el ia persepi un sintili metalin en cuando el ia regarda un mapa sur cual el ia labora. Prima, el ia pensa ce la ornas es copias, car sua state ia es tan bon. Ma en bevi un cafe en la foresta, el ia eposta a un arceolojiste local.

La lege svensce esije ce cualcun ci trova tal anticalias avisa la polisia o la autoriosa local, car on regarda los como la propria de la stato. La Comite de Erita Nasional Svensce deside alora cual premio la trovor va reseta.

Aora un ecipo de arceolojistes de Göteborg esamina detaliosa esta foresta a sirca 50 cilometres a norde-este de sua site.