Tanzania no intende vasini sua popla

La governa de Tanzania, ja criticada per sua maneja de la pandemica, no intende distribui vasines de covid, longo sua ministro de sania.

Esta comenta veni a alga dias pos cuando Presidente John Magufuli ia averti ofisiores contra oteni vasines, disente ce los pote dana persones – ma donante no fatos suportante. Sua oposores ia acusa el de desesajera la menasa de la virus.

Miliones de persones es ja vasinida en multe paises pos la aproba urjente de vasines. Estas es rigorosa probada en esperimentas cual envolve miles de persones ante es evaluada par regulores medical. Los regarda tota la datos sur la securia e eficasia de la vasines ante pote aproba los per usa a la popla jeneral.

En la mense pasada, la Organiza Mundal de Sania ia consela forte Tanzania a considera vasini sua popla.

Tanzania es un de la poca paises de mundo cual no publici informas sur sua casos de covid. La plu resente, lo ia fa esta en maio, cuando lo ia rejistra sirca 500 casos e 20 moris. En la mense seguente, Magufuli ia declara ce Tanzania es libre de la virus.

En janero, la presidente ia dise ce alga tanzanianes ia viaja estra la pais per es vasinida ma “ia trae a nos un coronavirus strana”. On ia vide esta comenta como un confesa parente ce aora la virus sirculi en la pais.

A un confere jornaliste ier, Dr Dorothy Gwajima, ministro de sania, ia recomenda ce tanzanianes condui cauta e usa medisin tradisional per trata covid, an si la siensa no ia confirma la capasia de estas per combate la virus. Un blogor ia comparti fotos de Gwajima e otra ofisiores enspirante vapor e bevinte un prepara erbal.

Multe paises african compra vasines par un scema internasional nomida Covax, ma alga de los intende negosia direta con companias farmasial. Covax aida paises plu povre a compra vasines, entre consernas cresente ce nasiones rica saisi tota per pratica un “nasionalisme de vasin”.

Paises african cual ia comensa distribui vasines inclui Misre, Gine, Magrib e Sexeles.