La SUA es presada sur la evacua de afganis

La SUA es presada par sua aliadas a pospone sua retira de Afganistan per permete plu tempo per evacua persones ci vole fuji de la pais, cual es aora governada par militaristes taliban.

Longo la projeta presente, la soldatos esuan ci controla la airoporto de Kabul – la sola cual funsiona en la pais – va parti ante la fini de agosto.

Un confere de la Grupo de Sete (Canada, Deutxland, Frans, Italia, Japan, la Rena Unida e la Statos Unida), ospitada oji par la Rena Unida, va discute la problem.

La talibanes ia averti sur efetos seguente si soldatos stranjer va resta pos la limita de tempo ja acordada con la SUA.

A esta momento, 5800 soldatos esuan es en Afganistan. Presidente Joe Biden va deside en la 24 oras veninte esce el va estende sua presentia.

La Casa Blanca ia dise ce la SUA ia evacua – o aida la evacua de – aprosima 48 mil persones pos la comensa de un projeta intensa de transporta par avion a des dias ante aora.

Otras ci desira fuji es en folas densa en o prosima a la airoporto internasional en Kabul, la capital.

Multe de la fujores, spesial los ci ia labora con la fortes stranjer, teme venja par la organiza taliban cual ia enforsa un varia estrema sever de lege muslim cuando lo ia governa entre 1996 e 2001.

La talibanes ia atenta pare reconsiliante a la afganis restante, demandante ce los aida reconstrui la pais. Un portavose ia dise ce persones con pasaportos va pote ancora parti par volas comersial pos la limita de tempo.

Los dise ance ce los va respeta la diretos de femes e xicas, ma on ave ja reportas de detenis e esecutas. Organizas per diretos umana dise ce la Nasiones Unida debe crea un corpo internasional e nondependente per investiga lo cual aveni.

Imajes de la Airoporto Dulles en Washington mostra la ariva de afganis en la SUA.