Rusia debe no usa un tubon como un arma, Merkel dise

Angela Merkel, canselor deutx, ia dise ce Rusia risca es plu punida si lo usa un tubon controversa de gas contra Ucraina.

En sua visita final a Ciiv ante parti de sua posto, Merkel ia dise a la presidente ucrainsce, Volodymyr Zelensky, ce el comprende sua ansia sur la projeta Nord Stream 2.

Zelensky oposa la tubon, disente ce lo menasa la securia de sua pais. Lo va pasa su la Mar Baltica e va dupli esportas de gas rusce a Deutxland.

Ucraina teme ce esta va forti la teni par Moscva de la furni rejional de enerjia e va crese ance sua influe.

En un confere jornaliste con Merkel ier, Zelensky ia descrive la projeta como “un arma jeopolitical de la Cremlin, disente ce lo va es “perilosa per tota Europa”.

Ma Merkel, ci en esta autono va sesa es la canselor deutx pos 16 anios en la posto, ia dise ce Berlin acorda con Washington ce Nord Stream 2 debe no es usada contra Ucraina. El ia ajunta ce punis economial ta pote es usada contra Moscva longo un acorda entre Deutxland e la SUA, si gas ta es “usada como un arma”.

Zelensky ia dise ce el es consernada par lo cual va aveni pos tre anios cuando la contrata per furni gas rusce tra tubones ucrainsce fini. La perde de biliones de dolares de paias per traversa ta afeta grave la economia de Ucraina.

Merkel, ci ia discute con Vladimir Putin, presidente rusce, a venerdi, ia promete furni plu ca bilion dolares per aida estende la setor ucrainsce de enerjia renovable.

Rusia furni ja sirca 40% de la gas usada par la UE, pico plu ca Noria, cual no parteni a la UE ma partisipa en sua mercato comun. La tubon nova va aumenta la cuantia de gas cual pasa su la Mar Baltica asta 55 mil milion metres cubo per anio.

Merkel ia atenta convinse statos de Europa sentral e este ce la tubon no va fa ce Deutxland deveni dependente de Rusia per sua enerjia.