Protestores sudani esije un governa militar

Oposores de la traversa de Sudan a democratia ia vade ier sur la stradas de Khartoum per urje ce la armada prende controla de la pais.

Alga miles de protestores ia asembla estra la palasio presidental a media de un crise political profondinte. Grupos militar e sivil ia comparti la potia pos la despone de Presidente Omar al-Bashir en 2019. Ma la tensa ia crese pos setembre, cuando on ia aborta un colpa atentada de stato atribuda a seguores de al-Bashir.

A pos, xefes militar ia esije reformis a la alia Fortes de Libria e Cambia, un organiza sivil cual ia gida la protestas contra al-Bashir e ia es un parte major de la governa traversante.

Ance la fortes armada ia recomenda ce on recambia la consilio. Ma xefes sivil dise ce la esijes parteni a un saisi de potia par la militares.

A saturdi, protestores promilitar ia scande “basi la governa de famia” e ia urje Jeneral Abdel Fattah al-Burhan, xef de la fortes armada e la Consilio Autonom juntada militar-sivil de Sudan, a inisia un colpa e saisi la controla.

“Nos nesesa un governa militar,” un protestor ia comenta. “La governa corente ia fali trae a nos justia e egalia.”

Diferente de protestas presedente en Sudan, la protestores ia es permeteda a ateni la portones de la palasio, e poca polisiores ia es presente.

Protestores progovernal ia anunsia un asembla a jovedi en responde a los de ier.

A venerdi, Abdalla Hamdok, ministro xef sivil de Sudan, ia desveli un scema per maneja la crise political cual el la descrive como “la plu mal e la plu perilosa” en la du anios de la traversa a democratia.

El ia es induida como ministro xef en agosto 2019, pos protestas grande cual ia fa ce la militares fini la 30 anios de la rena de al-Bashir en april. Ma suporta per la governa traversante ia diminui en menses resente, car la reformis economial ia redui la suvenis per carburante e ia alti la infla finansial.