Recomendas per un enclui nasional du en Barat

En Barat, la partito oposante xef ia clama per un enclui nasional completa, corta pos cuando la pais ia esede 20 milion infetas de covid. La ministro xef, Narendra Modi, resiste par causa de la efeto probable a la economia.

Barat ia ajunta plu ca 355 mil casos ier, min ca la 400 mil infetas rejistrada a 30 april. La governa ia dise ce la cuantia de casos “lenti”, ma la probas fada ia redui ance, tal ce la cuantia vera de casos es cisa multe plu alta.

Recomendas per un enclui du ia veni ance de gidores comersial, espertas internasional de sania, e otra politicistes major.

Desides sur restrinjes en Barat es fada par la autoriosas de la statos individua, no par la governa sentral. Modi ia dise ce statos debe considera restrinjes sola como “la eleje final”.

Ma multe statos ia introdui ja restrinjes, an tal. Bihar, en la norde, es la plu resente cual ia anunsia un state de enclui completa, e la capital Delhi e la sentro finansial Mumbai es ance su constrinjes.

Modi ia es forte criticada en la anio pasada cuando el ia pone un enclui nasional con min ca cuatro oras de avisa. Esta ia lasa deses de miles de laborores migrante sin labora e obligada a pasea tra sentos de cilometres a sua viletas.

Par causa de la enclui, la esflue economial de Barat ia descrese recordo par 24% entre april e junio 2020, comparada con la mesma periodo en la anio presedente. La governa ia dise ce un plu enclui nasional va produi segues grave per la economia.

La onda du de covid en Barat ia es nurida par regulas laxe de securia e par festas publica jigante e asemblas political. Lo ia inonda la ospitales, e retardas de proba, diagnose e trata ia crea un apico en la statistica de moris. La ospitales sufri ance un manca de letos e drogas nesesada.

La pais ia reporta plu ca 222 mil moris par la virus, ma espertas dise ce esta es multe min ca la cuantia vera. On ia esperia filos estrema longa a la senerias, piras funeral coletiva, e un manca de spasio per entera o seni la mores en la sites.