AORA OJI
Novas de la mundo, simple reportada en elefen
2021 ·
2020 ·
2019 ·
2018 ·
2017 ·
2016 ·
2015 ·
2014 ·
2013
12 julio 2021
Un colpa de lampo ia mata a la min 11 persones e ia feri multe plu en la site Jaipur en la norde de Barat ier.
La vitimes ia fa selfis en la pluve a la culmina de un tore de vijila a la Fortres Amer de la sentenio 12, un atrae turiste.
27 persones ia es sur la tore e mur de la fortres cuando la lampo ia aveni. On reporta ce alga ia salta a la tera.
Un polisior major ia comenta ce la tore es un loca popular en la fortres, ajuntante ce la plu de la mores ia es persones joven.
De 2004, colpas de lampo ia mata promedia 2000 baratis per anio. Soldi ia vide nove plu reportas de tal moris tra Rajasthan, la stato do Jaipur es situada. La ministro xef de la stato ia anunsia 500 mil rupis per compensa la familias de los ci ia mori.
La Departe Meteorolojial Barati ia dise ce moris par colpa de lampo ia dupli en la pais pos la desenio de 1960, notante la crise de clima como un de la razonas.
Longo la datos, avenis de lampo mesma ia deveni plu comun par 30–40% en Barat pos la temprana de la desenio de 1990. En 2018, la stato Andhra Pradesh en la sude de la pais ia rejistra 36 749 colpas en sola 13 oras.
Ofisiores dise ce lampo colpa plu comun en rejiones con min arbores, do lo es plu probable ce persones va es colpada.
La saison de monson, cual porta pluves forte, estende tipal de junio a setembre.
Esta paje es presentada con la lisensa CC Attribution-Share Alike 4.0 International.
Lo ia es automatada jenerada de la paje corespondente en la Vici de Elefen a 10 novembre 2021 (17:34 UTC).